Zwezi kúrí ʋ tʋntʋna fugə bələ tə
10
1 Dɩɩn don nə,
Zwezi bon ʋ karbɩa fugə bələ tə,
sə ba bà,
sə ʋ ken dɩ̀àn ba jɩɩn wa,
sə ba wànɩ́ ba lɩ *zinə.
Yá ba ga zwɛ̀ yayɩŋa yayɩran,
ba ga pɩn yazurə ba tə nə,
ba nandaran nə wà cé.
2 Ʋ karbɩa fugə bələ tə,
ba nə yɩ ʋ *tʋntʋna,
tə yɩra nə nətən:
Ba təntən lìù nə yɩ Simon,
ba nə boŋə Piyɛrə,
də ʋ nubiu Andəre.
Kʋ súrí Zwakə də ʋ nubiu Zwan nə,
ba nə yɩ Zebede bɩa.
3 Kʋ súrí Filipə də
Barətelemi
də Toma
də Matiə,
ʋ nə yɩ lanpolɩnʋ.
Kʋ súrí Aləfe bìú Zwakə də Tade,
4 də Simon tə,
ba nə boŋə “Kananitə*f1*.”
Kʋ súrí Yisəkariyɔtə Zwidasə,
ʋ nə jɩn Zwezi ʋ pa ʋ dʋŋa nə.
Zwezi tʋn ba tʋntʋna fugə bələ tə
5 Zwezi tʋn ba *tʋntʋna fugə bələ tə,
ʋ ga pa ba nii,
ʋ wʋ́:
«Á dànà ká va lɩ̀à tə,
ba nə tà *Zwifə-ba con,
nə à yə̀ə́ Samari tɩ̀án tɩan tə wa.
6 Á vələ *Yɩzərayɛlə lɩ̀à tə cɩcɩ con,
ba nə nyɩn ndə pee nə,
tə nə jɛ́n.
7 Á vələ,
á swɩ̀n ba con də,
máŋá tə bwələ,
sə Yɩɩ də́ ʋ pàrɩ̀ tə lɩ̀à tə mama yuu wa.
8 Á pɩan yayɩŋa yayɩran zwɛ̀,
á bwiən tɩga,
sə á zwɛ̀ dayaran dayan,
sə ba jì ləzwənzəŋə,
á ga lɩ *zinə lɩ̀à yuu wa.
Á pɩan tʋtʋ,
ba nə pɩn aba tʋtʋ yɩrɩ.
9 Á dànà ká tì sɩ́án,
nə à yə̀ə́ wárʋ́,
nə à yə̀ə́ səbimɩnɩ á ganjɩga wa.
10 Á dànà ká tì lɔ̀ɔ̀,
nə à yə̀ə́ gànʋ̀ don,
á súrí kʋ tə nə,
á nə zʋa.
Á dànà ká tì natʋra duən,
nə à yə̀ə́ daduu,
tʋtʋnʋ nə wá na ʋ nii wodiu yɩrɩ.
11 Á nə yí tɩfarʋ,
nə à yə̀ə́ tɩbiə,
sə á pɩ̀à lìù tə,
ʋ nə mɛ,
á zʋrɩ kʋ tíú bwálɩ́ nə,
kʋ ja vələ á viru.
12 Dìə̀ tə,
á nə zʋa ka wa,
sə á jʋn lɩ̀à tə,
ba nə wulə ka wa.
13 Də ka mʋ̀ dìə̀ təntə lɩ̀à tə nə sɛ̀ ba jon aba,
sə Yɩɩ pa á jʋ̀nà tə pa ba bɩcanɩ sìə́.
Yá ba nə vɩga aba,
sə kʋ tə Yɩɩ nə pɩn tə,
pìí kʋ bà á con.
14 Kʋ nə yɩ dìə̀ wa,
nə à yə̀ə́ tɩʋ wa,
ba nə vɩga,
sə ba pa á zʋ,
nə à yə̀ə́,
sə ba cʋgʋ á sʋ̀ràn tə,
á virə kʋ bwálɩ́ tə nə,
á ga zwarɩ á nɛɛ purən*f1* á lwá ba yuu wa.
15 Cɩ́gá mama,
à mʋ̀ nə swɩ̀n kʋ á con:
Kʋ mʋ̀ tɩʋ təntə bʋra tə bʋ̀rʋ̀ dɩɩn nə,
*Sodɔmə də Gomɔrə lɩ̀à bá na càn ndə kʋ tɩʋ tə tɩ̀án nə.»
Wʋwalʋ tə nə bɩ̀àn
16 Zwezi kʋ́ʋ̀ swɩ̀n,
ʋ wʋ́:
«Á cʋga zəni!
À tʋŋa aba ndə pee nə,
buyurən nyankwan tətəŋi wa.
Kʋ mʋ̀ təntə yɩrɩ,
á cɩa á tɩ̀àn nə ndə dɩŋa nə,
sə á ga yà sənbwen ndə gunponi nə.
17 Ba wá ja aba,
ba va lɩ̀à tə nə bʋ̀rɩ̀ bʋra yáá con.
Yá ba ga wá mà aba də fɩfɩran *Zwifə-ba *jə́rə́ dìì tə wa.
Kʋ mʋ̀ nə pɩn,
á cɩa á tɩ̀àn nə də lɩ̀à tə.
18 Ba wá ja aba,
ba va pɛ̀gá tə,
də yáá tɩ̀án tə,
pɩ̀ʋ́ nəfarʋ tə nə lɩ ʋ tún con,
à mʋ̀ Zwezi yɩrɩ.
Kʋ nətʋ tə wá tʋn,
sə kʋ ma bɩrɩ ba tətə,
də dwíə́ tə duən mama lʋʋ mama wa,
ba nə tà Zwifə-ba,
kʋ tə,
Yɩɩ nə fwa.
19 Yá ba nə jɩn aba,
ba va lɩ̀à tə nə bʋ̀rɩ̀ bʋra yáá con,
á dànà ká pa kʋ tə,
á nə wá swɩ̀n twara ja aba.
Kʋ máŋá tə wa,
Yɩɩ nə wá kə kʋ tə,
á nə mɛ,
sə á swɩ̀n,
á nii wa.
20 Kʋ tà á mʋ̀ nə wá swɩ̀n,
kʋ wá yà á nyɩna Yɩɩ *Siŋu tə,
kʋ nə wulə də aba,
nə wá swɩ̀n kʋ pa aba.
21 Lɩ̀à wá ja ba nubɩa ba pa,
sə ba gʋ,
yá bɩa nyɩna-ba də wá tʋn kʋ nyɩnyɩga də ba bɩa.
Bɩa wá zàn,
ba zɩgɩ ba nyɩna-ba nə,
ba gʋ ba.
22 Lɩ̀à tə mama wá dʋ́n aba à mʋ̀ yɩrɩ.
Yá lìù tə,
ʋ nə wá ja pɩ́nʋ́,
ʋ zɩgɩ ʋ dɩ̀àn kʋ yoo tə,
kʋ va kʋ zwɛ̀,
kʋ tíú wá na mɩɩ tə,
kʋ nə ba zwɛ̀ Yɩɩ con.
23 Ba nə fɩfɩn aba tɩʋ wa,
sə á dəri á nan á va kʋ don.
Cɩ́gá mama,
à mʋ̀ nə swɩ̀n kʋ á con:
Á bá wànɩ́ *Yɩzərayɛlə tɩan tə mama,
á va,
də *Ləzwənə-Biu tə wà pìí ʋ bà.
24 Karbiu tə̀lə́,
ʋ nə dwə ʋ karnyɩna.
Tʋtʋnbiu tə̀lə́,
ʋ nə dwə ʋ yuu tíú.
25 Yá karbiu nə yɩ ndə ʋ karnyɩna nə,
kʋ cɩcɩ mɛ.
Tʋtʋnbiu də nə yɩ ndə ʋ yuu tíú nə,
kʋ cɩcɩ mɛ.
Yá ba nə jɩn dìə̀ tíú,
ba bon Beləzebilə,
ba wá pa yɩra tə nə dwə nətʋ ʋ dìə̀ lɩ̀à nə!»
Lìù tə, á nə mɛ, sə á dəri ʋ fən
(Likə 12.2-7)
26 Zwezi kʋ́ʋ̀ swɩ̀n,
ʋ wʋ́:
«Á dànà ká dəri ləzoni!
Kʋ tə mama nə sə̀gə̀ nə wá nan poni nə yɩrɩ.
Yá kʋ tə nə yɩ dìə̀ yoo wá nan kàrá.
27 Kʋ tə,
à nə swɩ̀n á con yikunu wa,
sə á swɩ̀n kʋ yɩcaʋ wa.
Kʋ tə,
ba nə sʋsʋnɩ á zɩan wa,
sə á cə̀rí kʋ dəyun wa.
28 Á dànà ká dəri ba tə,
ba nə wàá yɩra tə cɩcɩ ba gwɩ,
ba ga wàrɩ̀ jə̀rə́ tə won ba fwa.
Yá á dərə lìù*f1* tə mʋ̀,
ʋ nə wàá á yɩra tə,
də á jə̀rə́ tə ʋ cʋ̀gà mən dìə̀ wa.
29 Ba ba zənbitɩlɩ bələ yoli səbilugu nədʋ,
naaa>> Yá ka nədʋ tətə wàrɩ̀ tɩa ka twɩ,
də á nyɩna Yɩɩ nə wà nii pɩn.
30 Yá Yɩɩ gàlɩ̀ á yukʋran tə mama á yuu wa.
31 Á dànà ká pa fən ja aba.
Á kʋ́kwà zənbii tə nə dáá.»
Lìù tə Zwezi nə yə̀ə́
(Likə 12.8-9)
32 Zwezi kʋ́ʋ̀ swɩ̀n,
ʋ wʋ́:
«Lìù tə mama,
ʋ nə wá swɩ̀n lɩ̀à yáá con də,
ʋ yə̀ə́ à mʋ̀ Zwezi,
à də wá bɩrɩ à nyɩna Yɩɩ,
ʋ nə wulə Yɩɩ *sàń nə,
də kʋ tíú yɩ à mʋ̀ cɩ́gá nə tɩ wá.
33 Yá lìù tə,
ʋ nə bɩrɩ lɩ̀à yáá con də,
ʋ yəri nə,
à də wá bɩrɩ à nyɩna Yɩɩ yáá con,
ʋ nə wulə Yɩɩ sàń nə,
də à də yəri wá.»
Zwezi yɩ pwɩa lìù
34 Zwezi kʋ́ʋ̀ swɩ̀n,
ʋ wʋ́:
«Á dànà ká bʋ́n də,
kʋ yɩ à twí,
sə à kə bɩcan sìə́ tɩa yuu wa.
Kʋ tà à twi kʋ mʋ̀ yɩrɩ,
kʋ yɩ kwatara sɩ̀ʋ́ nə,
à ja bà.
35 À twi,
sə à kə pwɩa lɩ̀à pwə́rə́ wa:
Sə bìú zɩgɩ ʋ nyɩna nə,
sə bʋ̀á zɩgɩ ʋ nuu nə,
sə bikɩnɩ zɩgɩ ʋ barɩ nuu nə.
36 Lìù dʋŋa wá yà ʋ dìə̀ lɩ̀à.
37 Lìù tə,
ʋ nə swə ʋ nuu də ʋ nyɩna ʋ doni nə,
kʋ tíú tə wà mɛ,
sə ʋ ya à karbɩa tə wa lìù.
Lìù tə,
ʋ nə swə ʋ bìú,
nə à yə̀ə́ ʋ bʋ̀á ʋ doni nə,
kʋ tíú tə wà mɛ,
sə ʋ ya à karbɩa tə wa lìù.
38 Lìù tə,
ʋ nə pɩ̀à,
sə ʋ twá nə,
kʋ tíú mɛ,
sə ʋ sɛ̀ ʋ də́ càn də nə,
kʋ ja vəli ʋ tɩan dagarʋ yuu wa.
Kʋ nə tà nətʋ,
ʋ wà mɛ,
sə ʋ ya à karbɩa tə wa lìù.
39 Lìù tə,
ʋ nə pɩ̀à,
sə ʋ jon ʋ mɩɩ tə,
ʋ wá kwɩ̀n kʋ nə.
Yá lìù tə,
ʋ nə wá kwɩ̀n ʋ mɩɩ tə nə,
à mʋ̀ yɩrɩ,
ʋ wá na mɩɩ,
kʋ nə ba zwɛ̀ Yɩɩ con.»
Yɩɩ ŋwɩ́rán
(Marəkə 9.41)
40 Zwezi kʋ́ʋ̀ swɩ̀n,
ʋ wʋ́:
«Lìù tə,
ʋ nə sɛ̀ aba,
kʋ tíú sɛ̀ nə.
Yá lìù tə,
ʋ nə sɛ̀ nə,
kʋ tíú sɛ̀ lìù tə,
ʋ nə tʋn nə.
41 Lìù tə,
ʋ nə jɩn Yɩɩ nii *sʋ̀sʋ̀nʋ̀ tə zəni,
ʋ nə yɩ Yɩɩ nii sʋ̀sʋ̀nʋ̀ yɩrɩ,
Yɩɩ wá pa wá Yɩɩ nii sʋ̀sʋ̀nʋ̀ ŋwɩ́rán.
Yá lìù tə,
ʋ nə jɩn cɩ́gá tíú zəni,
ʋ nə yɩ cɩ́gá tíú yɩrɩ,
Yɩɩ wá pa wá cɩ́gá tíú ŋwɩ́rán.
42 Lìù nə kwán nazunə wùrú zʋŋa tətə,
ʋ pa à karbiu tə don jɩmurinyʋga tətə nə,
ʋ nə yɩ à karbiu tə yɩrɩ,
cɩ́gá mama,
à mʋ̀ nə swɩ̀n kʋ á con:
Ʋ bá kwɩ̀n ʋ ŋwɩ́rán nə Yɩɩ con.»