Abərahamə tɩan yoo
25
1 Sara tɩan kwa nə, Abərahamə kʋ́ʋ̀ tì kan don, ʋ yɩrɩ nə yɩ Ketura. 2 Ketura də lɩrɩ bɩ̀á ʋ pa Abərahamə nə. Ba mʋ̀ nə yɩ Ziməran, də Yɔkəswan, də Medan, də Madɩan, də Yɩswəbakə, də Swuwa. 3 Yɔkəswan lɩrɩ Saba, də Dedan. Dedan yɩ Aswurə tɩ̀án, də Letuswimə dwíí tə, də Lewumimə dwíí tə nɩbɛɛ. 4 Madɩan bɩ̀á nə yɩ Efa, də Efɛrə, də Hanɔkə, də Abɩda, də Ɛləda. Ba mʋ̀ lɩ̀à təntə mama yɩ Ketura nɩ̀án. 5 Abərahamə pɩn won tə mama, ʋ yà nə tɩ, Yɩzakə nə. 6 Ʋ kana tə duən tə mʋ̀ bɩ̀á tə, yɩ zìlə́ wiən nə, ʋ pɩn ba. Ʋ pwɛ̀ ba də ʋ bìú Yɩzakə duən nə, də ʋ tə wà tɩ. Ʋ pɩn ba va yiŋʋnɩ, yɩɩ yipɩan con, yɩɩ yipɩan lʋʋ nii tə wa. 7 Abərahamə bɩna tə mama, ʋ nə fwa lʋʋ wa, yɩn bɩna bíí də sapwɩtwa də fugə də bonu, 8 yá ʋ ga zɩgɩ lá, ʋ tɩ. Abərahamə tɩga, də ʋ kwɩn zənzən. Ʋ dánɩ́ lʋʋ wa zənzən, ʋ ga də́ lʋʋ ywánɩ́ də. Ba gùrì wá, ʋ nɩbara ba con, ba nə dí yáá, ba tɩ. 9 Ʋ bɩ̀á Yɩzakə də Yɩsəmayɛlə, tì wá, ba gùrì paan bʋʋ tə wa, Makəpela nə, Efəron kárá tə wa, ka nə wulə Maməre yáá con. Efəron yà yɩ Sʋarə, ʋ nə yɩ Ititə, bìú. 10 Mə kárá təntə nə, Abərahamə jon ʋ yə̀ Ɛtə dwíí tə con. Mə paan bʋʋ təntə wa nə, ba gùrì Abərahamə, də ʋ kan Sara. 11 Abərahamə tɩan kwa nə, Yɩɩ fwa zəni ʋ bìú Yɩzakə yɩra. Yɩzakə yà lwə̀ ʋ sàń, lahayi-royi vɩlɩ tə nii nə.Yɩsəmayɛlə də ʋ dwíí yoo
12 Nə̀ń Abərahamə bìú Yɩsəmayɛlə dwíí tə dəkuu. Yɩsəmayɛlə yɩn Sara tʋtʋnbʋa Hagarə nə lɩrɩ, ʋ pa Abərahamə nə. Hagarə yà yɩ Ezwipətə tɩ̀án bʋ̀á. 13 Nə̀ń Yɩsəmayɛlə bɩ̀á tə, də ba dwíə́ tə yɩra, kʋ nə zɩgɩ ba nəkwɩa tíú, kʋ va kʋ yí ba nəmaa tíú. Nebayɔtə nə yɩ Yɩsəmayɛlə bikwɩa. Kʋ zɩgɩ lá, kʋ pa Kedarə, də Adəbeyɛlə, də Mibəsamə, 14 də Miswəma, də Duma, də Masa, 15 də Hadadə, də Tema, də Yeturə, də Nafiswə, də Kedəma. 16 Mə ba mʋ̀ nə yɩ Yɩsəmayɛlə bɩ̀á. Ba yɩn pàbɩ̀á fugə də bələ, ba lìù mama ga də́ pàrɩ̀ ʋ dwíí yuu wa. Ba lìù mama yɩrɩ jìgə̀ tɩʋ tə, ʋ nə jə̀ə́ kʋ wa, ʋ də́ pàrɩ̀ tə, yɩrɩ. 17 Yɩsəmayɛlə bɩna tə mama, ʋ nə fwa lʋʋ wa, yɩn bɩna bíí də fɩtwa də barpɛ. Yá ʋ tɩga, ba tì wá ba gùrì, ʋ nɩbara ba con, ba nə tɩga. 18 Kʋ nə zɩgɩ Havɩla kʋ va kʋ yí Swurə, Yɩsəmayɛlə dwíí tə nə jə̀ə́ nagwanaa təntə wa. Swurə yà wulə Ezwipətə yáá con, də n nə vələ Asiiri con. Yɩsəmayɛlə nyɩnabɩa tə mama vɩga wá, ba dʋgʋ, ʋ yɩ ʋ cɩcɩ.
YƖZAKƏ BIU ZWAKƆBƏ YOO
Yɩzakə də ʋ dwíí tə yoo
19 Nə̀ń Abərahamə bìú Yɩzakə dwíí tə dəkuu. Abərahamə lɩrɩ Yɩzakə. 20 Yɩzakə yà jə bɩna sapwɩlə, máŋá tə wa, ʋ nə swe Betuwɛlə bʋ̀á Rebɛka, ʋ nə yɩ Laban nakʋa. Betuwɛlə də Laban mɛ yɩ Aramə tɩ̀án, Aramə lʋʋ nii wa. 21 Yɩzakə kan Rebɛka yà yɩ kadɩŋʋ. Yɩzakə dàń ma lòrì Ba-Yígúrə́-Jə-Tiu, sə ʋ pa yuywaŋʋ Rebɛka nə, sə ʋ wànɩ́, ʋ lɩra bìú. Yá Ba-Yígúrə́-Jə-Tiu le ʋ yɩjʋnɩ tə. Ʋ pɩn Rebɛka ja yɩywɛ pùə́. 22 Bɩ̀á tə yà bwɩn duən, ʋ pùə́ tə wa, kʋ pa ʋ, bwe ʋ tɩ̀àn, ʋ wʋ́: «Bɛ̀ɛ̀ nə pɩn, yoo yiri kʋ tə tʋŋa à yɩra?» Rebɛka dàń tun kʋ nii Ba-Yígúrə́-Jə-Tiu con, ʋ yɩjʋnɩ wa, sə ʋ na won tə nə pɩn, kʋ yɩ nətʋ. 23 Yá Ba-Yígúrə́-Jə-Tiu dàń swɩ̀n ʋ con, ʋ wʋ́: «Bɩ̀á bələ nə wulə n pùə́ tə wa. Ba wá ya lʋʋ níə́ bələ nɩbara. Bɩ̀á bələ təntə n nə wá lɩra, bá wànɩ́ duən nə. Ba wá pwɛ̀ duən nə, ba jì dwíə́ bələ, tə nə ba duən yuu keni. Dwíə́ bələ təntə wa, dwíí don dɩ̀àn wá doni kʋ don. Yá nəkwɩa tíú tə dwíí wá jì, nəmaa tíú tə dwíí tʋtʋnbɩa.» 24 Rebɛka pùə́ tə lɩrɩ máŋá nə yí, ba nɩ də yɩywɛ cɩ́gá nə wulə, ʋ pùə́ tə wa. 25 Təntən bìú tə, ʋ nə nan vʋʋ nə, yɩra mama yà yɩ sɩsɩnʋ. Ʋ yɩra yà jə kʋran zənzən, ndə vàná kʋran ganzwɩʋ nə. Ba dɩga ʋ yɩrɩ, Ezayu. 26 Yá máŋá tə, zʋnʋ tə nɛɛ nə nan, ba nɩ də, nyánʋ́ tə jɩɩn jə Ezayu nakuri nə, ʋ twá ʋ naŋa. Ba dɩga ʋ yɩrɩ, Zwakɔbə.a Ba lɩrɩ Ezayu də Zwakɔbə, də ba nyɩna Yɩzakə jə bɩna sapwɩtwa. 27 Bisɩmabarɩ təntə twi, ba bori, ba jì bara. Ezayu jìgə̀ twanbɛɛ ʋ nə jə yii. Ʋ yà swə gajiru zənzən. Yá Zwakɔbə mʋ̀ yà yɩ lìù tə, ʋ nə yɩ bʋ̀àbʋ̀à, ʋ ga swə, sə ʋ ya sàń con. 28 Yɩzakə yà swə Ezayu, ʋ doni Zwakɔbə, ganaŋa tə yɩrɩ, Ezayu yà nə gwɩ, ʋ pɩn wá, ʋ də́. Yá Rebɛka mʋ̀ pìí ʋ swə Zwakɔbə, ʋ doni Ezayu. 29 Dɩɩn don nə, Ezayu nan gaʋ ʋ bà, də Zwakɔbə wulə ʋ fwa wodiu sɩsɩnʋ. Niən yà gwàrɩ̀ Ezayu zənzən. 30 Yá ʋ dàń swɩ̀n Zwakɔbə con, ʋ wʋ́: «Niən gwàrɩ̀ nə zənzən. À lòrì mʋ́, sə à twá à də́ n wodiu sɩsɩnʋ tə. Mə kʋ twá də kʋ wodiu sɩsɩnʋ təntə, ba ma dɩ Ezayu yɩrɩ don, Edomə.b 31 Zwakɔbə ma swɩ̀n, ʋ wʋ́: «Dí yáá n dù, də n sɛ̀, sə à mʋ̀ nə yà nə nyɩna bikwɩa, kʋ nə zɩgɩ zə̀n kʋ tə. Kʋ kwa nə, à dàń wá pa mʋ́ wodiu tə.» 32 Ezayu le, ʋ wʋ́: «Nə̀ń nə, niən pɩ̀à tə lɩ à mɩɩ. À nə yɩ nə nyɩna bikwɩa tə nywarɩ nə yɩ bɛ̀, kʋ pa nə?» 33 Zwakɔbə ma kʋ́ʋ̀ swɩ̀n, ʋ wʋ́: «Dí yáá n dù, də n sɛ̀ kʋ nətʋ tə.» Yá Ezayu dàń dùə̀ də ʋ sɛ̀, də Zwakɔbə nə yɩ ba nyɩna tə bikwɩa. 34 Zwakɔbə dàń pɩn wodiu sɩsɩnʋ tə də dipɛn Ezayu nə, ʋ də́, ʋ nyʋn nɩ́á, ʋ ga zàn ʋ vìí. Mə nətʋ nə, Ezayu twá, ʋ ma bɩrɩ, də ʋ nə yɩ ba nyɩna bikwɩa tə, ba nywarɩ jə kʋ pa wá.