13
Ivihanu vivhili
1 Nkalola ishihanu shikufuma mwa sumbi, ishihanu isho sháamile ni mpembe kumi na matwe saba. Havhili mu mpembe zyakwe sházwaye ivipambwi kumi ivwa vhumwene na mu matwe gaakwe mwámile amazina aga musaamu. 2 Ishihanu shiila she náshivhwenyi sháamile ngati nzoowe, ivinama vwakwe vwámile ngati vinama vwa shihanu she vhakuti uduubu,a ilomu lyakwe lyámile ngati lilomu lya nsama. Iyoha ilyo lihashipa amaha gaakwe ni shitengo shaakwe isha vhumwene nu vhuvhwezyo uvhupiti. 3 Nkalola itwe ilya shihanu isho lyoka mu gaala saba lili nu vhuvwalale uvhwa kushigoga, ileelo uvhuvwalale uvhwo vhuhapola. Insi yonti yihasukumila nu kushilandata ishihanu isho. 4 Avhantu vhonti vhahalipuuta iyoha ilyo, mwe pe lyáshipiiye ishihanu isho amaha gaakwe, havhili vhahashipuuta ishihanu isho, vhahati, “Wu naanu we aholiine ni shihanu ishi? Havhili wu naanu we angaalwa uvhulugu nasho?”
5 Ishihanu isho shihitishilwa kuyanga amazwi aga kuyitumfwa, nu kumusaamula uMulungu. Shihapeelwa amaha ku havhaliilizyo aha meezi alubaayini na mbiili. 6 Pe shihamusaamula uMulungu, nu kuliliga izina lyakwe na pa vhuyo vhwakwe na vhonti vhe vhakutendama ku mwanya. 7 Havhili shihitishilwa kulwa na vhafinjile nu kuvhapoota. Shihapeelwa amaha ku nkolo zyonti na ku mpuga zyonti na ku njango zyonti na ku nsi zyonti. 8 Avhantu vhonti vhe vhakutendama pa nsi vhalishipuuta, vhonti vhe amazina gaavho gatásimviilwe kufuma pe ulwalo ulwa nsi lwávhisiilwe. Amazina gaavho gatásimviilwe mwi kalaata ilya vhulanzi ilya Hagonzi aha Mwene, aheene he hávholiilwe.
9 We ali na makutwi atejeelezye.
10 Umuntu we akwanzilwa kugomwa,
woope aliigomwa.
Umuntu we akwanzilwa kuuti avhantu vhamugoje kwi panga,
woope vhalimugoga kwi panga.
Pe ishi, avhantu avha Mulungu vhakwanzilwa vhavhe nu vhujimbiilizu nu lwitiho.
11 Nkalola ishihanu ishamwavho, shikuzuvha kumwanya kufuma pa nsi, shoope sháamile ni mpembe zivhili ngati hagonzi, ileelo shihayanga ngati liyoha. 12 Shihavhombela amaha gonti aga shihanu shiila ishitanzi pa luvhambo lwakwe. Pe shihayilajizya insi na vhonti vhe vhakutendama muumwo kuuti vhashipuute ishihanu ishitanzi, she uvhuvwalale vhwakwe uvhwa kushigoga wáponile. 13 Shihavhomba ishilolesyo ishipiti, poosye nu kuwiisya umwoto kufuma ku mwanya kwinza pa nsi ku minso ga vhantu. 14 Shihavhahopenkanya vhaala vhe vhakutendama pa nsi, ku vilolesyo viila vwe shápeliilwe kuvivhomba pa luvhambo ulwa shihanu shiila ishitanzi. Shihavhalajizya kuuti vhashigombele ishiholanyo isha shihanu isho, she sháali nu vhuvwalale uvhwa ipanga ileelo shihavha shipuuma.
15 Ishihanu isha vhuvhili shihapeelwa amaha aga kupuutila umwuyu mu shiholanyo shiila isha shihanu ishitanzi, inga ishiholanyo isho shiyanje. Havhili ishiholanyo isho shivhagoje vhonti vhe vhatakushipuuta. 16 Shoope ishihanu isha vhuvhili shihavhalajizya vhonti, avhapiti na vhansi na vhadumbwe na vhapiina na vhazya na vhe te vhazya kuuti vhapelwaje ivimanyilo ku nyoovhe zyavho izya ku ndiilo poosye pa vweni vwavho. 17 Havhili shihavhalajizya kuuti umuntu wonti atahasheele kukala poosye kukazya, nkandi inga ali ni shimanyilo shiila. Ishimanyilo isho lizina ilya shihanu shiila ishitanzi, poosye uvhwinji vhwa helufi izya izina lyakwe.
18 Ipa pakwanzilwa uvhushindamu uvhwa njeele. Wonti we ali ni njeele, ayivhaazye imbaazyo iya shihanu isho, mwe pe mbaazyo ya vhuntu.b Imbaazyo yaakwe ye yino, miya sita sitiini na sita.