Zwezi kàrɩ̀ ka pa won zʋra nə yoo
(Likə 12.1-2, Kolosə tɩ̀án 3.23-24)
6
1 Zwezi kʋ́ʋ̀ swɩ̀n,
ʋ wʋ́:
«Á cɩa á tɩ̀àn nə,
sə á dànà ká tʋn á cɩ́gá yìə̀n tə ləzoni mama yáá con,
sə lɩ̀à mama na aba.
Də á nə fwa kʋ nətʋ,
á bá na ŋwɩ́rán á nyɩna Yɩɩ tə con,
ʋ nə wulə Yɩɩ *sàń nə.
2 Də n nə pɩ̀à,
sə n pa yɩlori won,
dàn ká fwa zuzugu,
sə kʋ pa lɩ̀à mama yɩ́á ya n yuu wa,
ndə níə́ bələ tɩ̀án tə nə fwa nətʋ *Zwifə-ba *jə́rə́ dìì tə wa,
də coŋi yuu.
Mə ba fwa nətʋ,
sə ləzoni ma pa ba dun.
Cɩ́gá mama,
à mʋ̀ nə swɩ̀n kʋ á con:
Ba lɩ̀à təntə dí yáá ba na ba ŋwɩ́rán,
ba zwɛ̀.
3 Də n dàń nə pɩ̀à,
sə n pa yɩlori won,
fwa ndə n jɩgwiə tə wà mɛ,
sə ka lwarɩ won tə,
n jɩzən tə nə fwa.
4 Pa,
sə yɩlori won təntə,
n nə pɩn,
ya yosəgu n mʋ̀ də n nyɩna Yɩɩ cɩcɩ pwə́rə́ wa.
Yá n nyɩna Yɩɩ tə,
ʋ nə nɩ kʋ tə,
n nə sə̀gə̀ n fwa tə,
wá pa n ŋwɩ́rán.»
Zwezi kàrɩ̀ yɩjʋnɩ yoo
5 Zwezi kʋ́ʋ̀ swɩ̀n,
ʋ wʋ́:
«Máŋá tə wa,
á nə jʋ̀nɩ̀ Yɩɩ,
á dànà ká ya ndə níə́ bələ tɩ̀án tə nə,
ba nə swə,
sə ba zàn ba zɩgɩ yɩɩ nə *Zwifə-ba *jə́rə́ dìì tə wa,
də coŋi yuu,
ba jʋn Yɩɩ,
sə lɩ̀à mama na ba.
Cɩ́gá mama,
à mʋ̀ nə swɩ̀n kʋ á con:
Ba dí yáá ba na ba ŋwɩ́rán,
ba zwɛ̀.
6 N mʋ̀ dàń nə pɩ̀à,
sə n jʋn Yɩɩ,
zʋ n dəyaa wa,
n pɩn n mimii,
n ga jʋn n nyɩna Yɩɩ tə,
ʋ nə wulə kʋ yisəgə bwálɩ́ təntə wa.
Yá n nyɩna Yɩɩ tə,
ʋ nə nɩ kʋ tə,
n nə sə̀gə̀ n fwa tə,
wá pa n ŋwɩ́rán.
7 Də á nə jʋ̀nɩ̀ Yɩɩ,
máŋá tə wa,
á dànà ká pa á níə́ sʋ̀ràn tə doni jɩɩn,
ndə ba tə nə,
ba nə yəri Yɩɩ.
Ba mʋ̀ nə bʋŋa də,
ba níə́ sʋ̀ràn ka bwɛ́ də ka bwɛ́ nə wá pa,
sə Yɩɩ le ba.
8 Á dànà ká ya ndə ba nə,
á nyɩna Yɩɩ tə nə dí yáá ʋ yə̀ə́ kʋ tə,
kʋ nə mɛ də aba,
də á tə wà kʋ lòrì ʋ con tə yɩrɩ.
9 Á nəŋə,
á nə mɛ,
sə á jʋn Yɩɩ nətʋ:
Nə nyɩna Yɩɩ tə,
n nə wulə Yɩɩ *sàń nə!
N yɩrɩ mɛ də dun.
10 Bàá,
n də́ n pàrɩ̀ tə tɩa yuu wa.
N fɩra tə mɛ,
sə kʋ tʋn tɩa yuu wa,
ndə Yɩɩ sàń nə.
11 Pa nəba nə zə̀n nii wodiu,
kʋ nə mɛ nəba.
12 Kwɛn nə cʋna,
n lɩ nə mʋ̀ də n mʋ̀ pwə́rə́ wa,
ndə nə də nə kwɛn lwanɩ tə,
lɩ̀à nə tʋn nə yɩra,
nə lɩ nə mʋ̀ də ba pwə́rə́ wa.
13 N dàń jon nəba kʋ tə wa,
kʋ nə lwara*f1*.
Dàn ká pa yoo yí nəba,
kʋ nə wá yigu nəba,
kʋ kə yokʋkwɩʋn wa.
[N mʋ̀ nə tɩ pàrɩ̀,
də dɩ̀àn,
də dun,
tə nə ba zwɛ̀ abada.
Amɩɩna!]
14 Á nyɩna Yɩɩ tə,
ʋ nə wulə Yɩɩ sàń nə,
ʋ wá kwɛn á cʋna ʋ lɩ á mʋ̀ də wá pwə́rə́ wa,
də á də nə kwɛn ba tə,
ba nə cʋ̀gʋ̀ á nə,
cʋna á lɩ á mʋ̀ də ba pwə́rə́ wa.
15 Yá á nə vɩga,
sə á kwɛn ba cʋna tə,
á lɩ á mʋ̀ də ba pwə́rə́ wa,
á nyɩna Yɩɩ də bá kwɛn á cʋna tə ʋ lɩ á mʋ̀ də wá pwə́rə́ wa.»
Zwezi kàrɩ̀ nivori yoo
16 Zwezi kʋ́ʋ̀ swɩ̀n,
ʋ wʋ́:
«Máŋá tə wa,
á nə vwə á nii,
á dànà ká cʋ̀gʋ̀ á yáá,
ndə níə́ bələ tɩ̀án tə nə.
Ba mʋ̀ yàá lwàń ba yɛ́ɛ́,
sə lɩ̀à mama yəni də,
ba vwə ba níə́.
Cɩ́gá mama,
à mʋ̀ nə swɩ̀n kʋ á con:
Ba dí yáá ba na ba ŋwɩ́rán,
kʋ zwɛ̀.
17 Yá n mʋ̀,
máŋá tə wa,
n nə vwə n nii,
sə n pùlì n yáá,
n ga zàŋá n yuu,
18 sə lɩ̀à dàn ká yəni də,
n vwə n nii,
də kʋ nə tà n nyɩna Yɩɩ cɩcɩ,
ʋ nə wulə kʋ yisəgə bwálɩ́ təntə wa.
Yá n nyɩna Yɩɩ tə,
ʋ nə nɩ kʋ tə,
n nə sə̀gə̀ n fwa tə,
wá pa n ŋwɩ́rán.»
Jɩjə yoo
19 Zwezi kʋ́ʋ̀ swɩ̀n,
ʋ wʋ́:
«Á dànà ká pa tɩa ka tə yuu wa wiən tə,
tə kwənə nə dáá,
ka pɩ̀à nə ja á bɩan nə.
Wiən təntə mama wá zwɛ̀,
ndə kwìù nə dí tə,
ndə lugu nə sɩnɩ kʋ pʋ nə.
Ŋwɩna də wàá tə ba zwɩ ba ŋwɩ̀n dìə̀ tə wa.
20 Á pɩ̀à jɩjə tə,
kʋ nə wulə Yɩɩ con,
á tún á tɩ̀àn nə,
kʋ mʋ̀ nə kwìù wàrɩ̀ kʋ də́,
kʋ ga ba sɩnɩ ndə lugu nə kʋ pʋ.
Ŋwɩna də wàrɩ̀ kʋ ba zwɩ ba ŋwɩ̀n Yɩɩ *sàń tə wa.
21 N wiən tə,
tə kwənə nə dáá,
tə wulə lá nə,
n waa də yàá ya lá.»
Ləzwənə yɩ́á nə yɩ ʋ cànʋ́
(Likə 11.34-36)
22 Zwezi kʋ́ʋ̀ swɩ̀n,
ʋ wʋ́:
«Ləzwənə yɩ́á tə ya ndə n yɩra cànʋ́ nə.
Də n yɩ́á tə nə zurə,
n yɩra tə mama yàá pɩ̀rɩ̀ də poni.
23 Yá də n yɩ́á tə nə ba ziən,
n yɩra tə mama yàá ya yikunu wa.
Də n poni təntə,
kʋ nə wulə n yɩra wa,
nə yɩ yikunu,
tə yikunu tə yiri lwara.»
Á jə̀lə́ Yɩɩ yuu wa
24 Zwezi kʋ́ʋ̀ swɩ̀n,
ʋ wʋ́:
«Lìù tə̀lə́,
ʋ nə wàá ʋ tʋŋa,
ʋ pɩn yun tɩ̀án bələ nə.
Ʋ nə fwa kʋ,
ʋ wá sóní ʋ don,
ʋ ga dʋ́n ʋ don tə.
Ʋ wá sɛ̀ ʋ don nii,
ʋ ga vɩ ʋ don nii.
Á wàrɩ̀ á twá duən,
á tʋŋa á pɩn Yɩɩ də tɩa yuu jɩjə nə.
25 Kʋ mʋ̀ nə pɩn,
à wʋ́:
Á dànà ká pa,
á mɩɩ tə twara ja aba,
də kʋ tə,
á nə wá də́,
nə à yə̀ə́ á nə wá nyʋ,
nə à yə̀ə́ də kʋ tə,
á nə wá zʋ á yɩra nə.
Á mɩɩ tə jə funə kʋ doni wodiu.
Yá á yɩra tə də jə funə tə doni gànʋ̀.
26 Á ywàŋá zənbii tə nə pəri yɩɩ nə!
Tə ba dwì,
tə ga ba ce,
tə ba pɛ̀,
tə kəni təkələ wa.
Yá á nyɩna Yɩɩ tə,
ʋ nə wulə Yɩɩ *sàń nə,
pɩn tə nii wodiu.
Á ba zənbii kʋ́kwà zənzən,
naaa>>
27 Á wà twara tə,
ʋ nə jə nə wàá ʋ mɩɩ tə,
kʋ təni mancɩn tətə>>
28 Bɛ̀ɛ̀ dàń nə pɩn,
á pa gànʋ̀ twara jə aba>> Á ywàŋá á jə́n kárɩ́ gapunə nə naŋa nətʋ,
tə ba tʋŋa,
tə ma ba gànʋ̀ də swɩ.
29 À mʋ̀ nə swɩ̀n kʋ á con də,
pɩ̀ʋ́ *Salʋmʋn tətə də ʋ jɩjə tə mama,
ʋ wà gànʋ̀ zwɩ,
kʋ nə ziən kʋ doni tə gapunə təntə nədʋ də.
30 Yá Yɩɩ dàń nə ywàŋá tə mʋ̀ gɛɛ təntə yuu,
tə nə wulə kárɩ́ wa zə̀n,
tə ga wá kʋ̀,
ba kə mən wa jwɩan nə,
də á mʋ̀,
á nə ja funə zənzən á doni tə,
Yɩɩ dàń wá zʋ aba də gànàn nətə>> Á wà á waa ken Yɩɩ nə wuuu!
31 Á kʋ́ʋ̀ dànà ká pa twara ja aba,
də kʋ tə,
á nə wá də́,
də kʋ tə,
á nə wá nyʋ,
də kʋ tə,
á nə wá zʋ á yɩra nə.
32 Tə wiən təntə yɩ ba tə,
ba nə yəri Yɩɩ nə pɩ̀à tə,
ba ba sìí.
Yá á mʋ̀ nyɩna Yɩɩ tə,
ʋ nə wulə Yɩɩ sàń nə,
yə̀ə́ kʋ tə nə mɛ aba.
33 Á kənə dɩ̀àn á dí yáá,
á pɩ̀à Yɩɩ pàrɩ̀ tə də ʋ cɩ́gá tə,
yá kʋ kwa nə,
Yɩɩ wá pa aba tətə mama,
tə nə mùrì aba.
34 Á dànà ká pa twara ja aba də jwɩan yoo,
jwɩan nə wá ja kʋ yoo,
kʋ ja bà yɩrɩ.
Dɩɩn mama də kʋ yoo!»