Zwakɔbə də Ezayu pìí ba kə duən yuu
33
1 Zwakɔbə zɩ̀n ʋ yáá, ʋ ywàń, də nə̀ń Ezayu nə, ʋ bɩ̀àn, də ʋ kwa bara biənɩa. Zwakɔbə dàń pwɛ̀ bìsɩ́ná tə, ʋ lɩ Leya bɩ̀á, ʋ pa wá, ʋ lɩ Raswɛlə bìú, ʋ pa wá, ʋ lɩ tʋtʋnbwɩɩ bələ tə də bɩ̀á, ʋ pa ba. 2 Ʋ dí yáá ʋ lɩ tʋtʋnbwɩɩ tə, də ba bɩ̀á tə, ʋ kə yáá. Ʋ zàn ʋ lɩ Leya də ʋ bɩ̀á, ʋ pa ba pú. Kʋ kwa nə, ʋ dàń pɩn Raswɛlə də ʋ bìú Zʋzɛfə pú. 3 Ʋ tətə dàń lɛ ba mama yáá, ʋ vəli də ʋ za ʋ nadwana tɩa wuuu, nɛɛ barpɛ, ʋ ga zɩgɩ lá, ʋ va ʋ bólí, ʋ zʋnʋ tə nii. 4 Yá Ezayu dəri ʋ va, ʋ jəri wá, ʋ pùrì wá, ʋ kə ʋ nyʋnɩ nə, ba mɛ bələ ga wulə ba kwi. 5 Ezayu zɩ̀n ʋ yáá, ʋ na kana tə, də bìsɩ́ná tə, ʋ ga bwe, ʋ wʋ́: «Bə̀rə́ nə yɩ lɩ̀à ba tə, ba nə wulə n kwa?» Zwakɔbə le, ʋ wʋ́: «Kʋ yɩ bɩ̀á tə, Yɩɩ nə twá ʋ pubwanʋ tə nə, ʋ pa n tʋtʋnbiu tə nə.» 6 Tʋtʋnbwɩɩ tə də ba bɩ̀á dàń fàrɩ́ ba yí lá, ba tʋ ba nadwana yuu, Ezayu yáá con, ba pa wá dun. 7 Leya də də ʋ bɩ̀á twi ba yí lá, ba tʋ ba nadwana yuu, ba pa wá dun. Kʋ kwa nə, Raswɛlə də də Zʋzɛfə twi ba yí lá, ba tʋ ba nadwana yuu, ba pa wá dun.8 Ezayu bwe, ʋ wʋ́: «N dí yáá, n tʋn lɩ̀à də vàná púlə́ púlə́, n pa ba jəri nə! Vàná təntə mama yɩ n pɩ̀à, n ma fwa bɛ̀?» Zwakɔbə le, ʋ wʋ́: «À yuu-tiu, tə yɩ à pɩ̀à, à ma lòrì mʋ́, sə n fwa pubwanʋ à yɩra.» 9 Yá Ezayu swɩ̀n, ʋ wʋ́: «Jɩjə bʋ́rɩ́ nə, à nubiu. Ja n wiən tə.» 10 Zwakɔbə dàń ma swɩ̀n, ʋ wʋ́: «Ɔn ɔn, à lòrì mʋ́, sə n jon à zìlə́ wiən tə, à jɩɩn wa, də n cɩ́gá nə sɛ̀, sə n fwa pubwanʋ à yɩra. Cɩ́gá, n sɛ̀, n jəri nə də wʋywaŋʋ, kʋ pa, à nə nɩ mʋ́ à yɩ́á yuu tə, yɩ ndə à nə nɩ Yɩɩ. 11 Yɩɩ fwa pubwanʋ à yɩra zənzən. Ʋ pɩn à jə won mama. Kʋ mʋ̀ yɩrɩ, à dàń lòrì mʋ́, sə n jon à zìlə́ wiən tə, à nə ja bà, sə à pa mʋ́.» Zwakɔbə dàń lòrì Ezayu wuuu, kʋ pa, ʋ ga ʋ sɛ̀, ʋ jon zìlə́ wiən tə.
12 Yá Ezayu swɩ̀n, ʋ wʋ́: «Zàn, sə à kwé mʋ́, sə nə vìí.» 13 Zwakɔbə ma le wá, ʋ wʋ́: «À yuu-tiu, n yə̀ə́ də bìsɩ́ná tə ba dɩ̀àn jə. À ga jə pakana də nakana, tə nə jə bɩ̀á, tə ŋʋ̀à. Nə nə kalɩ tə, nə pa tə va, tə lɛ tə dɩ̀àn máŋá, dɩɩn nədʋ pwə́rə́ wa, vanmɩnɩ tə mama wá tɩ. 14 Kʋ mʋ̀ yɩrɩ, à lòrì mʋ́, à yuu-tiu, sə n ya n tʋtʋnbiu tə yáá. À mʋ̀ dàń wá ya n kwa mancɩn mancɩn, à twá vàná tə, də bìsɩ́ná tə vəli dɩ̀àn máŋá nə. Yá nə dàń wá bà, nə yí mʋ́ Seyirə nə.» 15 Ezayu ma kʋ́ʋ̀ swɩ̀n, ʋ wʋ́: «Kʋ nə yɩ nətʋ, à wá yá à lɩ̀à tə duən, sə ba kwé mʋ́.» Zwakɔbə le, ʋ wʋ́: «Ɔn ɔn, dàn ká wʋwalɩ n tɩ̀àn. À yuu-tiu tə dàń ya fwa pubwanʋ à yɩra mʋ́!»
16 Kʋ dɩɩn tə tətə nə, Ezayu pìí ʋ va Seyirə. 17 Yá Zwakɔbə mʋ̀ ga va Sukotə. Ʋ nə yí lá, ʋ lwə̀ ʋ tətə dìə̀, ʋ ga pú sə̀lə́, ʋ pa ʋ vàná tə nə. Kʋ mʋ̀ nə pɩn, ba ma dɩ kʋ bwálɩ́ tə yɩrɩ, Sukotə. Kʋ də̀ń nə yɩ sə̀lə́.
Zwakɔbə yí Kanaan lʋʋ nii
18 Zwakɔbə pìí ʋ nan Padan-Aramə, ʋ bà ʋ yí Siswɛmə tɩʋ tə wa, də yazurə. Siswɛmə yɩ kʋ wulə Kanaan lʋʋ nii tə wa. Ʋ púə́ ʋ gansilə tɩʋ tə yáá con. 19 Bwálɩ́ təntə, ʋ nə púə́ ʋ gansili tə lá, yɩ ʋ yə̀ Hamɔrə dwíí tə con, də səbilurən bíí. Hamɔrə yà yɩ Siswɛmə nyɩna. 20 Zwakɔbə lwə̀ Yɩɩ joŋi bwálɩ́ lá, ʋ dɩ kʋ yɩrɩ, Ɛlə-Elohe-Yɩzərayɛlə. Kʋ də̀ń nə yɩ, Yɩzərayɛlə lɩ̀à Yɩɩ tə, nə yɩ cɩ́gá cɩ́gá Yɩɩ.