7
Uvhwinji vhwa vhantu ku mwanya
1 Lwe zyatuuha izyo, nkalola avhahavhizya vhane, vhimiliiye mu mbazu zine izya nsi. Avhahavhizya ivho vhahadindaga inkungu zine izya nsi inga inkungu yitahavugule pa nsi poosye pa sumbi poosye mwi kwi lyonti. 2 Inkalola uhavhizya uwamwavho akuzuvha kufuma ku vhutukulo, áali ni shilemezanyo isha Mulungu uweene we mulanzi. Ahavhavhuuzya kwi izwi ipiti avhahavhizya vhaala vhane, vhe vhápeliilwe amaha aga kuyinanganya insi nu sumbi, 3 ahati, “Mutahayinanganye insi poosye usumbi poosye amakwi, kufishila lwe twavhalemezanya ishilemezanyo avhavhomvi avha Mulungu wiitu pa vweni vwavho.”
4 Pe nkiivwa uvhwinji vhwavho vhe vhávhalemeziinye kufuma mu nkolo zyonti izya Vhaisilayeeli, avhantu miya mooja alubaayini na ine elufu.
5 Avha nkolo ya Yuuda elufu kumi na mbiili,
avha nkolo ya Lubeni elufu kumi na mbiili,
avha nkolo ya Gadi elufu kumi na mbiili,
6 avha nkolo ya Asheli elufu kumi na mbiili,
avha nkolo ya Nafutali elufu kumi na mbiili,
avha nkolo ya Manase elufu kumi na mbiili,
7 avha nkolo ya Simiyooni elufu kumi na mbiili,
avha nkolo ya Laawi elufu kumi na mbiili,
avha nkolo ya Yisaakali elufu kumi na mbiili,
8 avha nkolo ya Zabuloni elufu kumi na mbiili,
avha nkolo ya Yoosefu elufu kumi na mbiili,
havhili avha nkolo ya Benjamini elufu kumi na mbiili.
Impuga iya vhantu avha mu nsi zyonti
9 Lwe zyatuuha izyo, nkalola impuga impiti nkaani iya vhantu ye nuumo atangavhaazya. Avhantu kufuma mu nsi zyonti ni nkolo zyonti na mu mpuga zyonti na mu njango zyonti, vhimiliiye pilongolela ilya shitengo isha vhumwene na pilongolela ilya Hagonzi aha Mwene. Vhazwaye amenda amazelu havhili vhalemile amatundu aga matende. 10 Vhahayanga kwi izwi ipiti, vhahati,
“Uvhuposhi vhukufuma kwa Mulungu wiitu,
uweene we akutendama pa shitengo shaakwe isha vhumwene,
na ku Hagonzi aha Mwene.”
11 Avhahavhizya vhonti vhímiliiye imbazu zyonti izya shitengo isha vhumwene ni zya vhasongo ni zya vipelwa vine. Vhahakupama pilongolela ilya shitengo isha vhumwene nu kumupuuta uMulungu, 12 vhahati,
“Amina!
Intiimo nu vhushindamu nu vhushindamu uvhwa njeele,
havhili insalifwo nu mushinzi nu vhuvhwezyo na maha,
vili nu Mulungu wiitu shiima shiima.
Amina!”
13 Mu vhasongo ivho, wooka ahambuziilizya, ahati, “Avhantu ivha vhe vhazwaye amenda amazelu vhe vha naanu? Vhafumile kwoshi?” 14 Nkamwamula nkati, “We mwene, iwe umanyile.” Pe woope ahati, “Ivha vhantu, vhe vhafumile mu mayimba amapiti, vhoope vhahanzite amenda gaavho nu kugavhiiha kuvha mazelu mu mavhanda aga Hagonzi aha Mwene.
15 “Ye nongwa vhali pilongolela ilya shitengo isha vhumwene isha Mulungu.
Vhakumuvhombela uMulungu uvhusiku nu musanya mu Nyumba yaakwe iMfinjile,
woope we atendiime pa shitengo isha vhumwene aliivha pooka navho kuvhadiima.
16 Te vhahaalole inzala naalumo poosye ishinyooto,
havhili izuvha te lihavhooshe poosye ilunguula.
17 Mwe pe aHagonzi aha Mwene he hali pamwanya pa shitengo isha vhumwene halivhadiima.
Hoope halivhatwala ku viduda ivwa minzi ge gakufumwa uvhulanzi.
Havhili uMulungu woope alivhasyumula amansozi gonti ku minso gaavho.”