12
Umwantanda ni yoha
1 Pisinda nkalola ishilolesyo ishipiti ku mwanya: Umwantanda we ázwaye izuvha, nu mwezi wáamile pa vinama vwakwe, havhili pi itwe lyakwe ázwaye ishipambwi isha kukonzya isha nzota kumi na mbiili. 2 Umwantanda ula áamile pa vhumwamu, ahakuutaga, ahavhavhwaga uvhuvhaavi uvhwa kupaapa.
3 Havhili nkalola ishilolesyo ishamwavho ku mwanya: Páamile iyoha ipiti ishemamu. Iyoha ilyo lyámile na matwe saba ni mpembe kumi, havhili mu matwe gaakwe mwámile ivipambwi saba ivwa vhumwene. 4 Ulusinda lwakwe luhakwesa iseluusi iya nzota izya ku mwanya, nu kuzigwisya pa nsi. Iyoha ilyo lihimiilila pilongolela ilya mwantanda ula we akwanza kupaapa, kuuti inga lwe apaapa, limulye umwana waakwe. 5 Pe umwantanda ula ahapaapa umwana umwanaavuli, we alivhakonzya avhantu avha mu nsi zyonti ku ndiisa iya shijela. Umwana waakwe ahanyatulwa kusogola kwa Mulungu, na ku shitengo shaakwe isha vhumwene. 6 Umwantanda ula ahashimbiilila kwi laala kwe uMulungu ámusenganiziinye, kuuti amusunje kunuukwo ku havhaliilizyo aha nsiku elufu mooja miya mbiili sitiini.
7 Pe kuhavha uvhulugu ku mwanya. UMikayeelia na vhahavhizya vhaakwe vhahalwa ni yoha liila, lyope lihalwa navho pooka na vhahavhizya vhaakwe. 8 Ileelo iyoha ilyo na vhahavhizya vhaakwe vháposiitwe, havhili pa vhuyo vhwavho patálolesile ku mwanya. 9 UMikayeeli na vhahavhizya vhaakwe vhahalisumbila pa nsi iyoha ilyo pooka na vhahavhizya vhaakwe. Iyoha ilyo ye njoha iya hali, ye wu Mukwalanzi nu Setano, we akuyihopela insi yonti.
10 Pe nkiivwa izwi ipiti kufuma ku mwanya likuti,
“Ishi, uMulungu wiitu avhaposile avhantu vhaakwe!
Ishi alolesya amaha gaakwe nu kukonzya fwe wu mwene!
Havhili uChilisiti waakwe alolesya amaha gaakwe!
Mwe pe uMikayeeli na vhahavhizya vhaakwe
vhamusumbiiye pansi umulonjeelezi uwa vhajenzi vhiitu,
uweene we akuvhalonjeelela kwa Mulungu wiitu,
uvhusiku nu musanya.
11 Vhoope vhahamupoota ku mavhanda aga Hagonzi aha Mwene,
na kwi izwi lye vhásimishiziizye.
Ivho vhe vhatahavhumwamihaga uvhupuuma vhwavho,
havhili vhatahogopaga kufwa.
12 Ishi pe seshelaaji, imwe mwe mwanya,
na mwe mukutendama muumwo!
Yasheela insi nu sumbi!
Mwe pe uMukwalanzi ayiisile kuli imwe nu mulaha umupiti nkaani,
amanyile kuuti ali na havhaliilizyo hansi vhweleele.”
13 Pe iyoha ilyo lwe lyalola kuuti vhalisumba pa nsi, lihamulandata umwantanda we ámupaafile umwana umwanaavuli. 14 Ileelo umwantanda ula ahapeelwa ivwapa vivhili ivwa ipuula ipiti, inga abulushe, asogole kwi laala pe uMulungu ámusenganiziinye. Ipo uMulungu akumusunga ku maaha gatatu ni nuusu, ukutali ni yoha ilyo. 15 Iyoha lihaswila aminzi inza ijenje kufuma mwi lomu lyakwe, mwisinda ilya mwantanda uyo, inga ijenje ilyo limwisye. 16 Ileelo insi yihamwavwa umwantanda, yihaasama ilomu lyakwe, yihalimila ijenje liila lye lyáfumile mwi lomu ilya iyoha ilyo. 17 Pe iyoha lihamuviitilwa nkaani umwantanda ula, liheepa nu kusogola kulwa uvhulugu na vhaana vhe vhásyaye avha mwantanda ula. Avhaana ivho vhe vhaala vhe vhakuzilema indajizyo izya Mulungu nu kufumwa uvhusimishizi uvhwa Yeesu Chilisiti. 18 Lyope lihimiilila pa lusenga ulwa sumbi.