21
IYelusaleemu impwa
1 Pe nkalola imwanya impwa ni nsi impwa. Imwanya yiila intanzi ni nsi yiila intanzi zyápezile zyepa, woope usumbi havhili atáliipo. 2 Nkalola iNkaaya iMfinjile, iYelusaleemu impwa, yikwiha kufuma ku mwanya kwa Mulungu. Inkaaya iyo yáali ngati mwantanda we avhantu vhamuyemvwizye lwe akwimalwa.
3 Pe nkiivwa izwi ipiti kufuma ku shitengo isha vhumwene lihati, “Yeenya! Uvhuyo uvhwa Mulungu pooka na vhantu. Alitendama pooka navho, vhoope vhaliivha vhantu vhaakwe, woope aliivha wu Mulungu waavho. 4 Uweene alivhasyumula amansozi gaavho gonti. Uvhufwe te vhuhaavhe havhili, poosye uvhuvhaavi, poosye inkuuta, poosye kuloosya, mwe pe izya hali zituusile!”
5 Pe uMulungu, uweene we átendiime pa shitengo isha vhumwene ahati, “Yeenya! Nakuzivhomba zyonti kuvha impwa.” Havhili ahati, “Simba inongwa izi, mwe pe amazwi iga ga kwitishilwa havhili ga nalyoli!” 6 Ahati, “Zyafishila! Ine ne Alufa havhili ne Omega, uVhwandilo nu Vhusililishilo. We ali ni shinyooto ndimupa isha kumwela pa vhweleele kufuma mu viduda ivwa minzi ge gakufumwa uvhulanzi. 7 Ula we alipoota indingo aliposheela isho, niine ndiivha ne Mulungu waakwe woope aliivha mwana waane. 8 Ileelo avhantu avhilyoga na vhe vhatakwitiha na vhapoopo na vhagozi na vhavhembu na vhalozi na vhe vhakupuuta iviholanyo na vhilenga vhonti, uvhuyo waavho vhuliivha mwa sumbi ula we akwaha umwoto ni saalufa. Uwo we vhufwe uvhwa vhuvhili.”
9 Pe wooka mu vhahavhizya vhaala saba vhe vháali ni mbiga ziila saba zye zyízuuye imfwa saba izya vhusililishilo, ahinza nu kumbuuzya kuuti, “Nzaaga! Niine kwe inkulolesye umwantanda we akwimalwa, umushi uwa Hagonzi aha Mwene!” 10 UMupepo uMufinjile ahaniishila, woope uhavhizya ahantwala pi gamba itali nkaani. Ahandanga iNkaaya iMfinjile, iYelusaleemu, yikwiha kufuma ku mwanya kwa Mulungu. 11 Yihanyengʼenyelaga ku vhushindamu uvhwa Mulungu. Uvhuzelu vhwakwe vhwámile ngati wi vhwe ilya nsavho havhili ngati yaasipia havhili ngati ligalaasi. 12 Yáamile nu lupitu ulutali havhili ulupiti, lwe luli na malyango kumi na mbiili. Amalyango igo gahagulililwaga na vhahavhizya kumi na mbiili. Pa malyango gonti pásimviilwe izina lyoka mu gaala amazina aga nkolo kumi na mbiili izya Isilayeeli. 13 Imbazu zyonti zyámile na malyango gatatu: Uluvhazu ulwa ku vhutukulo amalyango gatatu, ku lutala amalyango gatatu, ku ntende amalyango gatatu na ku vhuswelo amalyango gatatu. 14 Ulupitu ulwa nkaaya iyo lwázengwilwe mu mavhwe kumi na mbiili aga lwalo. Mu mavhwe igo lyásimviilwe lyoka mu gaala amazina kumi na mbiili aga vhatumwa avha Hagonzi aha Mwene.
15 Pe woope uhavhizya ula we ahayangaga niine áamile ni ndiisa iya sahaabu iya kupimila, inga ayipime inkaaya iyo, amalyango gaakwe nu lupitu lwakwe. 16 Inkaaya iyo yálingiine imbazu zyonti zine, uvhutali nu vhupaapa wálingiine. Pe uhavhizya ahayipima inkaaya iyo ku ndiisa yaakwe, yáamile nu vhutali nu vhupaapa nu vhutali uvhwa kusogola ku mwanya, ikilomiita elufu mbiili na miya ine ishi. 17 Ahalupima ulupitu lwakwe, ahaaga luli ni miita sitiini ku shipimilo isha muntu she uhavhizya ápimiiye. 18 Ulupitu ulwo lwázengwilwe ku mavhwe aga yaasipi, iyeene inkaaya yázengwilwe ku sahaabu inyinza ye yikulolesya inza igalaasi. 19 Ulwalo ulwa lupitu ulwo avhazenzi vháluyemvwizye ku mavhwe aga nsavho aga mavhiila mu mavhiila. Ivhwe itanzi ilya lwalo lyáli lya yaasipi ni lya vhuvhili lyáli lya yakuuti samawi ni lya vhutatu lyáli lya kalikedoni ni lya vhune lyáli lya zumaliidi. 20 Havhili ivhwe ilya vhusaano lyáli lya sadoniki ni lya sita lyáli lya akiiki ni lya saba lyáli lya kulisoliito ni lya naane lyáli lya zabalajaadi ni lya tisa lyáli lya toopazi ni lya kumi lyáli lya kulisopulaso ni lya kumi na mooja lyáli lya yasinto ni lya kumi na mbiili lyáli lya metisito. 21 Goope amalyango kumi na mbiili gáamile luulu kumi na mbiili, amalyango gonti gágomvwilwe ku luulu yooka. Idala ipiti ilya nkaaya lyágomvwilwe ku sahaabu inyinza ye yikulolesya inza igalaasi.
22 Ntávhwenyi iNyumba iMfinjile mu nkaaya iyo, mwe pe UMWENE uMulungu uwa Maha Gonti na Hagonzi haala aha Mwene ye Nyumba yaakwe iMfinjile. 23 Inkaaya iyo yitakwanza izuvha poosye umwezi kuyilamila, mwe pe uvhushindamu uvhwa Mulungu vhukuyilamila ni nyaale yaakwe Hagonzi aha Mwene. 24 Avhantu avha mu nsi zyonti, vhalijenda mu vhuzelu vhwakwe na vhamwene avha mu nsi zyonti, vhaliyileetela iNkaaya iyo uvhudumbwe vhwakwe. 25 Amalyango aga nkaaya iyo galivhanga ukwazi musanya wonti, havhili te kuhaavhe uvhusiku muumwo. 26 Avhantu avha mu nsi zyonti vhalivhutwala uvhushindamu nu mushinzi waavho mu nkaaya iyo.
27 Ileelo shonti she shihandamanu te shihinjile muumwo, poosye umuntu wonti we akuvhomba izya kuviisya poosye izya ilenga te ahinjile muumwo. Vhe vhaala vhweleele vhe amazina gaavho gasimviilwe mwi kalaata ilya vhulanzi ilya Hagonzi aha Mwene vhe vhaliyinjila.