19
Ishikulukuulu isha winga ku mwanya
1 Lwe zyatuuha izyo nkiivwa amazwi ngati mazwi aga mpuga impiti iya vhantu ku mwanya gakuti,
“Haleluuya!a
Uvhuposhi nu vhushindamu na maha vikufuma kwa Mulungu wiitu.
2 Mwe pe uvhulonzi vhwakwe vhwa nalyoli,
havhili vhwa muumwo.
Amulonzile umalaaya umupiti,
ula we áyipuviizye insi ku vhuvhembu vhwakwe.
Amulanduziizye kuzya kwita amavhanda aga vhavhomvi vhaakwe!”
3 Havhili vhahayanga vhahati,
“Haleluuya!
Ilyosi ilya mwoto we wukuyinanganya inkaaya iyo,
liliizuvha ku mwanya shiima shiima!”
4 Avhasongo ishiliini na ine vhahakupama pa nsi pooka ni vipelwa vine, vhahamupuuta uMulungu, uweene we ali pa shitengo isha vhumwene, vhahati,
“Amina! Haleluuya!”
5 Pe izwi lihafuma ku shitengo isha vhumwene lihati,
“Mumutiime uMulungu wiitu,
mwe vhavhomvi vhwakwe vhonti,
mwenti mwe mukumushindiha,
mwe vhapiti na mwe vhansi.”
6 Pe nkiivwa izwi ngati lizwi lya mpuga impiti iya vhantu, havhili ngati lya minzi aminji ge gakwiha ku maha, havhili ngati lya kujilima ukupiti lihati,
“Haleluuya!
Mwe pe UMWENE wiitu uMulungu uwa Maha Gonti akonzya!
7 Tuseshelaje nu kudovha nu kumushindiha,
mwe pe ahavhaliilizyo aha winga uwa Hagonzi aha Mwene hafisile,
havhili we akwimalwa ayisengiinye.
8 Apeliilwe kuzwalila umwenda umwinza umuzelu,
we wuzelufile havhili we wukunyengʼenyela.”
(Umwenda umwinza umuzelu uwo, mbombo izya muumwo izya vhafinjile).
9 Pe uhavhizya ahambuuzya ahati, “Simba izi: ‘Vhalosiitwe vhaala vhe vhavhalanjiiye ku shikulukuulu isha winga uwa Hagonzi aha Mwene!’” Havhili ahambuuzya, ahati, “Igo mazwi aga nalyoli aga Mulungu.” 10 Pe ine nkakupama pilongolela ilya vinama vwakwe kuuti imupuute. Ileelo uweene ahambuuzya, ahati, “Leha! Ine ne muvhomvi vhweleele inza iwe na vhamwinyu, swenti tukufumwa uvhusimishizi uvhwa Yeesu. Mupuute uMulungu! Mwe pe vhe vhakufumwa uvhusimishizi uvhwa Yeesu, vhe vhali nu Mupepo uMufinjile. Woope we akuvhaavwa kufumwa uvhukuvhwi.”
We alimbiiye imfwalaasi inzelu
11 Pisinda, nkalola ku mwanya kwigusile, ukwo nkalola imfwalaasi inzelu, na we akuyilimbila vhahatinji, “Umutungamu” nu “Wa Nalyoli.” Uyo akulongaga nu kulwa ku wa nalyoli. 12 Aminso gaakwe gáali ngati mwilo wa mwoto, havhili ázwaye ivipambwi ivwinji kwi itwe. Ásimviilwe izina lye umuntu nuumo atálimanyile nkandi wuuyo weeka. 13 Ázwaye umwenda we vhátontesile mu mavhanda. Izina lyakwe uyo wu “Izwi ilya Mulungu.” 14 Impuga izya vhasikaali avha ku mwanya vhahamulandataga uku, vhalimbiiye imfwalaasi inzelu havhili vhazwaye amenda aminza amazelu ge vhazelufiizye. 15 Ipanga ihozu likufumaga mwi lomu lyakwe na kwi panga ilyo alivhapoota avhantu avha mu nsi zyonti. “Uweene we alivhakonzya ku ndiisa iya shijela”b nu kuyifinya idivaayi inkali mu shiliilo isha kufinyila amampensya. Ishiliilo isho sha vhuhalazu uvhupiti uvhwa Mulungu uweene uwa Maha Gonti. 16 Pa mwenda waakwe na pa shizima shaakwe asimviilwe izina ilya kuuti, “UMupiti wa vhapiti nu Mwene wa vhamwene.”
17 Nkamulola uhavhizya wooka ayimiliiye pi zuvha pamwanya. Ahavhilishila nu kuzivhuuzya inyunyi zyonti zye zihabuluhaga mu mwanya kuuti, “Nzaaji! Vhungaani pooka ku shikulukuulu ishipiti isha Mulungu. 18 Nzaaji! Mulye amavhili aga vhamwene na ga vhapiti vha vhasikaali na vhantu avha maha na ga mfwalaasi na vhe vhakuzilimbila. Nzaaji! Mulye amavhili aga vhantu vhonti, vhe vhazya na vhe te vhazya na vhapiti na vhansi.”
19 Nkalola ishihanu shiila ishitanzi pooka na vhamwene avha nsi zyonti ni mpuga izya vhasikaali vhaavho vhavhungiine pooka. Vhávhungiine inga vhalwe nuula we átendiime pa mfwalaasi pooka ni mpuga iya vhasikaali vhaakwe. 20 Ileelo we átendiime pa mfwalaasi ahashigoma ishihanu isho pooka nu mukuvhwi waakwe uwa ilenga, we ahavhombaga amafindango pa luvhambo lwakwe. Ku mafindango gaakwe igo, ávhahopenkiinye vhaala vhe vháamile ni vimanyilo ivwa shihanu isho, na vhe vhahashipuutaga ishiholanyo shaakwe. Ishihanu isho pooka nu mukuvhwi uyo vhahavhasumba vhonti vhavhili, she vhapuuma, mwa sumbi we akwaha umwoto uwa saalufa. 21 Avhasikaali vhaavho vhahavhagoga kwi panga lye lihafumaga mwi lomu ilya ula we álimbiiye imfwalaasi. Inyunyi zyonti zihiikuta lwe zyalya inyama zyavho.