Lʋʋ Dəkuu 27

Zwakɔbə jon zəni tə ʋ nyɩna Yɩzakə yà nə pɩ̀à sə ʋ fwa Ezayu yɩra

1 Yɩzakə dàń yà kwɩn zənzən, ʋ jì bazʋnʋ. Ʋ yɩ́á tətə yà kʋ́ʋ̀ ba na. Dɩɩn don nə, ʋ dàń bon ʋ bikwɩa Ezayu, ʋ swɩ̀n ʋ con, ʋ wʋ́: «À bìú!» Ezayu ma le, ʋ wʋ́: «Nə̀ń nə!» 2 Yɩzakə ma kʋ́ʋ̀ swɩ̀n, ʋ wʋ́: «N na də, à jìgə̀ bazʋnʋ. À yəri à tɩan dɩɩn. 3 Sɩ́ʋ́n nə, n dàń zàn, n tì n cwan, n va gaʋ, n gʋ nàŋʋ́, n ja bà. 4 N wá sàn kʋ, n pa kʋ diŋə ja fɩra, n pa nə, sə à də́. Yá kʋ kwa nə, à tətə dàń wá lòrì Yɩɩ, sə ʋ fwa zəni n yɩra, də à tə wà tɩ.» 5 Rebɛka yà cʋga sʋgʋ tə, Yɩzakə yà nə wulə ʋ swɩ̀n, ʋ bìú Ezayu con. Yá máŋá tə, Ezayu nə zə́n ʋ nan, ʋ va gaʋ, sə ʋ pɩ̀à nàŋʋ́ tə, ʋ ja bà, 6 Rebɛka swɩ̀n ʋ bìú Zwakɔbə con, ʋ wʋ́: «Nə̀ń, à nì də á nyɩna wulə ʋ swɩ̀n n zʋnʋ Ezayu con, ʋ wʋ́ 7 ʋ zàn ʋ va gaʋ, ʋ gʋ nàŋʋ́, ʋ ja bà, ʋ sàn, ʋ pa kʋ diŋə ja fɩra, ʋ pa wa, sə ʋ də́. Yá kʋ kwa nə, ʋ dàń wá va Ba-Yígúrə́-Jə-Tiu yáá con, ʋ lòrì wá, sə Ba-Yígúrə́-Jə-Tiu fwa zəni ʋ yɩra, də ʋ tə wà tɩ. 8 Kʋ mʋ̀ yɩrɩ, sɩ́ʋ́n nə, à bìú, n dàń cʋgʋ à sʋgʋ zəni, sə n ga tʋn kʋ tə, à nə wá bɩrɩ mʋ́. 9 Vəli najɩrɩ tə wa, n ja bʋ̀bii bələ, tə yɩra nə zurə, n gʋ, n ja bà, n pa nə. À wá sàn nàŋʋ́ tə, à pa kʋ diŋə ja fɩra, kʋ pa n nyɩna tə nə. 10 N dàń wá tì nàŋʋ́ təntə, n ja zʋ, n pa wá, sə ʋ də́. Yá kʋ nətʋ tə dàń wá pa, ʋ lòrì Yɩɩ, sə ʋ fwa zəni n yɩra, də ʋ tə wá tɩ.» 11 Zwakɔbə le ʋ nuu Rebɛka, ʋ wʋ́: «À nì! N dàń nə yə̀ə́ də, à zʋnʋ Ezayu yɩra jə kʋran, yá à mʋ̀ yɩra ga ba kʋran jə. 12 Dɩɩn don, à nyɩna tə wàá à yɩra, ʋ tànɩ́. Yá ʋ nə lwarɩ də kʋ yɩ à mʋ̀, à wá jì gɩgɩrɩnyiən, ʋ yáá con. Kʋ nətʋ tə dàń wá pa, ʋ zɩrɩ ʋ kə à nə. Ʋ kʋ́ʋ̀ bá sɛ̀, ʋ lòrì Yɩɩ, sə ʋ fwa zəni à yɩra.» 13 Zwakɔbə nuu tə ma swɩ̀n ʋ con, ʋ wʋ́: «Kʋ mʋ̀ tà yoo. Də n nyɩna tə nə zɩrɩ ʋ kə n nə, sə ʋ zɩra tə pìí tə ja à tətə. N dàń ya twá kʋ tə nii nə, à nə swɩ̀n n con. vəli n gʋ bʋ̀bii tə, n ja bà, n pa nə.» 14 Zwakɔbə vəli ʋ gʋ bʋ̀bii tə, ʋ ja bà, ʋ pa ʋ nuu Rebɛka nə. Ʋ jon tə, ʋ sàn, ʋ pa nàŋʋ́ tə diŋə jə fɩra, kʋ pa Yɩzakə nə. 15 Kʋ kwa nə, Rebɛka tì ʋ bikwɩa Ezayu gànàn tə wa ganzəŋə, tə nə wulə ʋ con, dìə̀ wa, ʋ pa ʋ bìú nəmaa Zwakɔbə nə, ʋ zʋ. 16 Ʋ goŋi bʋ̀bii tə tanan, ʋ ma baa Zwakɔbə vànà nə, ʋ ga baa kʋ don də, ʋ bɩan nə, kʋ bwálɩ́ tə yà nə yɩ səsolu. 17 Kʋ kwa nə, ʋ tì nàŋʋ́ tə, ʋ nə sàn, ʋ pa kʋ diŋə jə fɩra, də dipɛn, ʋ nə fwa, ʋ kə ʋ bìú Zwakɔbə jɩɩn wa. 18 Zwakɔbə dàń jɩn wodiu tə, ʋ va ʋ nyɩna tə con, ʋ ga swɩ̀n, ʋ wʋ́: «Baba!» Yɩzakə sɛ̀, ʋ wʋ́: «Nə̀ń nə! N mʋ̀ nə yɩ à bìú wà tətə?» 19 Zwakɔbə le ʋ nyɩna tə, ʋ wʋ́: «Kʋ yɩ à mʋ̀, n bikwɩa Ezayu. À fwa kʋ tə, n nə swɩ̀n à con. À dàń lòrì mʋ́, sə n zàn, n jə̀ń yɩɩ nə, n də́ nàŋʋ́ tə. Kʋ kwa nə, n tətə dàń wá lòrì Yɩɩ, sə ʋ fwa zəni à yɩra.» 20 Yɩzakə bwe ʋ bìú tə, ʋ wʋ́: «Nətə nə n fwa, n ma na nàŋʋ́ lala nətən, à bìú?» Zwakɔbə le, ʋ wʋ́: «Kʋ yɩ Ba-Yígúrə́-Jə-Tiu, ʋ nə yɩ n Yɩɩ, nə pɩn nàŋʋ́ tə bà, à con.» 21 Yɩzakə ma swɩ̀n Zwakɔbə con, ʋ wʋ́: «Mə nə bà, n yí à yɩra, à bìú. À pɩ̀à, sə à lɛ̀ n yɩra, à jə́n, n cɩ́gá yɩ à bìú Ezayu, nə à yə̀ə́, kʋ yɩ lìù don.» 22 Zwakɔbə ma va, ʋ yí ʋ nyɩna Yɩzakə yɩra. Yɩzakə lɛ̀ ʋ yɩra, ʋ ga swɩ̀n, ʋ wʋ́: «Kori tə yɩ Zwakɔbə kori, yá vànà tə mʋ̀ yɩ Ezayu vànà.» 23 Yɩzakə wà lwarɩ, də kʋ yɩ Zwakɔbə. Ʋ də vànà tə yà jə kʋran, ndə ʋ zʋnʋ Ezayu vànà nə. Kʋ dàń pɩn Yɩzakə sɛ̀, sə ʋ lòrì Yɩɩ, sə ʋ fwa zəni ʋ yɩra. 24 Yá ʋ kʋ́ʋ̀ pìí, ʋ bwe wá, ʋ wʋ́: «N mʋ̀ cɩ́gá nə yɩ à bìú Ezayu?» Zwakɔbə le, ʋ wʋ́: «Awo! À mʋ̀ nə.» 25 Yɩzakə ma swɩ̀n, ʋ wʋ́: «Tún n nàŋʋ́ tə, à yáá, sə à də́, à bìú. Yá à tətə dàń wá lòrì Yɩɩ, sə ʋ fwa zəni n yɩra.» Zwakɔbə tʋn nàŋʋ́ tə Yɩzakə yáá, ʋ pa wá, sə ʋ də́. Yɩzakə dí nàŋʋ́ tə, Zwakɔbə ga ja divɛn də, ʋ bà, ʋ pa wá, ʋ nyʋn. 26 Ʋ nyɩna Yɩzakə dàń ma swɩ̀n ʋ con, ʋ wʋ́: «À bìú, bà n yí à yɩra, n pùrì nə, n kə n nyʋnɩ nə.» 27 Zwakɔbə ma yí ʋ yɩra, ʋ pùrì wá, ʋ kə ʋ nyʋnɩ nə. Yɩzakə nì ʋ gànàn tə lwán, ʋ ga swɩ̀n sʋ̀ràn tə tə, ʋ ma lòrì Yɩɩ, sə ʋ fwa zəni ʋ yɩra, ʋ wʋ́: «Cɩ́gá mama, à bìú tə lwán yɩ ndə kárá nə, Ba-Yígúrə́-Jə-Tiu nə fwa zəni ka yɩra. 28 À lòrì Yɩɩ, sə ʋ pa mʋ́ lanworu dwà, də tɩa ka wiən nə bɩ zəni. Ʋ wá pa mʋ́ mɩna, də divɛn nədʋn, tə bʋ́rɩ́ mʋ́! 29 Yɩɩ wá pa dwíə́ duən jì n ywə́ŋə́. Ʋ wá pa lʋʋ dwíə́ tə duən tʋ ba nadwana yuu, n yáá con, ba pa mʋ́ dun. N wá ya n nubɩa tə yuu tíú, yá ba wá tʋ ba nadwana yuu, n yáá con, ba pa mʋ́ dun. Yɩɩ wá yàlà lìù tə, ʋ nə zɩrɩ ʋ kəni n nə. Yá Yɩɩ wá fwa zəni lìù tə yɩra, ʋ nə lòrì, sə Yɩɩ fwa zəni n yɩra. 30 Yɩzakə nə lòrì Yɩɩ, sə ʋ fwa zəni Zwakɔbə yɩra, ʋ zwɛ̀, Zwakɔbə zàn ʋ nan, ʋ yá wá. Kʋ máŋá tə wa, də nə̀ń ʋ zʋnʋ Ezayu də nə, ʋ pìí ʋ nan gaʋ tə, ʋ bà. 31 Ʋ də sàn nàŋʋ́, ʋ pa kʋ diŋə jə fɩra, ʋ ja zʋ, sə ʋ pa ʋ nyɩna tə nə. Ʋ swɩ̀n ʋ nyɩna tə con, ʋ wʋ́: «Baba, zàn n də́ nàŋʋ́ tə, à nə sàn. Kʋ kwa nə, n tətə dàń wá lòrì Yɩɩ, sə ʋ fwa zəni à yɩra.» 32 Ʋ nyɩna Yɩzakə ma bwe wá, ʋ wʋ́: «N mʋ̀ nə yɩ wàà?» Ʋ le, ʋ wʋ́: «Kʋ yɩ à mʋ̀ Ezayu, n bikwɩa tə.» 33 Kʋ pɩn Yɩzakə bɩcan zàn zənzən, ʋ ga vɩvaga. ʋ swɩ̀n, ʋ wʋ́: «Wàà nə dí yáá, ʋ gʋ nàŋʋ́ tə, ʋ ja bà, ʋ sàn, ʋ pa nə tə? Lìù don dí yáá, ʋ pa nə wodirən yiri mama, à də́, də n tə wà twi. Yá à dàń lòrì Yɩɩ, sə ʋ fwa zəni kʋ tíú yɩra. Yá Yɩɩ cɩ́gá wá fwa zəni ʋ yɩra.» 34 Máŋá tə, Ezayu nə nì ʋ nyɩna tə sʋ̀ràn təntə, pucʋnɩ nəfarʋ zʋa wá, ʋ ga dɩlɩ bubwiə tantan. Ʋ swɩ̀n ʋ nyɩna tə con, ʋ wʋ́: «Baba, à də pɩ̀à, sə n lòrì Yɩɩ, sə ʋ fwa zəni à də yɩra.» 35 Yɩzakə le, ʋ wʋ́: «N nyánʋ́ tə dí yáá, ʋ bà, ʋ tʋn swɩan à yɩra, ʋ ma jon zəni tə, à yà nə wá lòrì Yɩɩ, sə ʋ fwa n yɩra.» 36 Ezayu swɩ̀n, ʋ wʋ́: «Ʋ yɩrɩ Zwakɔbə tə cɩ́gá sɛ̀ wá. Ʋ cɩ́gá yɩ gɩgɩrɩnyiən. Ʋ nɛɛ bələ nə, ʋ nə gɩgɩrɩ nə. Ʋ di yáá, ʋ jon bikwɩa tori tə à con. Yá sɩ́ʋ́n nə, ʋ kʋ́ʋ̀ jon zəni tə də, n yà nə wá lòrì Yɩɩ, sə ʋ fwa à yɩra.» Ʋ swɩ̀n ʋ súrí lá, ʋ wʋ́: «Zəni yiri don mama wà gɛ, n nə wàá Yɩɩ n lòrì, sə ʋ fwa à də yɩra naaa?» 37 Yɩzakə le Ezayu ʋ wʋ́: «Cʋgʋ zəni! À lòrì Yɩɩ, sə ʋ pa, Zwakɔbə ya n yuu tíú. À lòrì Yɩɩ, sə ʋ pa, Zwakɔbə nubɩa tə mama ya, ʋ mʋ̀ Zwakɔbə tʋtʋnbɩa. À ga lòrì Yɩɩ, sə ʋ pa wá mɩna, də divɛn nədʋn. Bɛ̀ɛ̀ nə à dàń kʋ́ʋ̀ wàá, à fwa, à pɩn mʋ́, à bìú?» 38 Ezayu tə swɩ̀n ʋ nyɩna tə con, ʋ wʋ́: «Baba, mə kʋ cɩcɩ nə yɩ zəni, n nə jə, sə n lòrì Yɩɩ, sə ʋ fwa naaa? Baba, à pɩ̀à, sə n lòrì Yɩɩ, sə ʋ fwa zəni à də yɩra.» Ezayu swɩ̀n nətʋ, ʋ ga lwá kori, ʋ wulə ʋ kwi. 39 Ʋ nyɩna tə le wá, ʋ wʋ́: «Cʋgʋ zəni! N wá kwɩ̀n tɩa nə, ka wiən nə bɩ zəni. N ga wá kwɩ̀n lanworu dwà tə də nə. 40 Kʋ wá twá də lagʋrɩ, n ma na n nii wodiu lʋʋ wa. N ga wá ya n nyánʋ́ tə tʋtʋnbiu. Yá n dàń nə vɩga, sə n sɛ̀ ʋ nii, n wá jon n tɩ̀àn ʋ jɩɩn wa, n də́ n yuu.»

Zwakɔbə nə dəri tə yoo

41 Ezayu dàń tì dʋŋɩ də ʋ nyánʋ́ Zwakɔbə, ʋ nə fwa swɩan, ʋ pa ba nyɩna tə lòrì Yɩɩ, sə ʋ fwa zəni ʋ yɩra tə yɩrɩ. Ezayu yà swɩ̀n ʋ waa con, ʋ wʋ́: «À nyɩna tə tɩan bwələ. Yá nə dàń nə fwa ʋ lúə́ nə zwɛ̀, à wá gʋ à nyánʋ́ Zwakɔbə.» 42 Máŋá tə, Rebɛka nə twi, ʋ lwarɩ ʋ bikwɩa Ezayu pubʋŋa tə, ʋ pɩn ba bon Zwakɔbə, ʋ bìú nəmaa tə, ʋ ga swɩ̀n ʋ con, ʋ wʋ́: «Cʋgʋ zəni! N zʋnʋ Ezayu pɩ̀à, sə ʋ gʋ mʋ́, ʋ ma fwi ʋ lɩŋa. 43 Kʋ mʋ̀ yɩrɩ, Sɩ́ʋ́n nə, à bìú, n dàń cʋgʋ à sʋgʋ zəni! Nan lala, n dəri n va, n kwálɩ́ n yuu à nabʋa Laban con, Haran nə. 44 Vəli n ya ʋ con, kʋ ja vələ máŋá tə, n zʋnʋ tə lɩŋa nə wá tʋ. 45 Máŋá tə, n zʋnʋ tə lɩŋa nə tʋa, ʋ ga swɛ̀ɛ́ kʋ tə, n nə fwa ʋ yɩra, à dàń wá tʋn, à kə n nə, sə n pìí n bà. À ba swə, sə à kwɩ̀n á mɛ bələ nə, dɩɩn nədʋ. 46 Rebɛka swɩ̀n Yɩzakə con, ʋ wʋ́: «Ɛtə dwíí bwɩɩ tə pɩn, à waa nan lʋʋ. Zwakɔbə də nə kʋ́ʋ̀ swe lʋʋ nii kʋ tə bʋ̀á, ʋ nə yɩ Ititə, ndə Ezayu kana tə nə, à lʋʋ wúlú kʋ́ʋ̀ bá ja də̀ń mɩ́ámɩ́án.