5
Ikalaata na Hagonzi aha Mwene
1 Ku nyoovhe iya ku ndiilo iya ula we átendiime pa shitengo isha vhumwene, nkalola ikalaata lye lisimviilwe muhati na munzi, lipinyiilwe ni vilemezanyo saba. 2 Nkalola uhavhizya uwa maha, akuvhuziilizya kwi izwi ipiti akuti, “Vhu naanu we ahondeeye kugubula ikalaata nu kuvunza ivilemezanyo vwakwe?” 3 Kutáali umuntu nuumo, ku mwanya poosye pa nsi poosye ku vhuzimu, we áhondeeye kugubula ikalaata ilyo poosye kulyenya muhati.
4 Pe ine nkanda kukuuta nkaani, mwe pe ntahashilola ishipelwa naashimo she sháhondeeye kuligubula poosye kulyenya muhati. 5 Pe, wumo mu vhaala avhasongo ahambuuzya ahati, “Utakuutaje! Yeenya, iNsama iya mu nkolo iya Yuuda, mu mpaapo izya mwene uDaavhudi, ye yipoosite uvhulugu.a Iyeene ye yihondeeye kuvunza ivilemezanyo ivwo saba, nu kugubula ikalaata ilyo.”
6 Pe nkalola pa mwanya pa shitengo isha vhumwene, aHagonzi aha Mweneb he háamile fwe havholiilwe, himiliiye. Házyunguliilwe ni vipelwa viila vine, pooka na vhaala avhasongo. Háamile ni mpembe saba na minso saba,c ge Mpepo sabad izya Mulungu zye ázisonteleziizye mu nsi yonti. 7 Hahinza kunyatula ikalaata liila ku nyoovhe iya ku ndiilo iya ula we átendiime pa shitengo isha vhumwene. 8 Lwe hanyatula ikalaata liila, ivipelwa viila vine pooka na vhasongo vhaala ishiliini na ine vhahakupama pilongolela ilya Hagonzi aha Mwene. Vhonti vháamile na mapango ni mbiga izya sahaabu zye zyízuuye ivwa kusuushizya. Ivwa kusuushizya ivwo zye mpuuto zya vhafinjile.
9 Vhoope vhahimba ulwimbo ulujeni vhahati,
“Uhondeeye iwe kulinyatula ikalaata ilyo
nu kuvunza ivilemezanyo vwakwe.
Mwe pe wávholiilwe, na ku mavhanda gaaho uhamukalila uMulungu,
avhantu kufuma mu nkolo zyonti na mu njango zyonti
havhili kufuma mu mpuga zyonti na mu nsi zyonti.
10 Uhavhinjizya mu vhumwene vhwaho nu kuvhavhiiha kuvha vhapuuti kwa Mulungu wiitu,
vhoope vhalikonzya insi zyonti.”
11 Pe, nkeenya, nkiivwa amazwi aga vhahavhizya avhinji vhe vháshizyunguluuye ishitengo isha vhumwene ni vipelwa vine na vhasongo vhaala ishiliini na ine. Uvhwinji vhwa vhahavhizya wáamile amaelufu na maelufu. 12 Vhahimba kwi izwi ipiti vhahati,
“AHagonzi aha Mwene he hávholiilwe
hahondeeye kuposheela uvhuvhwezyo nu vhudumbwe
nu vhushindamu uvhwa njeele na maha
nu mushinzi nu vhushindamu ni ntiimo!”
13 Pe, nkiivwa ivipelwa vwonti vwe vili ku mwanya na vwe vili pa nsi na vwe vili ku vhuzimu na vwe vili mwa sumbi vikwimba, vikuti,
“Uweene we atendiime pa shitengo isha vhumwene
na Hagonzi aha Mwene,
vhahondeeye kuposheela intiimo
nu mushinzi nu vhushindamu na maha gonti
shiima shiima.”
14 Ivipelwa viila vine vihati, “Amina.” Vhoope avhasongo vhaala ishiliini na ine vhahakupama nu kupuuta.