20
Amaaha elufu mooja
1 Pe nkamulola uhavhizya wooka akwiha kufuma ku mwanya ni shigulilo isha kwi livha ilya ku vhuzimu nu munyoloolo umupiti ku nyoovhe yaakwe. 2 Ahalilema iyoha ilyo, injoha iya hali, ye wu Mukwalanzi poosye wu Setano, ahalikunga ku havhaliilizyo aha maaha elufu mooja. 3 Ahalisumbila kwi livha ilya ku vhuzimu, ahawugalila nu kuwulemezanya umulyango uwa kwinjiilila kuukwo. Ávhomvile vhwevhulo inga iyoha ilyo litahasheele havhili kuzihopenkanya insi kufishila ahavhaliilizyo aha maaha elufu mooja. Ileelo lwe amaaha igo gatuuha alilyigulila havhili ku havhaliilizyo hansi vhweleele.
4 Pe nkalola ivitengo ivwa vhumwene na vhe vhavitendamiiye, avhantu ivho vhahapeelwa amaha aga vhulonzi. Havhili nkalola impepo izya vhaala vhe vhávholiilwe kuzya kufumwa uvhusimishizi uvhwa Yeesu na kuzya kulyitiha izwi ilya Mulungu. Ivha vhatáshipuusite ishihanu shiila ni shiholanyo shaakwe, poosye vhatáposheleeye ivimanyilo pa vweni vwavho, poosye pa nyoovhe zyavho. Vhahazyuha havhili, vhahakonzya pooka nu Chilisiti ku maaha elufu mooja. 5 Ulu lwe lwa kwanda uMulungu kuvhazyusya avhantu. Avhamwavho vhonti vhe vháfuuye vhatázyusile kufishila ahavhaliilizyo aha maaha elufu mooja. 6 Vhalosiitwe nkaani, havhili vhafinjile vhonti ivho vhe vhakuvhaazilwa kuzyuha ulwa kwanda. Uvhufwe uvhwa vhuvhilia te vhuhaavhe na maha kuli ivho. Vhaliivha vhapuuti avha Mulungu nu Chilisiti, havhili vhalikonzya pooka nawo ku maaha elufu mooja.
Isunde ilya Mukwalanzi
7 Lwe ahavhaliilizyo aha maaha elufu mooja haasila, vhalimwigulila uMukwalanzi kufuma mwi jeela lyakwe. 8 Pe aliifuma panzi, alitaliha kuvhahopenkanya avhantu vhonti vhe vhasaasite mu nsi zyonti, kwe kuuti iGogu ni Magogu. UMukwalanzi alivhavhungaaniha pooka aVhagogu na Vhamagogu kuzya vhulugu, vhoope vhaliivha vhinji fwe lusenga ulwa muluvhazu ulwa sumbi. 9 Vhalituuha mu nsi yonti, kuyizyunguula inkambi iya vhafinjile ni nkaaya iya Mulungu ye ahayisungwa. Ileelo umwoto wuliyiiha kufuma ku mwanya nu kuvhalovwa. 10 Woope uMukwalanzi we ahavhahopenkanyaaga, alisumbilwa mwa sumbi we akwaha umwoto uwa saalufa. Umwo mwe shili ishihanu shiila nu mukuvhwi ula uwa ilenga, vhoope vhaliyimvilwa uvhusiku nu musanya, shiima shiima.
Uvhulonzi uvhwa ku mpeleela
11 Pe nkalola ishitengo ishipiti ishizelu isha vhumwene nuula we ashitendamiiye. Insi ni mwanya viheepa naluvhiilo pilongolela lyakwe, vitálolesile havhili. 12 Pe nkavhalola avhafwe, avhapiti na vhansi, vhimiliiye pilongolela ilya shitengo isha vhumwene, amakalaata gahagubulwa. Havhili ikalaata ilyamwavho ilya vhulanzi lyope lihagubulwa. Pe uMulungu ahavhalonga avhafwe kulandatana nu lujendo lwavho, inza vwe lwásimviilwe mu makalaata igo. 13 Usumbi ahavhafumwa panzi avhafwe vhe vháali muumwo, uVhufwe nu Vhuzimu vhahavhafumwa panzi avhafwe vhe vháamile kuukwo. UMulungu ahavhalonga vhonti kulandatana nu lujendo lwavho. 14 Pe uVhufwe nu Vhuzimu vhahasumbilwa mwa sumbi we akwaha mwoto. Usumbi uyo we akwaha umwoto vhwe vhufwe uvhwa vhuvhili. 15 Umuntu wonti we izina lyakwe litálolesile mwi kalaata ilya vhulanzi, ahasumbilwa mwa sumbi we akwaha umwoto.