Laban də Zwakɔbə dʋgʋ duən də bɩcan sìə́
32
1 Laban zàn jɩjʋ fuən fuən, ʋ pùrì ʋ nɩ̀án tə də ʋ bwɩ̀ɩ́ tə, ʋ kə ʋ nyʋnɩ nə, ʋ ga lòrì Yɩɩ, sə ʋ fwa zəni ba yɩra. Kʋ kwa nə, Laban pìí ʋ va ʋ sàń. 2 Zwakɔbə də zàn, ʋ zʋ ʋ cwəŋə, ʋ ma vìrí. Yá Yɩɩ malɩkɛ nan tə jəri wá. 3 Zwakɔbə nə nɩ tə, ʋ súə́ də pupwən, ʋ ga baa, ʋ kə yɩɩ nə, ʋ wʋ́: «Kʋ tə yɩ Yɩɩ kanporu!» Ʋ dɩga kʋ bwálɩ́ tə yɩrɩ, Mahanayimə.Zwakɔbə tʋn lɩ̀à Ezayu con
4 Zwakɔbə tʋn lɩ̀à ʋ zʋnʋ Ezayu con, Seyirə lʋʋ nii wa, Edomə gaʋ tə wa. 5 Ʋ pɩn ba nii kʋ tə, ʋ wʋ́: «Á díə́ yáá, á va á swɩ̀n à yuu-tiu Ezayu con, də à mʋ̀, ʋ tʋtʋnbiu Zwakɔbə nə tʋn aba. Á wá swɩ̀n ʋ con də, à vəli à ya nə nɩbarɩ Laban con. Yá à dàń dán lá, kʋ bà kʋ yí zə̀n kʋ tə. 6 À jə nɩan, də bɩnɛ, də vanmɩnɩ, də tʋtʋnbɩa, də tʋtʋnbwɩɩ. Yá à dàń tʋŋa aba, sə á swɩ̀n ʋ mʋ̀ Ezayu con, ʋ nə yɩ à yuu-tiu, də à lòrì wá, sə ʋ fwa pubwanʋ à yɩra.»
7 Tʋntʋna tə pìí ba nan Ezayu con, ba bà, ba swɩ̀n Zwakɔbə con, ba wʋ́: «Nə vəli nə na n zʋnʋ Ezayu. Ʋ də wulə cwəŋə wa ʋ bɩ̀àn, sə ʋ jəri mʋ́, də bara biənɩa.» 8 Sʋ̀ràn təntə pɩn, fən də pucʋnɩ zʋ Zwakɔbə zənzən. Ʋ dàń pwɛ̀ lɩ̀à tə, ba yà nə wulə də wá tə, púlə́ bələ. Ʋ pwɛ vanmɩnɩ tə, də vanfaran tə, də nyʋgʋma tə də, púlə́ bələ. 9 Ʋ yà swɩ̀n ʋ waa con, ʋ wʋ́: «Ezayu nə twi, ʋ tà púlí tə don, ʋ cʋgʋ, púlí tə kʋ nə ga lá, wá wànɩ́ kʋ dəri kʋ jɛ́n.» 10 Yá Zwakɔbə dàń jʋ̀n Yɩɩ, ʋ wʋ́: «À nɩbɛɛ Abərahamə də à nyɩna Yɩzakə Yɩɩ, Ba-Yígúrə́-Jə-Tiu, n mʋ̀ nə swɩ̀n à con, sə à pìí à va lʋʋ nii tə wa, kʋ nə yɩ à nyɩna sàń. Yá n kàn nii, də n wá fwa zəni à yɩra! 11 À mun zənzən də wʋywaŋʋ* tə, n nə tʋŋa à yɩra, də pùə́ nədʋ, à mʋ̀ lìù tə, à nə yɩ n tʋtʋnbiu. Cɩ́gá, bɩnɩ tə, à nə bɩn Zʋrədɛn mʋnaa ka tə, də dadu cɩcɩ nə wulə à con. Yá sɩ́ʋ́n nə, à dàń nɩ jɩjə də lɩ̀à zənzən, à pwɛ̀ púlə́ bələ. 12 À lòrì mʋ́, sə n jon nə, à zʋnʋ Ezayu jɩɩn wa. Cɩ́gá, ʋ fən jə nə. À yəri də, ʋ nə wá bà, ʋ gʋ nə, ʋ ga gʋ à kana tə də à bɩ̀á tə də. 13 Yá n mʋ̀ nə swɩ̀n à con, də n wá fwa zəni à yɩra, n ga pa à dwíí ya dánɩ́ ndə mʋʋ kasʋlʋ nə, lìù mama nə wàrɩ̀ ʋ gàlɩ̀!»
14 Zwakɔbə jʋa kʋ bwálɩ́ təntə wa. Kʋ tɩpʋrɩ nə, ʋ lɩ vàná ʋ vàná tə wa, sə ʋ ma fwa zìlə́ ʋ zʋnʋ Ezayu yɩra. 15 Ʋ lɩ bʋ̀nɩ́ biələ, də bʋtʋlan sapʋa, də pakana biələ, də pabɩran sapʋa, 16 də nyʋgʋma kana fɩtwa, də tə bɩ̀á, tə yà nə ŋʋ̀à, də nakana sapwɩlə, də nabɩran fugə, də bɩnakana sapʋa, də bɩnabara fugə. 17 Ʋ pwɛ̀ tə púlə́ púlə́, ʋ pa ʋ tʋtʋnbɩa tə duən nə, ʋ ga swɩ̀n ba con, ʋ wʋ́: «Á kɛ̀ná à yáá, á ga pa laŋa ya vàná tə púlí mama, də kʋ don pwə́rə́ wa.» 18 Ʋ dàń pɩn nii kʋ tə, tʋtʋbiu tə nə, ʋ nə wulə ba mɛ yáá, ʋ wʋ́: «Máŋá tə à zʋnʋ Ezayu nə jəri mʋ́, dɩɩn don, ʋ wá bwe mʋ́, sə ʋ jə́n, lìù tə, ʋ nə tɩ mʋ́, də bwálɩ́ tə, n nə vələ, də lìù tə, ʋ nə tɩ vàná tə, tə nə wulə n yáá con. 19 Kʋ nə yɩn nətʋ, n wá le də, kʋ yɩ ʋ tʋtʋnbiu Zwakɔbə nə tɩ tə. Kʋ yɩ zìlə́ wiən, ʋ tʋn, sə ba pa ʋ yuu-tiu Ezayu nə. Ʋ tətə wulə kwa, ʋ bɩ̀àn.» 20 Nii təntə tətə nə, Zwakɔbə pɩn bələ nii tʋtʋnbiu tə, də batwa nii tʋtʋnbiu tə də nə. Nətʋ nə, ʋ swɩ̀n ʋ tʋtʋnbɩa tə mama con, ba nə púə́ vàná tə kwa. Ʋ swɩ̀n ba con, ʋ wʋ́: «Mə nətʋ nə, á wá swɩ̀n Ezayu con, máŋá tə wa, á nə jəri wá. 21 Á wá swɩ̀n də, ʋ tʋtʋnbiu Zwakɔbə də tətə wulə kwa, ʋ bɩ̀àn.» Cɩ́gá, ʋ yà swɩ̀n ʋ waa con, ʋ wʋ́: «À wá twá zìlə́ wiən tətə nə, à nə pɩn tə dí yáá, à ma kòrì wá. Yá kʋ kwa nə, à wá yí ʋ yɩra, yá ʋ dàń wá jəri nə də pubwanʋ.
22 Ʋ pɩn zìlə́ wiən tə dí yáá, tə vìí. Yá kʋ tɩtɩn təntə nə, ʋ tətə mɛn ʋ dìə̀ lɩ̀à tə con, kʋ bwálɩ́ tə wa.
Zwakɔbə jan də Yɩɩ Malɩka
23 Kʋ tɩtɩn təntə tətə nə, Zwakɔbə zàn, ʋ lɩ ʋ kana bələ tə, də ʋ tʋtʋnbwɩɩ bələ tə, də ʋ bɩ̀á fugə də nədʋ tə, ʋ ja bɩn Yabɔkə buu tə. 24 Ʋ pɩn ʋ lɩ̀à tə, də ʋ wiən tə mama bɩn buu tə.
25 Kʋ dàń yà ga Zwakɔbə cɩcɩ, kʋ bwálɩ́ tə wa. Yá bɛɛ don dàń twi, ʋ jan də wá, tɩtɩn tə nə wuuu, tɩbɩlakʋnʋ bà kʋ yí. 26 Bɛɛ tə nɩ də, ʋ wàrɩ̀ Zwakɔbə, ʋ zɩŋa ʋ dɩ tɩa. Yá ʋ dàń mà Zwakɔbə ciceri, ʋ dwan, jaŋa tə máŋá wa. 27 Bɛɛ tə swɩ̀n, ʋ wʋ́: «Dʋgʋ nə, sə à vìí. Cɩ́gá, tɩbɩlakʋnʋ yí.» Zwakɔbə ma le, ʋ wʋ́: «À wà sɛ̀! À bá dʋgʋ mʋ́, à pa n vìí, də n nə wà zəni fwa à yɩra.» 28 Bɛɛ tə ma bwe wá, ʋ wʋ́: «N yɩrɩ nə yɩ bɛ̀?» Ʋ le, ʋ wʋ́: «À yɩrɩ nə yɩ Zwakɔbə!» 29 Bɛɛ tə dàń ma swɩ̀n ʋ con, ʋ wʋ́: «N jan də Yɩɩ, də ləzoni, yá n dí dɩ̀àn. Kʋ mʋ̀ yɩrɩ, ba kʋ́ʋ̀ bá bon mʋ́ Zwakɔbə. Sɩ́ʋ́n nə, n yɩrɩ dàń wá ya Yɩzərayɛlə*.» 30 Zwakɔbə swɩ̀n bɛɛ tə con, ʋ wʋ́: «À lòrì mʋ́, sə n swɩ̀n n yɩrɩ, n bɩrɩ nə.» Yá bɛɛ tə le wá, ʋ wʋ́: «Bɛ̀ɛ̀ nə n bwe à yɩrɩ nə, sə n ma fwa?» Yá ʋ dàń fwa zəni Zwakɔbə yɩra, lá nə, ʋ ga vìí. 31 Zwakɔbə swɩ̀n ʋ waa con, ʋ wʋ́: «À nɩ Yɩɩ à yɩ́á yuu, yá à wà tɩ.» Kʋ mʋ̀ nə pɩn, ʋ dɩ bwálɩ́ təntə yɩrɩ, Penuwɛlə.a 32 Ʋ kɛ̀ń Penuwɛlə, də yɩɩ dàń nə wulə kʋ pɛ́n. Zwakɔbə yà dwin, ʋ ciceri tə nə dwan tə yɩrɩ. 33 Kʋ mʋ́ nə pɩn, də zə̀n mama, Yɩzərayɛlə lɩ̀à ba vànɩ́ ciceri ŋʋnʋ də́. Cɩ́gá, Yɩɩ mà Zwakɔbə ciceri, ʋ dwan.