28
1 Yɩzakə bon Zwakɔbə, ʋ lòrì Yɩɩ, sə ʋ fwa zəni ʋ yɩra, ʋ ga pa wá nii kʋ tə, ʋ wʋ́: «N mʋ̀ dàn ká swe Kanaan tɩ̀án bʋ̀á. 2 Zàn n va Padan-Aramə, n nɩbɛɛ Betuwɛlə dìə̀ tə wa, n swe kan lá nə, n nɩbarɩ Laban bwɩ̀ɩ́ tə wa. 3 Yɩɩ tə, ʋ nə wulə tə mɛ yuu wa, wá fwa zəni n yɩra. Ʋ wá pa, n lɩrɩ bɩ̀á kapʋpʋ, ʋ ga pa, n dwíí pùlì, kʋ jì dwíə́ kapʋpʋ. 4 Yɩɩ wá fwa zəni n də n dwíí tə yɩra, ndə ʋ nə fwa zəni Abərahamə yɩra nətʋ. Ʋ wá pa, n tɩnɩ lʋʋ nii tə, n nə twá n jə̀ə́ kʋ wa. Lʋʋ nii təntə yɩ, Yɩɩ pɩn kʋ n nɩbɛɛ Abərahamə nə. 5 Yɩzakə dàń lɩ Zwakɔbə, ʋ pa ʋ va Laban con, Padan-Aramə nə. Laban yɩ Zwakɔbə də Ezayu nuu Rebɛka, nabʋa. Ʋ nyɩna nə yɩ Betuwɛlə, ʋ nə yɩ Aramə tíú. 6 Ezayu nì də Yɩzakə lòrì Yɩɩ, sə ʋ fwa zəni Zwakɔbə yɩra, ʋ ga tʋn wá Padan-Aramə nə, sə ʋ va ʋ swe kan lá. Yá máŋá tə, ʋ nə wulə ʋ lòrì Yɩɩ, sə ʋ fwa zəni ʋ yɩra, ʋ pɩn wá nii kʋ tə, ʋ wʋ́: «N mʋ̀ dàn ká swe Kanaan tɩ̀án bʋ̀á!» 7 Yá Zwakɔbə zìlí ba nyɩna tə də ba nuu tə nii, ʋ ga nan, ʋ va Padan-Aramə. 8 Ezayu dàń twá kʋ nətʋ tə nə, ʋ ma lwarɩ, də ʋ nyɩna tə ba Kanaan tɩ̀án bwɩ̀í tə swə. 9 Ezayu dàń vəli Yɩsəmayɛlə con. Ʋ swe Abərahamə bìú Yɩsəmayɛlə bʋ̀á, ʋ yɩrɩ nə yɩ Mahalatə, ʋ súrí ʋ kana tə duən tə nə. Mahalatə nabʋa yɩrɩ nə, Nebayɔtə.Zwakɔbə pandwɩa tə yoo
10 Zwakɔbə nan Bɛrəsweba ʋ va Aran. 11 Ʋ vəli ʋ yí bwálɩ́ don də yɩɩ zʋa. Yá ʋ dàń jʋa kʋ bwálɩ́ təntə wa. Ʋ tì kapan kapana tə wa, tə yà nə wulə lá, ʋ ma yeri ʋ yuu, ʋ ga mɛ lá, ʋ tígə́, ʋ dwɛ̀. 12 Ʋ dwɛ̀ pandwɩa, ʋ na nacanɩ, kʋ də̀ń nə cwɛn tɩa, kʋ yuu ga dɩ̀ kʋ dwen yɩɩ nə. Yá Yɩɩ malɩkɛ dàń ga twá kʋ nə, tə dɩ, də tə cwí. 13 Yá Ba-Yígúrə́-Jə-Tiu dàń yà wulə nacanɩ tə yuu con. Ʋ swɩ̀n Zwakɔbə con, pandwɩa tə wa, ʋ wʋ́: «À mʋ̀ nə yɩ Ba-Yígúrə́-Jə-Tiu. À yɩ n nɩbɛɛ Abərahamə, də n nyɩna Yɩzakə Yɩɩ. À wá pa tɩa tə, n nə tígə́ ka yuu, n mʋ̀ də n dwíí tə nə, n nə wá kə lʋʋ wa. 14 À wá pa n dwíí tə, n nə wá kə lʋʋ wa, pùlì, ndə tɩa yuu pùrú nə. Lìù mama bá wànɩ́ n dwíí tə, ʋ gàlà, ndə lìù nə wàrɩ̀ tɩa yuu pùrú tə, ʋ gàlɩ̀ nətʋ. N dwíí tə wá pùlì, kʋ va yɩɩ yizʋa də yɩɩ yipɩan con, də jɩgwiə saparʋ də jɩzən saparʋ con. À wá fwa zəni tɩa yuu dwíə́ tə mama yɩra, n mʋ́ də n dwíí tə yɩrɩ. 15 Nə̀ń, à tətə wulə də mʋ́, máŋá mama, wuuu. À wá ywàń n yuu, bwálɩ́ tə mama nə, n nə wá va, à ga wá pìí, à ja mʋ́, à bà lʋʋ nii təntə wa. Cɩ́gá, à bá yá mʋ́ mama. À wá tʋn kʋ tə, à nə swɩ̀n n con tə, à pa kʋ nii sú.» 16 Zwakɔbə zàn ʋ dwiən tə nə, ʋ ga swɩ̀n ʋ waa con, ʋ wʋ́: «Cɩ́gá mama, Ba-Yígúrə́-Jə-Tiu wulə bwálɩ́ kʋ tə wa, yá à mʋ̀ yà ga yəri kʋ!» 17 Fən jɩn wá, ʋ ga swɩ̀n ʋ waa con, ʋ wʋ́: «Bwálɩ́ kʋ tə yoo cà zənzən tamʋ! Kʋ ba tʋ́tʋ̀ná mama jə! Bwálɩ́ kʋ tə yɩ Yɩɩ dìə̀! Kʋ yɩ Yɩɩ sàń mimii!» 18 Zwakɔbə zàn jɩjʋ fuən fuən, ʋ zɩ̀n kapan tə, ʋ nə ma yeri ʋ yuu tə, ʋ zɩgɩ yɩɩ nə, ʋ lwá nʋga kʋ yuu wa, ʋ pa Yɩɩ nə. 19 Ʋ dɩga bwálɩ́ təntə yɩrɩ Betɛlə. Kʋ də̀ń nə yɩ “Yɩɩ Dìə̀.” Yá fuən nə, bwálɩ́ təntə yɩrɩ yà nə yɩ Luzə. 20 Zwakɔbə poli nii, ʋ wʋ́: «Ba-Yígúrə́-Jə-Tiu, də n nə yɩn də nə, n ga ywàń à yuu cwəŋə tə wa, à nə vəli, n nə pɩn nə à nii wadiu, n ga pa nə à yɩra gànàn, 21 n nə pɩn, à pìí, à bà à nyɩna dìə̀ tə wa, də yazurə, n mʋ̀ Ba-Yígúrə́-Jə-Tiu dàń wá yà à tíú Yɩɩ. 22 Yá kapan kʋ tə, à nə cwɛn tɩa, à pa mʋ́ nətən, dàń wá ya Yɩɩ dìə̀. Wiən tə mama, n nə wá pa nə, à wá pa mʋ́ tə fugə nii nyiən.