4
Ishitengo isha vhumwene ku mwanya
1 Lwe zyatuuha izyo, nkalola umulyango wigusile ku mwanya ni zwi liila itanzi lye nályivuuye inza izwi ilya isajia lihayanga niine, lihati, “Zuvha kwope uku, niine kwe nkulolesye zye kuuti zifumile mu havhaliilizyo he hakwinza.”
2 Naluvhiilo, uMupepo uMufinjile ahaniishila, nkalola ishitengo isha vhumwene shivhisiilwe ku mwanya she wumo atendamiiye. 3 Ula we áali pa shitengo ahamehaga ngati livhwe ilya yaasipi ni lya akiiki. Igombogombo lye lihamehaga inza izumaliidi,b lyáshizyunguluuye ishitengo shiila. 4 Havhili ivitengo ishiliini na ine vwáshizyunguluuye ishitengo shiila isha vhumwene. Mu vitengo ivwo vhátendiime avhasongo vhe vházwaye ivizwalo ivizelu ni vipambwi ivwa kukonzya ivwa sahaabu mu matwe gaavho. 5 Ku shitengo shiila isha vhumwene kuhafumaga uvhumeeme ni zwi lye likujilima. Pilongolela ilya shitengo isho zihaahaga inyaale saba izya sahaabu, izyo zye Mpepo saba izya Mulungu.c 6 Havhili páamile fwe wu sumbi uwa igalaasi, we áamile fwe livhwe lye likumeha nkaani.
Imbazu zyonti izya shitengo shiila isha vhumwene, páamile ivipelwa vine vwe vili nu vhupuuma havhili vwáli minso geeka kwilongolela na kwisinda. 7 Ishipelwa ishi tanzi sháholiine ni nsama, isha vhuvhili sháholiine ni ngwada, isha vhutatu ku minso sháholiine nu muntu ni sha vhune sháholiine ni puula lye likubuluha. 8 Vwope ivipelwa vine ivwo vwáli ni vwapa sitasita, havhili ivwapa ivwo vwámile na minso mu mbazu zyonti na muhati zyavho. Ivipelwa ivwo uvhusiku nu musanya vitakutuzyaga kuyanga kuuti,
“Mufinjile, Mufinjile, Mufinjile,
wu MWENE uMulungu uwa Maha Gonti,
uweene we áliipo, we aliipo, havhili we aliyinza.”
9 Uweene we atendiime pa shitengo isha vhumwene, we wu Mulungu we mulanzi shiima shiima. Ivipelwa ivwo, ahavhaliilizyo honti lwe vikumushindiha nu kumumwamiha nu kumusalifwa, 10 pe vhoope avhasongo vhaala ishiliini na ine vhakukupama. Vhakukupama pilongolela lyakwe uweene we atendiime pa shitengo isha vhumwene. Vhoope vhakumupuuta uweene we mulanzi shiima shiima, havhili vhakusumba ivipambwi vwavho pilongolela ilya shitengo isha vhumwene. Vhakuti,
11 “Uhondeeye iwe, Mwene wiitu nu Mulungu wiitu,
kuposheela uvhushindamu, nu mushinzi na maha.
Mwe pe wápezile ivintu vwonti,
na ku lusungwo lwaho vihapelwa havhili viliipo.”