Zwakɔbə wulə Laban con
29
1 Zwakɔbə kʋ́ʋ̀ zàn, ʋ zʋ cwəŋə, ʋ ma vələ lʋʋ níí tə wa, kʋ nə wulə yɩɩ yipɩan con. 2 Ʋ vəli, ʋ nan vɩlɩ nə gaʋ tə wa, vanmɩnɩ púlə́ batwa nə kɩkarɩ kʋ. Cɩ́gá, mə vɩlɩ təntə nii nə nə, ba yà nyɩ̀ vàná tə. Yá kapan nəfarʋ yà sun vɩlɩ tə nii nə. 3 Máŋá tə, vàná tə mama nə twi, tə kun duən nə, vɩlɩ tə nii nə, ba yàá bibili kʋ nii kapan tə, ba kə kwa, ba ga tan nɩ́á tə, ba pa vàná tə nə, tə nyʋn. Kʋ kwa nə, ba yàá pìí ba yigu kapan tə, ba kə kʋ bwálɩ́ nə, ba ma sun vɩlɩ tə nii. 4 Zwakɔbə bwe payɩra tə, ʋ wʋ́: «À nubɩa ba, á yɩ yə̀n tɩ̀án?» Ba le wá, ba wʋ́: «Nə yɩ Haran tɩ̀án.» 5 Ʋ kʋ́ʋ̀ bwe ba, ʋ wʋ́: «Á yə̀ə́ Nahɔrə bìú Laban?» Ba le wá, ba wʋ́: «Awo, nə yə̀ə́ wá.» 6 Ʋ bwe ba, Laban yazurə nə, ʋ wʋ́: «Ʋ yɩra zurə?» Ba ma le,ba wʋ́: «Ʋ yɩra zurə! Nə̀ń ʋ bʋ̀á Raswɛlə tətə nə, ʋ ja vanmɩnɩ, ʋ ja bɩ̀àn.» 7 Zwakɔbə dàń swɩ̀n payɩra tə con, ʋ wʋ́: «Á nəŋə yɩtʋrɩ tə ŋʋ́ná. Máŋá tə wà yí, sə á kə vàná tə mama duən yáá nə. Á pɩan nɩ́á vanmɩnɩ tə nə, tə nyʋn, sə á ga ja tə, á pìí á va á yɩ̀rɩ̀.» 8 Payɩra tə le wá, ba wʋ́: «Nə wàrɩ̀ kʋ nə tʋŋa nətʋ, də vàná tə mama nə wà duən yáá twi. Kʋ yɩ tə mama nə twi duən yáá, máŋá tə wa nə, nə dàń yàá bibili vɩlɩ tə nii kapan tə, nə kə kwa, nə ga pa nɩ́á vanmɩnɩ tə nə, tə nyʋn. 9 Zwakɔbə yà tə wulə ʋ swɩ̀n də payɩra tə, də nə̀ń Raswɛlə nə, ʋ twi ʋ yí, də ʋ nyɩna tə vanmɩnɩ tə. Cɩ́gá, Raswɛlə də yà yɩ payɩrʋ. 10 Zwakɔbə nɩ ʋ nɩbarɩ Laban bʋ̀á Raswɛlə də Laban vanmɩnɩ tə. Yá kʋ máŋá tə wa, Zwakɔbə dàń yí vɩlɩ tə nii, ʋ bibili kapan tə, ʋ kə kwa, ʋ ga tan nɩ́á tə, ʋ pa ʋ nɩbarɩ tə vanmɩnɩ tə nə, tə nyʋn. 11 Kʋ kwa nə, Zwakɔbə pùrì Raswɛlə, ʋ kə ʋ nyʋnɩ nə, ʋ ga wulə ʋ kwi. 12 Zwakɔbə swɩ̀n Raswɛlə con, də ʋ yɩ ʋ nyɩna Laban nakʋa bìú. Ʋ swɩ̀n də ʋ yɩ Raswɛlə nɩkɩnɩ Rebɛka bìú. Raswɛlə dàń dəri ʋ va, ʋ swɩ̀n kʋ, ʋ bɩrɩ ʋ nyɩna Laban nə. 13 Laban nə zəzən ʋ nì ʋ nakʋa bìú Zwakɔbə túrí tə ŋwɛn, ʋ dəri ʋ va, ʋ jəri wá, ʋ pùrì wá, ʋ kə ʋ nyʋnɩ nə. Laban jɩn wá, ʋ ja va ʋ dìə̀ wa, yá Zwakɔbə dàń man yìə̀n tə mama, tə nə tʋn, ʋ bɩrɩ wá. 14 Laban dàń swɩ̀n ʋ con, ʋ wʋ́: «Kʋ ba tʋ́tʋ̀ná jə! N cɩ́gá yɩ à kurən tə wa kuu, n yɩ à yɩra tə wa nàŋʋ́.» Zwakɔbə yɩn Laban con, cànà nədʋ.Leya də Raswɛlə yoo
15 Kʋ kwa nə, Laban swɩ̀n Zwakɔbə con, ʋ wʋ́: «N yɩ à nakʋa bìú, yá də kʋ mɛ, à ba swə, sə n tʋn, n pa nə tʋtʋ. N dàń swɩ̀n kʋ tə, n nə wá jon à con, n bɩrɩ nə.» 16 Laban yà jə bwɩ̀ɩ́ bələ. Bʋ̀á nəkwɩa tə yɩrɩ nə yɩ Leya. Nəmaa tíú tə yɩrɩ ga nə yɩ Raswɛlə. 17 Leya yɩ́á yà ba na zəni. Yá Raswɛlə mʋ̀ yà ga ziən zənzən. 18 Yá Zwakɔbə yà yɩ Raswɛlə nə, ʋ swə. Ʋ dàń swɩ̀n, ʋ wʋ́: «À wá tʋn bɩna barpɛ, à pa mʋ́, sə n ga pa nə Raswɛlə, n bʋ̀á nəmaa tə, sə à ma fwa à kan. 19 Laban sɛ̀ kʋ nətʋ tə. Ʋ swɩ̀n, ʋ wʋ́: «À swə zəni, sə à pa wá n mʋ̀ nə, à doni, à nə wá pa wá, bɛɛ don nə. Jə̀ń à con!» 20 Kʋ zɩgɩ nətʋ, Zwakɔbə ma tʋn bɩna barpɛ, ʋ pa Laban nə, sə ʋ ma wànɩ́, ʋ swe Raswɛlə. Bɩna barpɛ tə yɩn ndə dɩan bagalɩ nə, Zwakɔbə con, ʋ yà nə swə Raswɛlə zənzən tə yɩrɩ. 21 Kʋ kwa nə, Zwakɔbə swɩ̀n Laban con, ʋ wʋ́: «N dàń pa nə à kan tə. Cɩ́gá, bɩna tə, à nə mɛ, sə à tʋn, à pa mʋ́ tə, nii cé. Sɩ́ʋ́n nə, à dàń pɩ̀à, sə à də wá yà duən nə. 22 Laban pɩn ba fwa furu wodiu, ʋ bon bwálɩ́ tə lɩ̀à tə mama, ʋ kun duən nə, ʋ pa ba də́ cànà. 23 Yá kʋ tɩtɩn nə, Laban jɩn ʋ bʋ̀á Leya, ʋ ja zʋ, ʋ pa Zwakɔbə nə. Yá Zwakɔbə dàń pə̀ń də wá. 24 Laban pɩn tʋtʋnbʋa Leya nə, ʋ yɩrɩ nə yɩ Ziləpa. 25 Yá máŋá tə, tɩa nə pʋrɩ, Zwakɔbə nɩ də, kʋ yɩ Leya nə, Laban pɩn wá, kʋ tà Raswɛlə. Ʋ dàń caga Laban nii nə, ʋ wʋ́: «Bɛ̀ɛ̀ yoo nə, n tʋn à yɩra nətən? Kʋ tà Raswɛlə yɩrɩ nə, à tʋn, à pa mʋ́, naaa? Kʋ yɩ nətə, n ma gɩgɩrɩ nə?» 26 Laban le wá, ʋ wʋ́: «Kʋ nətʋ tə ba nə mʋ̀ con tʋŋa. Nyánʋ́ ba zʋnʋ yáá də́, ʋ swe. 27 Ya də Leya, sə furu tə dapanɩ tə zwɛ̀. Kʋ kwa nə, nə wá pa mʋ́ Raswɛlə də. Yá n dàń tə nə wá tʋn bɩna barpɛ duən, n pa nə, ʋ də yɩrɩ. 28 Zwakɔbə sɛ̀, ʋ ya də Leya, furu tə dapanɩ tə zwɛ̀. Kʋ kwa nə, Laban dàń pɩn wá Raswɛlə də, sə ʋ ma fwa ʋ kan. 29 Laban pɩn tʋtʋnbʋa Raswɛlə nə, ʋ yɩrɩ nə yɩ Bila. 30 Zwakɔbə dàń tì Raswɛlə də, ʋ ma fwa ʋ kan. Ʋ yà swə Raswɛlə zənzən, ʋ doni Leya. Yá ʋ dàń kʋ́ʋ̀ pìí, ʋ tʋn bɩna barpɛ duən, ʋ pa Laban nə.
Zwakɔbə bɩ̀á tə
31 Ba-Yígúrə́-Jə-Tiu nɩ də, Zwakɔbə swə Raswɛlə, ʋ doni Leya. Ʋ dàń pɩn lɩra Leya nə, yá Raswɛlə mʋ̀ ga yɩ kadɩŋʋ. 32 Leya jɩn pùə́, ʋ lɩrɩ ʋ cárɩ́ bìú. Ʋ dɩga ʋ yɩrɩ, Ribɛn. Ʋ pɩ̀à, sə ʋ twá kʋ nətʋ nə, ʋ ma swɩ̀n, ʋ wʋ́: «Ba-Yígúrə́-Jə-Tiu nɩ nətʋ tə, ba nə mun nə. Yá sɩ́ʋ́n nə, à barɩ tə dàń wá sóní nə.» 33 Leya kʋ́ʋ̀ pìí, ʋ ja pùə́, ʋ lɩrɩ bìú don. Ʋ swɩ̀n ʋ wʋ́: «Ba-Yígúrə́-Jə-Tiu lwarɩ də, ba ba nə swə. Yá ʋ dàń pɩn nə bìú wà tə də.» Ʋ dɩga bìú tə yɩrɩ, Simeyon. 34 Leya tə pìí, ʋ ja pùə́, ʋ lɩrɩ bìú don. Ʋ swɩ̀n, ʋ wʋ́: «Naa ka tə mʋ̀ nə, à barɩ tə dàń wá vwa ʋ tɩ̀àn, à yɩra, à nə lɩrɩ bɩ̀á batwa, à pa wá, tə yɩrɩ.» Kʋ mʋ̀ nə pɩn, ba dɩ ʋ yɩrɩ, Levi. 35 Leya tə pìí, ʋ ja pùə́, ʋ lɩrɩ bìú don. Ʋ swɩ̀n, ʋ wʋ́: «Naa ka tə nə, à dàń wá bʋ Ba-Yígúrə́-Jə-Tiu nə. Kʋ mʋ̀ nə pɩn, ʋ dɩ ʋ yɩrɩ, Zwida. Kʋ kwa nə, ʋ kʋ̀rɩ́, ʋ kʋ́ʋ̀ ba lʋrɩ.