Lʋʋ Dəkuu 34

Dina nábwáná gʋa Siswɛmə, ʋ yɩrɩ

1 Dɩɩn don nə, Dina, bʋ̀á tə Leya nə lɩrɩ də Zwakɔbə tə, nan ʋ va bwɩ̀ɩ́ duən con, lʋʋ nii tə wa. 2 Siswɛmə, ʋ nə yɩ Evi dwíí tə pɩ̀ʋ́ Hamɔrə bìú, nɩ Dina, yá ʋ dàń jɩn wá, ʋ pə̀ń də dɩ̀àn, ʋ kə cavɩra ʋ nə. 3 Siswɛmə sóní Zwakɔbə bʋ̀á Dina zənzən, də ʋ waa mama. Kʋ nətʋ tə pɩn, ʋ swɩ̀n sʋ̀ràn bʋ̀á tə con, tə nə zuri bɩcan. 4 Siswɛmə swɩ̀n ʋ nyɩna Hamɔrə con, ʋ wʋ́: «Swe bʋ̀á wà tə, n pa nə.» 5 Zwakɔbə nì də, Siswɛmə cʋ̀gʋ̀ ʋ bʋ̀á Dina. Kʋ máŋá tə wa, də ʋ bɩ̀á tə yà vəli gaʋ də vàná, kʋ pa, ʋ wà yoo mama swɩ̀n. Ʋ dàn wuuu, ʋ bɩ̀á tə pìí, ba nan gaʋ tə, ba bà. 6 Siswɛmə nyɩna Hamɔrə dàń nan, ʋ va ʋ yí Zwakɔbə, sə ʋ swɩ̀n də wá. 7 Kʋ máŋá tə wa, də Zwakɔbə bɩ̀á tə də pìí ba naŋa gaʋ tə, ba bɩ̀àn. Ba nə twi, ba nì də, Siswɛmə pə̀ń də ba nakʋa Dina, kʋ yɩ̀gà ba, kʋ ga zɩ̀n ba lɩŋa zənzən. Kʋ yoo təntə yɩ Yɩzərayɛlə lɩ̀à culu nəfarʋ, Siswɛmə nə cʋ̀gʋ̀. Kʋ yɩ yoo tə, kʋ yà nə wà mɛ, sə kʋ tʋn mɩ́ámɩ́án. 8 Yá Hamɔrə swɩ̀n sʋ̀ràn tə tə, Zwakɔbə də ʋ bɩ̀á tə con, ʋ wʋ́: «À bìú Siswɛmə swə á bʋ̀á tə zənzən, də ʋ waa mama. À lòrì aba, sə á pa wá, á bʋ̀á tə, ʋ ma fwa ʋ kan. 9 Á yágá, sə nə swe duən bwɩ̀ɩ́. Á wá pa nəba, á bwɩ̀ɩ́ tə, sə nə swe. Yá nə də ga wá pa aba, nə bwɩ̀ɩ́ tə, sə á də swe. 10 Á wá jə̀ń də nəba, yá á ga wá fwa á fɩra, lʋʋ nii tə wa. Á yana kʋ wa, á yoli, á va bwálɩ́ tə mɛ, á nə swə. Á yə̀ bwálá á jon, á tɩnɩ.

11 Siswɛmə də tətə swɩ̀n Dina nyɩna, də ʋ nábwáná tə con, ʋ wʋ́: «Də á nə sɛ̀, á pa nə kʋ yuywaŋʋ təntə, à wá pa aba won tə mama, á nə wá bwe kʋ bwiə, à con. 12 Á dɩa bwàń nəfarʋ à yuu wa, sə à yoli, də zìlə́ wiən kapʋpʋ, à nə mɛ, sə à fwa, à pa aba. À ken sírí, sə à pa aba won tə mama, á nə wá bwe kʋ bwiə, à con. Yá á dàń nə pɩan nə bʋ̀á tə mʋ̀, à ma fwa à kan. 13 Siswɛmə nə cʋ̀gʋ̀ Dina tə pɩn, Zwakɔbə bɩ̀á tə le Siswɛmə də ʋ nyɩna Hamɔrə də swɩan sʋ̀ràn. 14 Ba swɩ̀n, ba wʋ́: «Nə mʋ̀ culi sə nə tì nə nakʋa, nə pa bɛɛ nə ʋ nə yəri Yɩɩ. Cɩ́gá, kʋ nətʋ yɩ cavɩra kʋ kəni nə nə. 15 Nə wá sɛ̀ kʋ tə, á nə pɩ̀à tə, də á nə sɛ̀, á pa ba goŋə bara tə mama, ba nə wulə á titəŋi wa. Kʋ nətʋ dàń wá pa, á də jì ndə nə nə. 16 Yá nə də aba dàń wá wànɩ́, nə swe duən bwɩ̀ɩ́. Nə wá jə̀ń də aba, nə ga wá jì dwíí nədʋ. 17 Yá á dàń nə vɩga, sə á pa ba goŋə aba, nə wá jon nə bʋ̀á tə, nə ga zàn nə vìí.»

18 Hamɔrə də ʋ bìú Siswɛmə sɛ̀, sə ba tʋn kʋ tə, Zwakɔbə bɩ̀á tə nə bɩrɩ ba. 19 Siswɛmə tətə wà dán, ʋ ma pa ba goŋə wá, ʋ yà nə swə Zwakɔbə bʋ̀á tə zənzən yɩrɩ. Siswɛmə yà yɩ lìù tə, ba nə jələ ʋ yuu wa zənzən, ba doni lɩ̀à tə duən tə mama, ʋ nyɩna dìə̀ tə wa.

20 Hamɔrə də ʋ bìú Siswɛmə vəli ba tɩʋ tə mimii nə, ba swɩ̀n sʋ̀ràn tə tə, ba tɩʋ lɩ̀à tə con, ba wʋ́: 21 «Zwakɔbə də ʋ bɩ̀á tə yɩ ləzwənzəŋə. Nə yágá ba, sə ba jə̀ń nə lʋʋ nii tə wa. Kʋ dáá zənzən, kʋ pa ba. Ba yana kʋ wa, ba yoli, ba va bwálɩ́ tə mɛ, ba nə swə. Nə də ba dàń wá swe duən bwɩ̀ɩ́. 22 Yá ba dàń nə bá sɛ̀, ba jə̀ń də nəba, sə nə də ba mɛ jì dwíí nədʋ, də nə nə wà pɩn, ba goŋə nə wa bara tə mama, ndə ba tətə nə goŋi nətʋ. 23 Nə nə sɛ̀ ba nyiən tə, ba də wá sɛ̀, ba jə̀ń də nəba. Yá ba jɩjə tə də ba vàná tə mama dàń wá ya nə mʋ̀ nyiən.» 24 Lɩ̀à tə mama, ba yà nə nan tɩʋ tə mimii tə nə, cʋgʋ Hamɔrə də ʋ bìú Siswɛmə sʋgʋ tə. Yá tɩʋ tə wa bara tə mama, dàń pɩn ba goŋə ba.

25 Kʋ dɩan batwa dɩɩn nə, Zwakɔbə bɩ̀á tə wa lɩ̀à bələ, kʋ mʋ̀ nə yɩ Simeyon də Levi, ba nə yɩ Dina nábwáná pwɛɛn, tì ba kwatara sɩ̀án, ba ja zʋ tɩʋ tə wa, ba ma gʋ bara tə mama. Kʋ máŋá tə wa, də tɩʋ tə tɩ̀án yɩra yà tə wiri. Yá ba dàń yà kʋ́ʋ̀ ba jələ, də Zwakɔbə də ʋ bɩ̀á tə wá tʋn yolwan ba yɩra. 26 Ba za Hamɔrə də ʋ bìú Siswɛmə də ba gʋ, də kwatara sɩ̀ʋ́. Ba zʋa ba lɩ Dina Siswɛmə dìə̀ wa, ba ja nan.

27 Simeyon də Levi nə gʋa tɩʋ tə wa bara tə, ba zwɛ̀ kwa nə, Zwakɔbə bɩ̀á tə duən tə vəli, ba pɛ̀ tɩga tə jɩjə wiən tə. Ba pɛ̀ tɩʋ tə jɩjə wiən tə mama, ba nə ken cavɩra ba nakʋa tə nə yɩrɩ. 28 Ba jɩn tɩʋ tə tɩ̀án vanmɩnɩ də ba vanfaran, də ba bɩnɛ, də won tə mama, kʋ yà nə wulə tɩʋ tə wa, də ba kárɩ́ wa. 29 Ba pɛ̀ tɩʋ tə tɩ̀án jɩjə wiən tə mama. Ba jɩn tɩʋ tə tɩ̀án kana də ba bìsɩ́ná, ba pɛ̀ wiən tə mama, tə yà nə wulə dìì tə wa, ba ja vìí. 30 Yá Zwakɔbə dàń swɩ̀n Simeyon də Levi con, ʋ wʋ́: «Á ken nə yoo wa! Á ja nə á nan, á pa lʋʋ nii tə tɩ̀án nə! Sɩ́ʋ́n nə, Kanaan tɩ̀án tə, də Perizi dwíí tə, də lìù don də mama lʋʋ nii tə wa, dàń wá tì dʋŋɩ də nə. À tətə na də, nə ba dáá. Lʋʋ nii tə tɩ̀án nə zàn, ba kə nii nədʋ, sə ba tà nə, ba wá cʋ̀gʋ̀ à də à dìə̀ lɩ̀à tə mɛ.» 31 Simeyon də Levi le, ba wʋ́: «N mʋ̀ na də kʋ mɛ, sə ba ja nə nakʋa tə, ba ma fwa ndə kacwarʋ nə naaa?»