Zwakɔbə pìí ʋ va Betɛlə
35
1 Tə mʋ̀ yìə̀n təntə kwa nə, dɩɩn don nə, Yɩɩ swɩ̀n Zwakɔbə con, ʋ wʋ́: «Zàn, n va Betɛlə, n jə̀ń lá. N wá lwa Yɩɩ joŋi bwálɩ* lá, n pa nə. Bwálɩ́ təntə wa nə, à dí yáá, à nan n nə, máŋá tə wa, n nə dəri, sə n jɛ́n, n zʋnʋ Ezayu yáá nə.» 2 Zwakɔbə swɩ̀n ʋ dìə̀ lɩ̀à tə, də ba tə mama con, ba yà nə wulə də wá, ʋ wʋ́: «Á lɩa woŋwanan tə, tə nə wulə á con, á dʋgʋ. Á lɩa á tɩ̀àn durən yìə̀n wa, sə á ga zʋ gànàn, tə nə ba durən jə. 3 Á kənə á sírí! Nə wá zàn, nə va Betɛlə, sə à lwà Yɩɩ joŋi bwálɩ́ lá, à pa Yɩɩ nə. Ʋ mʋ̀ Yɩɩ təntə nə le à yɩjʋnɩ, à pucʋnɩ tə máŋá wa, ʋ ga ya də nə, à vəli mama wa.» 4 Ba dàń lɩ woŋwanan tə mama, tə yà nə wulə ba con, kʋ súrí ba zɩan kwana nə, ba pa Zwakɔbə nə. Ʋ jon tə, ʋ kʋ̀ ʋ kə sɩsanʋ tə də̀ń, kʋ yà nə wulə Siswɛmə tɩʋ tə nii nə. 5 Yá Zwakɔbə də ʋ bɩ̀á tə nə zàn, ba vìrí máŋá tə wa, Yɩɩ pɩn fən zʋ lɩ̀à tə mama, tɩan tə wa, tə yà nə kɩkarɩ Siswɛmə tɩʋ tə. Yá kʋ dàń pɩn, lìù mama wà nan, ʋ dɩŋɩ Zwakɔbə də ʋ bɩ̀á tə kwa, sə ʋ ta ba.6 Zwakɔbə də lɩ̀à tə mama, ba nə wulə də wá, vəli ba yí Luzə. Kʋ mʋ̀ nə yɩ Betɛlə, kʋ nə wulə Kanaan lʋʋ nii tə wa. 7 Ʋ lwə̀ Yɩɩ joŋi bwálɩ́ lá nə, ʋ ga dɩ kʋ bwálɩ́ tə yɩrɩ, Ɛlə-Betɛlə.a Cɩ́gá, mə kʋ bwálɩ́ tə wa nə, Yɩɩ nan ʋ nə, máŋá tə wa, ʋ nə dəri, sə ʋ jɛ́n, ʋ zʋnʋ tə yáá nə. 8 Debora, ʋ nə kʋ̀nɩ̀ Rebɛka tɩga. Ba gùrì wá Betɛlə nii nə, sɩsanʋ don də̀ń nə. Kʋ mʋ̀ nə pɩn, ba dàń boŋə kʋ tɩ̀ʋ́ təntə, yinɩa tɩ̀ʋ́.
9 Zwakɔbə nə nan Padan-Aramə ʋ bà kwa nə, Yɩɩ kʋ́ʋ̀ twi, ʋ nan ʋ nə, ʋ ga fwa zəni ʋ yɩra.
10 Yɩɩ swɩ̀n ʋ con, ʋ wʋ́:
«N yɩrɩ nə yɩ Zwakɔbə,
yá sɩ́ʋ́n nə, ba kʋ́ʋ̀ ba bon mʋ́ Zwakɔbə.
N yɩrɩ dàń wá ya Yɩzərayɛlə.»
Mə kʋ twá nətʋ,
Yɩɩ dàń ma boŋə wá Yɩzərayɛlə.
11 Yɩɩ swɩ̀n ʋ con, ʋ súrí lá, ʋ wʋ́:
«À yɩ Yɩɩ tə, à nə wulə tə mɛ yuu wa.
Lɩra bɩ̀á,
sə n pùlì zənzən.
Dwíə́ də dwíə́ kapʋpʋ wá nan n yɩra.
À ga wá pa,
n dwíí tə lɩrɩ pɛ̀gá də.
12 À wá pa mʋ́ lʋʋ nii tə,
à nə kàn nii,
də à wá pa Abərahamə də Yɩzakə nə.
À ga wá pa kʋ, n dwíí tə də nə,
n tɩan kwa nə.
13 Kʋ kwa nə, Yɩɩ kɛ̀ń ʋ yá Zwakɔbə, bwálɩ́ tə wa, ʋ yà nə twi, ʋ swɩ̀n də wá. 14 Zwakɔbə zɩ̀n kapan, ʋ zɩgɩ yɩɩ nə, bwálɩ́ tə wa, Yɩɩ yà nə twi, ʋ swɩ̀n də wá. Ʋ twɛ́n divɛn də nʋga kʋ yuu wa. 15 Zwakɔbə dɩga bwálɩ́ tə, Yɩɩ yà nə twi, ʋ swɩ̀n də wá tə yɩrɩ, Betɛlə.
Raswɛlə lɩrɩ Bɛnzwamɛn, ʋ tətə ga tɩ
16 Kʋ kwa nə, Zwakɔbə də ʋ dìə̀ lɩ̀à tə kʋ́ʋ̀ zàn Betɛlə nə, ba vìrí. Kʋ máŋá tə wa, də Raswɛlə pùə́ yà yí. Yá máŋá tə ba nə ga mancɩn, sə ba yí Efərata, Raswɛlə pùə́ tə zàn, ka yɩ̀, sə ʋ lʋra. Ʋ lɩrɩ tə dàń yɩn càn zənzən. 17 Yá bìú tə nə wulə, ʋ naŋa máŋá tə wa, kalonu tə swɩ̀n Raswɛlə con, ʋ wʋ́: «Dàn ká pa fən ja mʋ́. Cɩ́gá, n kʋ́ʋ̀ nɩ bibɛɛ!» 18 Yá Raswɛlə dàń yà wulə ʋ tɩ. Yá sə ʋ mɩɩ ga zɩgɩ lá kʋ zwɛ̀ mɩ́ámɩ́án, ʋ dɩga bìú tə yɩrɩ, Bɛn-Oni.b Yá ʋ nyɩna mʋ̀ dɩga ʋ yɩrɩ, Bɛnzwamɛn.c 19 Raswɛlə tɩga, ba gùrì wá Efərata cwəŋə tə nii nə. Efərata yɩrɩ don nə yɩ Bɛtəleyɛmə. 20 Zwakɔbə cwɛn kapan ʋ libəri tə yuu wa. Ba boŋə kʋ Raswɛlə libəri kapan, də zə̀n mama.
21 Ba nə gùrì Raswɛlə kwa nə, Zwakɔbə, ʋ yɩrɩ don nə yɩ Yɩzərayɛlə, vəli ʋ pú ʋ gansili Migədalə-Edɛrə kwa con. 22 Yɩzərayɛlə nə jə̀ə́ kʋ lʋʋ nii təntə wa, máŋá tə wa, Ribɛn pə̀ń Bila, ʋ nə yɩ ʋ nyɩna tə kabiə. Yá Yɩzərayɛlə dàń nì kʋ yoo təntə.
Kʋ máŋá tə wa, də Zwakɔbə bɩ̀á tə yà yɩ fugə də bələ. 23 Leya bɩ̀á nə yɩ Ribɛn, ʋ nə yɩ Zwakɔbə bikwɩa, də Simeyon, də Levi, də Zwida, də Yɩsakarə, də Zabulon. 24 Raswɛlə bɩ̀á nə yɩ Zʋzɛfə də Bɛnzwamɛn. 25 Raswɛlə tʋtʋnbʋa Bila bɩ̀á nə yɩ Dan də Nɛfətali. 26 Leya tʋtʋnbʋa Ziləpa bɩ̀á nə yɩ Gadə də Aswɛrə. Mə ba mʋ̀ mama nə yɩ Zwakɔbə bɩ̀á tə, ʋ nə lɩrɩ Padan-Aramə nə.
Yɩzakə tɩan yoo
27 Zwakɔbə pìí ʋ va ʋ nyɩna Yɩzakə con, Mamərə nə, Kiriyatə-Arəba nə, kʋ yɩrɩ don nə yɩ Ebəron. Mə kʋ bwálɩ́ təntə wa nə, Abərahamə də Yɩzakə yà vəli, ba twá ba jə̀ń. 28 Yɩzakə bɩna tə mama, ʋ nə fwa lʋʋ wa, yɩ bɩna bíí də sapwɩnɩa, 29 yá ʋ ga zɩgɩ lá, ʋ tɩ. Ʋ bɩ̀á Ezayu də Zwakɔbə nə tì wá, ba gùrì ʋ nɩbara ba con, ba nə dí yáá, ba tɩ. Ʋ tɩga də ʋ kwɩn zənzən, ʋ ga də́ lʋʋ ywánɩ́ də.