15
Avhahavhizya saba ni mfwa saba
1 Pe nkalola ishilolesyo ishamwavho ku mwanya, ishipiti ni sha kusukumizya: Páamile avhahavhizya saba vhe vhali ni mfwa saba izya vhusililishilo. Ku mfwa saba izyo, uvhuhalazu uvhwa Mulungu vhulunjisile.
2 Nkalola ishintu ngati wu sumbi uwa igalaasi, asangiine nu mwoto. Nkavhalola avhantu vhaala vhe vháshipoosite ishihanu shiila ni shiholanyo shaakwe ni mbaazyo iya izina lyakwe.a Avhantu ivho vhímiliiye mu luvhazu ulwa sumbi uwa igalaasi, vháamile na mapango ge uMulungu ávhapiiye. 3 Vhahimbaga ulwimbo ulwa Moose,b umuvhomvi uwa Mulungu nu lwimbo ulwa Hagonzi aha Mwene, vhahatinji,
“MWENE Mulungu uwa Maha Gonti,
imbombo zyaho mpiti,
havhili zya kusukumizya nkaani!
Iwe Mwene wa nsi zyonti,
amadala gaaho ga muumwo,
havhili ga nalyoli!
4 We MWENE, avhantu vhonti vhakwanzilwa kukutiima!
Havhili vhonti vhakwanzilwa kukushindiha!
Iwe weeka we Mufinjile!
Insi zyonti zilikwinzila nu kukupuuta
mwe pe imbombo zyaho izya muumwo zilolesile.”
5 Lwe zyatuuha izyo, nkalola ku mwanya aPafinjile apa Mulungu mwi Heemac lyakwe ilya vhusimishizi pali ukwazi. 6 Pe avhahavhizya vhaala saba vhe vhali ni mfwa saba vhahafuma aPafinjile apa Mulungu. Avhahavhizya ivho vházwaye amenda amazelu ge gahanyengʼenyelaga na malamba aga sahaabu mu vifuvha vwavho. 7 Pe shooka mu viila ivipelwa vine shihaavhapa avhahavhizya ivho saba imbiga impiti saba izya sahaabu zye zyizuuye uvhuhalazu uvhwa Mulungu, uweene we mulanzi shiima shiima. 8 APafinjile apa Mulungu pízuuye ilyosi lye lyáfumiliine nu vhushindamu na maha aga Mulungu. Naawumo we áweziizye kwinjila aPafinjile kufishila lwe zyasila imfwa saba izya vhahavhizya vhaala saba.