2
Ukalaata uwa Yeesu ku shivhanza isha ku Hefeeso
1 UYeesu ahajendeelela kumbuuzya kuuti, “Uhavhizya uwa shivhanza isha ku Hefeeso, musimbile uti:
Iga mazwi kufuma kwa Yeesu, ula we alemile inzota saba ku nyoovhe yaakwe iya ku ndiilo,a we akujenda pahati pa visajishilo ivwa sahaabu ivwa nyaale saba: 2 Imanyile imbombo yaaho, umute waaho nu vhujimbiilizu vhwaho. Havhili imanyile kuuti utangavhajimbiilila avhatalamalandu, havhili uvhalinzile vhe vhakuyitaha kuuti vhatumwa fwandi te muumwo. Uhamanyinsanya kuuti vhi lenga. 3 Havhili uhagulililaga nu kujimbiilila kuzya izina lyane shisita kulita.
4 Ileelo indi ni zwi niiwe: Ushilesile ishikunzi shaaho ishitanzi. 5 Pe ukumbushe paala pe wáamile lwe ushiili kuteega. Upindushe, uzivhombaje imbombo intanzi. Ileelo inga utavhomba izyo, nkwinza naluvhiilo kuli iwe nu kusheefwa ishisajishilo isha nyaale pe shili. 6 Kuli izi nkukutiima, ukwilwa zye aVhanikolayib vhakuzivhomba, zye niine nkuzyilwa.
7 We ali na makutwi atejeelezye ziila zye uMupepo uMufinjile akuvivhuuzya ivivhanza. Ula we alipoota indingo ndimupa amantonongwa aga ikwi lye likufumwa uvhulanzi, lye lili mu shilimbika isha Mulungu.”c
Ukalaata uwa Yeesu ku shivhanza isha ku Simina
8 “Uhavhizya uwa shivhanza isha ku Simina, musimbile uti:
Iga mazwi kufuma kwa Yeesu, ula we Vhwandilo nu Vhusililishilo, we áfuuye havhili ahazyuha:d 9 Ngamanyile amayimba gaaho nu vhupiina vhwaho, ileelo nalyoli we dumbwe. Mbumanyile nu musaamu waavho vhe vhakuyitaha kuuti Vhayuuda, fwandi haa, ileelo vha mwi sinagoogie ilya Setano.f 10 Utogopaje amayimba ge kwe gakwagaje. Yeenya! UMukwalanzi kwe avhakunje avhamwinyu vhamo mu jeela inga avhalinje, pe kwe muyimbe insiku kumi. Uvhe we mutungamu poosye nu kufwa, pe ine ndikupa ishipambwi she vhulanzi uvhwa shiima shiima.
11 We ali na makutwi atejeelezye ziila zye uMupepo uMufinjile akuvivhuuzya ivivhanza. Ula we alipoota indingo te ahafwe ku vhufwe uvhwa vhuvhili.”g
Ukalaata uwa Yeesu ku shivhanza isha ku Pegamo
12 “Uhavhizya uwa shivhanza isha ku Pegamo musimbile uti:
Iga mazwi kufuma kwa Yeesu, ula we ali ni panga lye lihozile kwonti:h 13 Mpamanyile pe ukutendama, pe pa shinamwene isha Setano. Niiwe ukulyitiha izina lyane havhili utahaluhaana ulwitiho lwane, poosye mu havhaliilizyo ha hoome waane umutungamu uAntipa. Ula we avhantu vhámugozile kuli imwe paala pe uSetano akutendama.
14 Ileelo indi na mazwi mansi niiwe: Vhamo muli imwe vhakulandata insambiilizyo izya Baalamu. Ula we ámusambiiliziizye uBalaki kuvhapuvwa aVhaisilayeeli kuuti vhalye impuutile zye vháfumiizye ku vhalungu nu kuvhembuha.i 15 Havhili muli iwe vhamo vhakuzilandata insambiilizyo izya Vhanikolayi.j 16 Ishi leelo, pinduha! Inga utapinduha, nkwinza kuli iwe naluvhiilo, nu kulwa navho ni panga lye likufuma mwi lomu lyane.
17 We ali na makutwi atejeelezye ziila zye uMupepo uMufinjile akuvivhuuzya ivivhanza. Ula we alipoota indingo ndimupa imanak iya kukwilu. Havhili ndimupa ivhwe izelu lye lisimviilwe izina ipwa lye nuumo atalimanyile, nkandi we ula we akuliposheela.”
Ukalaata uwa Yeesu ku shivhanza isha ku Tiyatiila
18 “Uhavhizya uwa shivhanza isha ku Tiyatiila musimbile uti:
Iga mazwi ge akuyanga uMwana wa Mulungu, uweene we aminso gaakwe gakumeha ngati mwoto, havhili ivinama vwakwe vili ngati shaaba ye vhayizelufiizye nkaani:l 19 Ndumanyile ulujendo lwaho ni shikunzi shaaho nu lwitiho lwaho nu vhuvhomvi vhwaho pooka nu vhujimbiilizu vhwaho. Havhili ulujendo lwaho ulwa ishi lwinza kuluusya ulwa hali. 20 Ileelo indi ni zwi niiwe: Ukumujimbiilila umwantanda ula uYezebeli,m we akuyitaha kuuti mukuvhwi. Ileelo akuvhasambiilizya avhavhomvi vhaane nu kuvhapuvwa, kuuti vhavhembuhaje nu kulya impuutile zye vhafumiizye ku viholanyo. 21 Imupiiye ahavhaliilizyo aha kupinduha, ileelo atakwanza kuvhuleha uvhuvhembu vhwakwe. 22 Yeenyi! Ndimusumbila impungo ye alipotwaga nu kuvhuuha pa shilili. Havhili vhe vhakuvhembuha nawo ndivhayimvwa inga vhatakupinduha ku mbombo zyavho imbiivhi zye vhavhomvile nawo. 23 Havhili ndivhagoga avhalandati vhaakwe. Pe ivivhanza vwonti vilimanya kuuti ine ne nkwenyeelezya insiivho na mooyo. Niine ndimupa umuntu wonti muli imwe kulandatana na zye akuzivhomba.
24 Ileelo imwe muvhanji, mwe muli ku Tiyatiila mwe mutakuzilandata insambiilizyo izya Yezebeli, havhili mwe mutakusambiilila insambiilizyo izyo zye avhanji vhakuti insambiilizyo inkondezu nkaani, ileelo zya Mukwalanzi, nkuvhavhuuzya kuuti: Te nkavhatwishe umuzigo umumwamu havhili, 25 ileelo mulemaje nkaani she muli nasho, kufishila ahavhaliilizyo he ndiyinza. 26 Ula we alipoota indingo nu kulwenyeelezya ulujendo lwane kufishila ku mpeleela,
‘ndimupa amaha ku vhantu avha nsi zyonti.
27 Uweene alivhakonzya ku ndiisa iya shijela,
alivhabazulanya fwe nsonta iya ivhumba,’n
inza ine vwe mposheleeye amaha kufuma kwa Taata. 28 Niine ndimupa uluzota luula lwe lukulama nkaani inzanchi.
29 We ali na makutwi atejeelezye ziila zye uMupepo uMufinjile akuvivhuuzya ivivhanza.”