Zwan-Batisə kàrà tə yoo
3
1 Máŋá təntə wa,
bɛɛ don yɩn lá,
ʋ yɩrɩ nə yɩ *Zwan-Batisə.
Kʋ bɛɛ təntə twi ʋ nan Zwide kasɔɔ lanworu tə wa,
ʋ kàrɩ̀ Yɩɩ yoo,
ʋ bɩrɩ lɩ̀à nə.
2 Ʋ yà swɩ̀n,
ʋ wʋ́:
«Máŋá bwələ,
sə Yɩɩ də́ ʋ pàrɩ̀ tə lɩ̀à mama yuu wa.
Kʋ mʋ̀ nə pɩn,
á vəvərə á kwa,
á ma sá á cʋna!»
3 Mə Zwan-Batisə yoo nə Yɩɩ nii *sʋ̀sʋ̀nʋ̀ *Ezayi yà swɩ̀n Yɩɩ sagɩ tə wa,
ʋ wʋ́:
«Kʋ yɩ bɛɛ nə bubwi kasɔɔ lanworu wa,
ʋ wʋ́:
“Á kwɩ̀án *Yuu-Tiu cwəŋə tə,
sə á cɛ̀ ʋ cwəmɩnɩ tə,
sə tə ya mənəmənə.” »
4 Zwan yà zʋa nyʋgʋma kʋran gànʋ̀,
ʋ ga vwa tànʋ̀ voru ʋ tàŋá*f1* nə.
Ʋ yà də́ jərən də tʋ̀ràn.
5 Kʋ nə zɩgɩ *Zwerizalɛmə,
kʋ ja Zwide nagwanaa tə mama,
kʋ va kʋ kɩkarɩ Zʋrədɛn mʋnaa tə nii mama,
lɩ̀à yà twi ʋ con.
6 Ba dàń swɩ̀n ba cʋna,
ba bɩrɩ Zwan,
yá ʋ ga zɩga lá,
ʋ li ba Zʋrədɛn mʋnaa tə wa,
kʋ twá də Yɩɩ yɩrɩ.
7 Zwan-Batisə nə nɩ *Farɩzɩan-ba də *Sadɩsɩan-ba də,
ba nə twi zənzən ʋ con,
sə ʋ lə ba də nɩ́á tə wa,
ʋ swɩ̀n ba con,
ʋ wʋ́:
«Á mʋ̀ dəkwaa dwíí-ba!
Wàà nə bɩrɩ aba də,
á wàá á dəri á jɛ́n Yɩɩ lɩŋa tə yáá nə,
tə nə bɩ̀àn>>
8 Kʋ nə yɩ nətʋ,
sə á twá á tʋ̀tʋ̀nán nə,
á ma bɩrɩ də,
á vəvəri á kwa á ma sá á cʋna.
9 Á jə cɩ́gá,
sə á swɩ̀n də,
*Abərahamə yɩ á nɩbɛɛ,
yá kʋ cɩcɩ tə wà yí.
À mʋ̀ nə swɩ̀n kʋ á con də,
Yɩɩ wàá kapana tə tə ʋ lwànɩ́,
ʋ pɩn tə jì Abərahamə nɩ̀án.
10 Nə wàá kʋ nətʋ tə nə tì,
nə ma maŋa ndə dèrí nə manwarɩ kʋ wulə tɩ̀án dəkurən nə.
Tɩ̀ʋ́ tə mama,
kʋ bɩa nə ba ziən,
ba wá goŋə kʋ,
ba dɩ mən wa.
11 À mʋ̀ li aba nɩ́á wa,
sə kʋ ma bɩrɩ də,
á wulə á vəvəri á kwa,
sə á ma sá á cʋna.
Yá lìù don,
ʋ dɩ̀àn nə dáá,
tə doni nə,
wà pú à kwa ʋ bà.
À jɩɩn mùrì,
sə à kʋ̀rɩ̀*f1* ʋ nɛɛ natʋra tətə.
Ʋ mʋ̀ nə wá lə aba Yɩɩ-*Siŋu də mən wa.
12 Ʋ jə ʋ wocəri fɩyaʋ ʋ jɩ̀àn wa,
ʋ wá kwɛn ʋ tʋa,
ʋ cə̀rì ʋ wobɩa,
ʋ pwɛ̀ tə də wopulə tə,
ʋ lɩ duən wa.
Ʋ pɛ̀ wobɩa tə,
ʋ kə ʋ pulu wa,
ʋ ga sʋ̀rɩ́ wosanan tə mən wa,
tə nə ba də̀ŋì.»
Zwan-Batisə ləgə Zwezi nɩ́á wa
13 Zwezi dàń ma nan Galile nagwanaa,
ʋ bà *Zwan-Batisə con Zʋrədɛn mʋnaa tə nii nə,
sə Zwan lə wá nɩ́á wa,
kʋ twá də Yɩɩ yɩrɩ.
14 Yá Zwan yà ba pɩ̀à,
sə ʋ sɛ̀,
ʋ swɩ̀n,
ʋ wʋ́:
«À mʋ̀ nə mɛ,
sə n lə nə nɩ́á tə wa,
mə kʋ nə n mʋ̀ nə pìí n bà à con>>»
15 Zwezi ma le wá,
ʋ wʋ́:
«Yá,
sə kʋ ya nətʋ sɩ́ʋ́n nə,
kʋ nə mɛ,
sə nə tʋn won tə mama,
kʋ nə ziən kʋ pa Yɩɩ nə yɩrɩ.»
Zwan dàń ma sɛ̀.