Yɩzakə vəli Filisi lʋʋ nii wa
26
1 Niən kʋ́ʋ̀ twi tə zʋ lʋʋ nii təntə wa. Kʋ tà niən tə, tə nə dí yáá tə ya lá, Abərahamə máŋá tə wa. Niən təntə dàń pɩn Yɩzakə zàn, ʋ va ʋ jə̀ə́ Filisi tɩʋ tə wa, ba nə boŋə Gerarə. Abimelɛkə yà nə yɩ Gerarə pɩ̀ʋ́. 2 Ba-Yígúrə́-Jə-Tiu yà nan Yɩzakə nə, ʋ ga swɩ̀n ʋ con, ʋ wʋ́: «Dàn ká va Ezwipətə. À wá bɩrɩ mʋ́ lʋʋ nii, sə n va jə̀ń lá. 3 Jə̀ń kʋ lʋʋ nii təntə wa. À wá ya də mʋ́, à ga wá fwa zəni n yɩra. Cɩ́gá, à wá pa tə lʋʋ níə́ təntə, n mʋ̀ də n dwíí tə nə. À wá pa à durə tə à nə dùə̀, à ma kàn nii də n nyɩna Abərahamə, nii sú. 4 À wá pa n dwíí pùlì, ndə kacɩlacɛɛ tə nə, lanworu tə wa. À wá pa lʋʋ níə́ tə tə mama n dwíí tə nə. Kʋ wá twá də zəni tə, à nə fwa n dwíí tə yɩra, dwíə́ tə mama lʋʋ wa, ma lòrì nə, sə à fwa zəni ba də yɩra, ndə n dwíí tə nə, 5 Abərahamə nə cʋgʋ à kori yɩrɩ. Ʋ zìlí à nii. Ʋ sɛ̀ à coŋi tə. Ʋ twá tə tə nə, à nə pʋ́pʋ́nɩ́ à pa wá, ʋ ga sɛ̀ yìə̀n tə, à nə pɩn wá nii, tə yuu wa.» 6 Mə kʋ zɩgɩ nətʋ Yɩzakə ma jə̀ń Gerarə nə.7 Ʋ kan Rebɛka yà ziən zənzən. Yá Gerarə tɩ̀án nɩ wá, ba bwe ʋ nɛɛ nə, Yɩzakə con. Yá Yɩzakə dàń swɩ̀n, də kʋ yɩ ʋ nakʋa. Fən yà jə wá, sə ʋ swɩ̀n də Rebɛka yɩ ʋ kan. Ʋ yà bʋŋa də ʋ nə swɩ̀n, də kʋ yɩ ʋ kan, ba wá gʋ wá, ba ga jon Rebɛka. 8 Yɩzakə jə̀ń Gerarə nə ʋ dánɩ́. Dɩɩn don nə, Filisi pɩ̀ʋ́ Abimelɛkə twá ʋ təkurə, ʋ ywàń ʋ na Yɩzakə, də ʋ wulə ʋ kʋkwalɩ Rebɛka. 9 Abimelɛkə ma pa ba bon Yɩzakə, ʋ ga swɩ̀n ʋ con, ʋ wʋ́: «Rebɛka cɩ́gá yɩ n kan. Bɛ̀ɛ̀ nə pɩn, n ma swɩ̀n də, ʋ yɩ n nakʋa?» Yɩzakə le wá, ʋ wʋ́: «À yà bʋŋa də, à nə swɩ̀n də ʋ yɩ à kan, ba wá gʋ nə, ba ga jon wá.» 10 Abimelɛkə swɩ̀n ʋ con, ʋ wʋ́: «Bɛ̀ɛ̀ yoo nə, n tʋn nə yɩra nətən? N kʋ̀nkʋ̀n tə yà wá pa à lʋʋ lɩ̀à tə lìù don pə̀ń n kan tə. Yá kʋ ga yɩ n mʋ̀ nə yigu nəba, n kə yolwan təntə wa.» 11 Abimelɛkə dàń dùə̀ súú ʋ lʋʋ lɩ̀à tə mama nii nə, ʋ swɩ̀n, ʋ wʋ́: «Lìù tə mama ʋ nə dwen bɛɛ wà tə, nə à yə̀ə́ ʋ kan tə yɩra, à wá pa ba gʋ kʋ tíú.»
Yɩzakə də Abimelɛkə tún nimarʋ
12 Kʋ bɩnɩ təntə nə, Yɩzakə vàrɩ̀ kárá kʋ lʋʋ nii tə wa. Ʋ kárá tə mɩna bɩga zənzən, kʋ pa ʋ na kʋ tə ʋ nə dùə̀, nɛɛ bíí. Cɩ́gá, Ba-Yígúrə́-Jə-Tiu yà fwa zəni ʋ yɩra. 13 Yɩzakə jìgə̀ jɩjə tíú. Ʋ jɩjə tə pùlì ka súrí lá, wuuu, ʋ dàń bà ʋ yɩ jɩjə tíú nəfarʋ. 14 Ʋ yà jə vanmɩnɩ, də vanfaran, də tʋtʋnbɩa zənzən. Kʋ nətʋ dàń pɩn, Yɩzakə wʋgwɩʋ jə Filisi tɩ̀án tə. 15 Ba pɛ̀ tɩran, ba ma sun vɩla tə mama, ʋ nyɩna Abərahamə tʋtʋnbɩa tə yà nə kʋa, də Abərahamə tə wulə lʋʋ. 16 Abimelɛkə dàń swɩ̀n Yɩzakə con, ʋ wʋ́: «À na də, n jìgə̀ dɩ̀àn tíú zənzən, n doni nəba. Kʋ mʋ̀ yɩrɩ, zàn nə tɩʋ tə wa, n vìí.» 17 Yɩzakə ma zàn Gerarə tɩʋ tə wa, ʋ va ʋ pú ʋ sìlə́ Gerarə vara tə nii nə, ʋ jə̀ə́ lá. 18 Yɩzakə pɩn, ba pìí ba kòrí vɩla tə, ba yà nə kʋa, ʋ nyɩna Abərahamə máŋá wa. Tə mʋ̀ vɩla təntə nə, Filisi tɩ̀án tə yà swɩn, Abərahamə tɩan kwa nə. Yɩra tə tətə, ʋ nyɩna Abərahamə yà nə boŋə tə, nə ʋ pìí ʋ dɩ vɩla tə nə. 19 Dɩɩn don nə, Yɩzakə tʋtʋnbɩa tə kʋ́ʋ̀ kʋa vɩlɩ vara tə wa, ba pórí nabuliyii nə, kʋ nə ba zwɛ̀. 20 Gerarə tɩ̀án nayɩra dɩga jara də Yɩzakə nayɩra tə, vɩlɩ tə yɩrɩ. Gerarə tɩ̀án nayɩra tə swɩ̀n, ba wʋ́: «Nɩ́á tə yɩ nə mʋ̀ nə tɩ.» Yɩzakə dɩga vɩlɩ təntə yɩrɩ, Esɛkə,a ba nə dɩga jara tə də wá yɩrɩ. 21 Yɩzakə tʋtʋnbɩa tə kʋ́ʋ̀ kʋa vɩlɩ don. Yá Gerarə tɩ̀án kʋ́ʋ̀ dɩga jara də ba, vɩlɩ təntə də yɩrɩ. Yɩzakə dɩga vɩlɩ tə yɩrɩ, Sɩtəna.b 22 Yá ʋ dàń zàn bwálɩ́ təntə wa, ʋ va, ʋ kʋ̀ vɩlɩ don, ba nə kʋ́ʋ̀ wà jara dɩ kʋ yɩrɩ. Yɩzakə kʋ́ʋ̀ dɩga vɩlɩ təntə də yɩrɩ, Rehʋbɔtə.c Cɩ́gá, ʋ yà swɩ̀n də, Ba-Yígúrə́-Jə-Tiu dàń wàlɩ̀ bwálɩ́, ʋ pa nəba, sə nə nə jə̀ń lá. Yá nə yìə̀n dàń wá kwɛn, tə va yáá wuuu, lʋʋ nii kʋ tə wa.
23 Yɩzakə kʋ́ʋ̀ zɩgɩ lá, ʋ lɛ ʋ va Bɛrəsweba. 24 Ʋ nə yí Bɛrəsweba, kʋ tɩtɩn nə, Ba-Yígúrə́-Jə-Tiu nan ʋ nə, ʋ ga swɩ̀n ʋ con, ʋ wʋ́: «À yɩ n nyɩna Abərahamə Yɩɩ. Dàn ká pa fən ja mʋ́. Cɩ́gá, à wulə də mʋ́. À wá fwa zəni n yɩra, à ga wá pa n dwíí pùlì, à tʋtʋnʋ Abərahamə yɩrɩ.» 25 Kʋ tɩpʋrɩ nə, Yɩzakə lwə̀ Yɩɩ joŋi bwálɩ́ lá nə, ʋ ga bon ʋ kə Ba-Yígúrə́-Jə-Tiu nə. Ʋ púə́ ʋ gansili Bɛrəsweba nə, ʋ tʋtʋnbɩa tə ga kʋ vɩlɩ don də lá.
26 Dɩɩn don nə, Abimelɛkə, də ʋ dabɛɛ Ahʋzatə, də Pɩkɔlə, ʋ nə yɩ Abimelɛkə kwatara yuu tíú, nan Gerarə ba va Yɩzakə con. 27 Yɩzakə bwe ba, ʋ wʋ́: «Bɛ̀ɛ̀ nə, á pɩ̀à yəbə? Á dʋŋa nə, kʋ pa á dɩŋɩ nə, á lɩ á tɩʋ wa.» 28 Ba le ba wʋ́: «Nə nɩ də cɩ́gá mama, Ba-Yígúrə́-Jə-Tiu wulə də mʋ́. Kʋ mʋ́ nə pɩn, nə swə, sə nikanɩ yà nə də mʋ́ pwə́rə́ wa. Nə pɩ̀à, sə nə tún nimarʋ nə də mʋ́ pwə́rə́ wa. 29 Sə n tà kʋ nimarʋ təntə yɩrɩ, n dàn ká fwa yolwan mama nə yɩra, ndə nə də nə wà mʋ́ fɩfɩn nətʋ. Nə tʋn zəni cɩcɩ n yɩra, nə ga yá mʋ́, nə pa n vìí də bɩcan sìə́. Sɩ́ʋ́n nə, n yɩ lìù tə, Ba-Yígúrə́-Jə-Tiu nə fwa zəni n yɩra.» 30 Yɩzakə dàń pɩn, ba fwa wodiu nəzəŋu, ʋ pa ba, ba də́, ba ga nyʋn. 31 Ba jʋa Yɩzakə con, ba zàn jɩjʋ fuən fuən, ba də wá kàn nikana, ba pa duən nə. Kʋ kwa nə, ba lòrì cwəŋə, sə ba pìí ba vìí. Yá Yɩzakə dàń pɩn ba cwəŋə. Ba nan lá, ba pìí ba va Gerarə, də bɩcan sìə́. 32 Kʋ dɩɩn təntə tətə nə, Yɩzakə tʋtʋnbɩa twi ba swɩ̀n ʋ con, vɩlɩ tə, ba yà nə wulə ba kwɩ̀ tə yoo yuu wa, ba wʋ́: «Nə pórí nɩ́á nə!» 33 Yɩzakə dɩga vɩlɩ tə yɩrɩ, Swibeya. Kʋ mʋ́ nə pɩn, ba boŋə kʋ tɩʋ tə, Bɛrəsweba, də zə̀n mama.