8
Ishilemezanyo isha saba nu luvhiga ulwa sahaabu
1 AHagonzi aha Mwene lwe havunza ishilemezanyo isha saba kuhavha mwaa ku mwanya ku havhaliilizyo aha nuusu saala ishi. 2 Nkavhalola avhahavhizya saba vhe vhakwimiilila pilongolela ilya Mulungu, vhoope vhahapeelwa amasaji saba.
3 Woope uhavhizya uwamwavho ahinza ahimiilila pilongolela ilya shifinjilo she alemile ku nyoovhe uluvhiga ulwa sahaabu ulwa kusushizizya. Ahapeelwa ivwa kusuushizya ivwinji inga avhiishe pooka ni mpuuto izya vhafinjile vhonti pa shifinjilo isha sahaabu she shili pilongolela ilya shitengo isha vhumwene. 4 Ilyosi ilya vintu ivwa kusuushizya lihasuushila kwilongolela ilya Mulungu pooka ni mpuuto izya vhafinjile, kufuma ku nyoovhe ya havhizya. 5 Pe uhavhizya uyo ahanyatula uluvhiga, ahaponya umwoto uwa pa shishinjilo, ahawiitila pa nsi. Kuhavha uvhumeeme ni zwi lye likujilima ni shisumbi.
Amasaji saba
6 Pe avhahavhizya vhaala saba vhe vháali na masaji saba vhahayisengaanya kuuti vhagahome.
7 Pe uhavhizya umutanzi ahahoma isaji lyakwe, kuhavha imvula iya mavhwe nu mwoto vwe visangiine na mavhanda, vihasumbwa pa nsi. Pe iseluusi iya nsi yihananjiha, iseluusi iya makwi yihananjiha na masole amoolo gonti gahananjiha.
8 Woope uhavhizya uwa vhuvhili ahahoma isaji lyakwe, ishintu she shili fwe ligamba ipiti lye likwaha umwoto, shihasumbilwa mwa sumbi. Pe iseluusi iya sumbi yihavha mavhanda. 9 Vihafwa iseluusi iya vipelwa vwe vili nu vhupuuma, vwe vili mwa sumbi, havhili iseluusi iya meeli izya mwa sumbi yihananjiha.
10 Woope uhavhizya uwa vhutatu ahahoma isaji lyakwe, uluzota ulupiti luhagwa kufuma ku mwanya, lwe luhaahaga inza inyaale, luhagwila iseluusi iya majenje, ni seluusi iya viduda ivwa minzi. 11 Izina ilya luzota ulwo vhahatinji “Uluhali.” Pe iseluusi yooka iya minzi yihagalunkana kuvha nkali. Avhantu avhinji vhahafwa ku minzi igo, mwe pe gínzile gavha mahali nkaani.
12 Woope uhavhizya uwa vhune ahahoma isaji lyake, iseluusi iya izuvha ni seluusi iya mwezi ni seluusi iya nzota zihahomwa, inga iseluusi izyo zivhiishe ahiisi. Pe umusanya wutálamwizye iseluusi yaakwe pooka nu vhusiku vhweleele.
13 Nkeenya ku mwanya, nkiivwa izwi ilya ipuula lye likubuluha pahati pa mwanya, lihayanga kwi izwi ipiti kuuti, “Vhaafwa! Vhaafwa! Vhaafwa! Vhe vhakuvha pa nsi! Kuzya izwi ilya masaji ge gasyaye aga vhahavhizya vhatatu, vhe vhayisengiinye kuhoma.”