6
AHagonzi aha Mwene ni vilemezanyo
1 Pe nkalola aHagonzi aha Mwene hahavunza ishilemezanyo shooka. Nkiivwa ishipelwa shooka mu viila vine shikuyanga fwe lizwi lye likujilima, “Luvhiilo!” 2 Inkalola imfwalaasi inzelu, nu weene we áyilimbiiye áali nu vhwele, ahapeelwa ishipambwi isha kukonzya, pe ahafuma ku mwanya she akupoota uvhulugu havhili inga ajendeelele kupoota.
3 Pe lwe aHagonzi aha Mwene havunza ishilemezanyo isha vhuvhili, nkiivwa ishipelwa isha vhuvhili shikuti, “Luvhiilo!” 4 Yihafuma imfwalaasi inchemamu, nu weene we áyilimbiiye ahapeelwa amaha aga kwefwa uvhutehamu mu nsi inga avhantu vhagogane, woope ahapeelwa ipanga ipiti.
5 Pe lwe aHagonzi aha Mwene havunza ishilemezanyo isha vhutatu, nkiivwa ishipelwa isha vhutatu shikuti, “Luvhiilo!” Nkalola imfwalaasi inyiilu, nu weene we áyilimbiiye áali ni shipimilo mu nyoovhe zyakwe. 6 Nkiivwa fwe lizwi pahati iya vipelwa viila vine, likuti, “Ishiivho shooka isha ngana ku dinaalia yooka, ni vwivho vitatu ivwa shayiilib ku dinaali yooka, ileelo utahananganye amafuta poosye idivaayi.”
7 Pe lwe aHagonzi aha Mwene havunza ishilemezanyo isha vhune, nkiivwa ishipelwa isha vhune shikuti, “Luvhiilo!” 8 Nkalola imfwalaasi imvuutu nu weene we áyilimbiiye izina lyakwe wu Vhufwe, havhili woope uVhuzimu ahalandatana nawo. Vhoope vhahapeelwa amaha ku lobo iya vhantu inga vhavhagoje kwi panga na ku nzala na ku vhuvhinu na ku vihanu ivihali ivwa mu nsi.
9 Pe lwe aHagonzi aha Mwene havunza ishilemezenyo isha vhusaano, nkalola impepo izya vhantu zili pansi pa shifinjilo. Avhantu ivho vhe vhávholiilwe kuzya kulyitiha izwi ilya Mulungu na kuzya vhusimishizi vhwe vhahafumwaga. 10 Vhahakuuta kwi izwi ipiti, kuuti, “We Mwene uwa Maha Gonti, Mufinjile nu Wa Nalyoli, kuuti uhaavhe kufishila lyeli, kuvhalonga nu kuvhalanduzya avhantu vhonti avha pa nsi kuzya kwita amavhanda giitu?” 11 Pe vhonti vhahapeelwa amenda amazelu. Havhili vhahavhavhuuzya kuuti, vhaguliilile ku havhaliilizyo hansi, kufishila uvhwinji uvhwa vhavhomvi avhamwavho na vhajenzi vhaavho pe walunjiha. Ivho vhe avhalugu avha Mulungu avha pa nsi vhalivhagoga inza vheene vwe vhávhagozile.
12 Pe lwe aHagonzi aha Mwene havunza ishilemezanyo isha sita, nkiivwa ishisumbi ishipiti. Izuvha lihavha lyilu ngati ligunila lye litaviilwe ni nsinka, umwezi wonti wuhashemama inza mavhanda. 13 Inzota zihagwa pa nsi, ngati mavhula vwe gakupulula imbula lwe inkungu impiti yavugula. 14 Imwanya yiheepa, inza vwe ikalataasi likuzingwa, amagamba gonti ni nsi nyuumu izya pahati pa sumbi viheepa pa vhutendamo vhwavho.
15 Pe avhamwene avha mu nsi na vhapiti vha vhasikaali na vhapiti avhamwavho na vhadumbwe na vha maha na vhazya vhonti na vhe te vhazya vhonti, vhahazyihama mu ninga na pansi mu mavhwe aga magamba. 16 Ivho vhonti vhahagavhuuzya amagamba na mavhwe kuuti, “Tubongoshele, mutuzyishe, atahatulole uMulungu uweene we atendiime pa shitengo sha vhumwene. Havhili mutuzyishe kufuma ku mulaha uwa Hagonzi aha Mwene. 17 Mwe pe, isiku ipiti ilya mulaha waavho lifisile. Wu naanu we angimiilila?”