14
AHagonzi aha Mwene na vhantu elufu miya mooja alubaayini na ine
1 Pe nkalola aHagonzi aha Mwene himiliiye pi gamba uSayuni,a pooka na vhantu elufu miya mooja alubaayini na ine. Avhantu ivho pa vweni vwavho, lyásimviilwe izina ilya Hagonzi aha Mwene ni zina ilya Taata waakwe. 2 Nkiivwa izwi kufuma ku mwanya, fwe lizwi ilya minzi aminji, havhili lye likujilima inza imvula. Izwi ilyo lye nályivuuye lyámile ngati lizwi ilya ipango, lwe avhantu vhakulihoma. 3 Vhahimbaga ulwimbo ulupwa pilongolela ilya shitengo isha vhumwene na pilongolela ilya vipelwa vine na pilongolela ilya vhasongo. Ileelo naawumo we áweziizye kusambiilila ulwimbo luula, nkandi vhaala elufu miya mooja na alubaayini na ine, vhe vhápokwilwe mu nsi. 4 Ivho vhe vhatáyihandamiinie na vhantanda,b mwe pe vhafinjile. Ivha vhe vhakuhalandata aHagonzi aha Mwene kwonti kwe hakusogola. Ivha havhakazile kufuma mu vhantu, havhili vhe vhatanzi kwa Mulungu na ku Hagonzi aha Mwene. 5 Vhatálolesile kuluma ilenga naalumo, mwe pe vhatáali nu vhunanzi.
Avhahavhizya vhatatu
6 Nkalola uhavhizya uwamwavho akubuluha pahati pa mwanya, áamile na Mazwi aMinza aga shiima shiima. Ahavhalumbiilila vhe vhakutendama pa nsi, insi zyonti ni nkolo zyonti ni njango zyonti ni mpuga zyonti. 7 Ahayanga kwi izwi ipiti ahati, “Mumushindishe uMulungu nu kumutiima, mwe pe ahavhaliilizyo aha vhulonzi vhwakwe haafiha. Mumupuutaje uweene we ahapela ku mwanya na pa nsi nu sumbi ni viduda ivwa minzi.”
8 Uhavhizya uwamwavho uwa vhuvhili ahalandata, ahati, “Aguuye! UBabeelic aguuye, inkaaya yiila ye mpiti! Mwe pe avhamwensiizye avhantu avha mu nsi zyonti idivaayi inkali ye vhwe vhulugusu vhwakwe.”
9 Uhavhizya uwamwavho uwa vhutatu ahalandata ahayanga kwi izwi ipiti kuuti, “Umuntu wonti we alishipuuta ishihanu ishitanzi ni shiholanyo shaakwe, nu kuposheela ishimanyilo pa sheeni shaakwe, poosye ku nyoovhe yaakwe, 10 uweene alimwela idivaayi iyamwavho inkali ye vhuhalazu uvhwa Mulungu. Idivaayi iyo vhenzile ishisita kusangaanya na minzi, mu shikombe isha mulaha waakwe. Woope uMulungu alimuyimvwa ku mwoto na ku saalufa pilongolela ilya vhahavhizya avhafinjile, na pilongolela ilya Hagonzi aha Mwene. 11 Ilyosi ilya mwoto we wulivhoosha liliizuvha ku mwanya shiima shiima. Vhatalituuzya uvhusiku poosye umusanya, ivho vhe vhakushipuuta ishihanu isho ni shiholanyo shaakwe na vhe vhakushiposheela ishimanyilo ishi zina lyakwe.”
12 Kuli izyo pe yikwanzilwa avhafinjile, avhantu vhaala vhe vhakuzilandata indajizyo izya Mulungu nu kumwitiha uYeesu, vhavhe nu vhujimbiilizu.
13 Pe nkiivwa izwi kufuma ku mwanya, lihati, “Simba! Vhalosiitwe avhantu vhaala vhe kwandila isaala izi vhakufwa she vhamwitisile uMwene.” Woope uMupepo uMufinjile akuti, “Mwe muumwo! Vhalituuzya amayimba gaavho, mwe pe imbombo zyavho inyinza zilimanyiha.”
Kuvuna ivwa mu nsi
14 Pe nkeenya, páamile ivhingo izelu. Pa mwanya pi vhingo ilyo páamile we áali ngati Mwana wa Aadamu.d Ázwaye ishipambwi isha kukonzya isha sahaabu pi itwe nu kulema ishikwakwa ishihozu ku nyoovhe yaakwe.
15 Uhavhizya uwamwavho ahafuma mu Nyumba iMfinjile, ahamuvhuuzya kwi izwi ipiti ula we átendiime pi vhingo, ahati, “Luvhiilo, nyatuula ishikwakwa shaaho usogole uvunile, mwe pe ahavhaliilizyo aha kuvuna hafisile, ivwa kuvuna pa nsie vweleeye.” 16 Pe woope we átendiime pi vhingo ahagwisya ishikwakwa shaakwe pa nsi nu kuyivuna insi.
17 Uhavhizya uwamwavho ahafuma mu Nyumba iMfinjile ku mwanya, woope havhili áali ni shikwakwa ishihozu. 18 Uhavhizya uwamwavho, we mwimiilizi uwa mwoto uwa pa shifinjilo, ahafuma pa shifinjilo. Ahamuvhuuzya kwi izwi ipiti uhavhizya ula we áamile ni shikwakwa ishihozu ahati, “Nyatuula ishikwakwa shaaho ishihozu. Upambule ivipambulo ivwa mampensya,f mwe pe amampensya aga vipambulo ivwo gatonile.” 19 Pe uhavhizya ula ahagwisya ishikwakwa shaakwe pa nsi, ahapambula amampensya ge gali mu nsi. Pe ahagavhiiha mu shiliilo ishipiti isha kufinyila amampensya, ishiliilo isha vhuhalazu uvhwa Mulungu.g 20 Vhahagafinyila amampensya mu shiliilo isho she sháamile kunzi ku nkaaya. Pe amavhanda gahafuma mu shiliilo isho, uvhwivhizu vhwakwe wafishiiye imiita yooka ni nuusu nu vhutali vhwakwe ikilomiita miya taatu.