3
Ukalaata uwa Yeesu ku shivhanza isha ku Sadi
1 “Uhavhizya uwa shivhanza isha ku Sadi musimbile uti:
Iga mazwi kufuma kwa Yeesu, ula we ali ni Mpepo saba izya Mulungu ni nzota saba:a Ndumanyile ulujendo lwaho, avhantu vhakulitiima izina lyaho kuuti we mupuuma, ileelo ufuuye. 2 Vhuuha! Uzigomwe ziila zye zipalamiiye kufwa, mwe pe ulujendo lwaho te lulunjisu ku minso ga Mulungu waane. 3 Pe ishi, ukumbushe vwe wáposheleeye na vwe wívuuye, uzileme izyo nu kupinduha. Ileelo inga utavhuuha, ndiyinza kwi dala ilya kwitushizya inza umwivha, pe te uhamanye ahavhaliilizyo he indiyinza kuli iwe.
4 Ileelo uli na vhantu vhansi ku Sadi vhe vhatayihandamiinie ku mbiivhi. Ivho vhe vhalisogola pooka niine she vhazwaye amenda amazelu, mwe pe vhahondeeye. 5 Ula we alipoota indingo, alizwala ivizwalo ivizelu inza vheene. Niine te nkalyefwe izina lyakwe mwi kalaata ilya vhulanzi,b nkandi ndilyitiha ku minso ga Taata waane na ku minso ga vhahavhizya vhaakwe.
6 We ali na makutwi atejeelezye ziila zye uMupepo uMufinjile akuvivhuuzya ivivhanza.”
Ukalaata uwa Yeesu ku shivhanza isha ku Filadelufiya
7 “Uhavhizya uwa shivhanza isha ku Filadelufiya musimbile uti:
Iga mazwi kufuma kwa Yeesu, ula we mufinjile, havhili uwa nalyoli, we ali ni shigulilo isha maha isha mwene uDaavhudi, uweene we inga ayigula nuumo uwa kugalila, havhili inga agalila nuumo uwa kwigula: 8 Ndumanyile ulujendo lwaho. Yeenya! Nkuvhishiiye umulyango we wuli ukwazi kwilongolela lyaho, we uwunji nuumo atangawugalila. Imanyile kuuti uli na maha mansi, ileelo ulisunjililiiye izwi lyane, havhili utalihaanile izina lyane. 9 Yeenyi! Ndivhaleetela imwe avha mwi sinagoogi ilya Setano, vhe vhakuyitaha kuuti Vhayuuda, ileelo lilenga. Ndivhapela vhinze kukusugamilila nu kumanya kuuti nkukunzite. 10 Mwe pe ulyitisile izwi lyane ilya kuvha nu vhujimbiilizu, niine ndikusunjiilila uheepe mu manda aga vhunanjisu ge gapalamiiye kwinza kuvhalinga avhantu avha mu nsi yonti. 11 Nkwinza naluvhiilo. Uleme nkaani she uli nasho, atahinze umuntu akufwule ishipambwi shaaho.c 12 Ula we alipoota indingo, ndimuvhiiha kuvha lupanda mu Nyumba iMfinjiled iya Mulungu waane, te ahaafume umwo naalumo. Kuli uyo, ndisimba izina ilya Mulungu waane ni zina ilya nkaaya iya Mulungu waane. Inkaaya iyo Yelusaleemue impwa ye yikwiha kufuma ku mwanya kwa Mulungu waane. Havhili kuli uyo ndisimba izina lyane neneene, liila lye lipwa.
13 We ali na makutwi atejeelezye ziila zye uMupepo uMufinjile akuvivhuuzya ivivhanza.”
Ukalaata uwa Yeesu ku shivhanza isha ku Laodikiya
14 “Uhavhizya uwa shivhanza isha ku Laodikiya musimbile uti:
Iga mazwi kufuma kwa Yeesu, ula we wu Amina, uhoome we mutungamu nu wa nalyoli, we akukonzya ivintu vwonti vwe uMulungu ápezile: 15 Ndumanyile ulujendo lwaho kuuti iwe te we muhatazu havhili te we mupwu. Kwashi inga waamile we muhatazu poosye inga we mupwu! 16 Ileelo mwe pe we mutuushizu, kuuti iwe te we muhatazu havhili te we mupwu, ndikutapiha ufume mwi lomu lyane. 17 Iwe ukuti, ‘Ne dumbwe, ndonsile nkaani, ntasovheliilwe naashimo.’ Ileelo utamanyile kuuti iwe we mudedevhazu, we wakufwilwa uvhwila, we mupiina, we ntonko havhili uli ishitali. 18 Nkukusoha kuuti, ukale ku kwane isahaabu ye vhazelufiizye mu mwoto, inga uvhe we dumbwe. Havhili hinza ukale ivizwalo ivizelu, uzwalaje nu kuzyiha ishitali shaaho inga utahaalole insoni. Ukale umulembo uwa kudwima mu minso gaaho inga ulolaje ahinza.
19 Vhonti vhe mbakunzite, nkuvhahalapila nu kuvhasunda, pe uvhe nu mute kutonta. 20 Yeenya! Ine nimiliiye ku mulyango nkwiguzya. Umuntu we ayiivwa izwi lyane nu kwigula umulyango, ndiyinjila ku kwakwe, niine ndiilya pooka nawo, woope pooka niine. 21 Ula we alipoota indingo, ndimwitishila kutendama pooka niine pa shitengo shaane isha vhumwene. Aliyiima inza ine ne nápoosite indingo, nkatendama pooka nu Taata pa shitengo shaakwe isha vhumwene.
22 We ali na makutwi atejeelezye ziila zye uMupepo uMufinjile akuvivhuuzya ivivhanza.”