IShitushizya
isha Yeesu Chilisiti kwa Yoohani
1
Amazwi aga kutalishila
1 Ishi, shitushizya isha Yeesu Chilisiti.a UMulungu ámupiiye isheneesho inga avhavhonesye avhavhomvi vhaakwe zye kuuti zivhombeshe shisita kuhaavha. UYeesu ahamuvhonesya uYoohani umuvhomvi waakwe kutuushila kwa havhizyab waakwe. 2 Pe woope uYoohani ahasimishizya zyonti zye ázivhwenyi, zye lizwi ilya Mulungu nu vhusimishizi uvhwa Yeesu Chilisiti. 3 Alosiitwe we akuvhavhaazizya imwe amazwi aga vhukuvhwi vhwe vhusimviilwe umu, havhili mulosiitwe na mwe mukugatejeelezya nu kugalema. Mwe pe ahavhaliilizyo he kuuti galunjishe hapalamiiye.
Indamunkano
4 Ikalaata ili nsimvile ne neene ne Yoohani. Nkuvhasimbila mwe vha vivhanza saba ivwa ku nsi iya ku Aasiya. Muvhanje nu vhwila nu vhutehamu vhwe vhukufuma kwa Mulungu, uweene we áliipo na we aliipo na we aliyinza. Havhili muvhanje nu vhwila nu vhutehamu vhwe vhukufuma ku Mpepo sabac zye zili pilongolela ilya shitengo shaakwe isha vhumwene, 5 havhili vhwe vhukufuma kwa Yeesu Chilisiti. Uweene we wu hoome uwa nalyoli, we mutanzi kuzyuha, havhili we akukonzya avhamwene vhonti avha mu nsi.
UYeesu Chilisiti we atukunzite, havhili atusatuuye mu vhutalamalandu vhwitu, kutuushila mu mavhanda gaakwe. 6 Uweene we ahatwinjizya mu vhumwene vhwakwe nu kutuvhiiha tuvhe swe vhapuuti vha Mulungu, uTaata waakwe. Uvhushindamu nu vhuvhwezyo vhuvhe nu weene shiima shiima! Amina!
7 Yeenyi! Akwinza na mavhingo!
Avhantu vhonti vhalimulola,
poosye vhe vhámulasile ni mpalala,d
na vhantu avha nsi zyonti vhalikuuta
nu kuloosya ku zyakwe.
Nalyoli! Amina.
8 UMWENE uMulungu akuyanga akuti, “Ine ne Alufa havhili ne Omega,e uweene we áliipo na we aliipo na we aliyinza, havhili uweene wa Maha Gonti.”
UYoohani akumulola uChilisiti mu njozi iya pa minso amazelu
9 Ine ne Yoohani, ne wamwinyu havhili ne indi pooka ni mwe kuzya kumulandata uYeesu Chilisiti mu mayimba na mu vhumwene na mu vhujimbiilizu. Nákunziilwe mu nsi inyuumu, ye vhakuti Patimo ye yáamile pahati pa sumbi kuzya mayimba. Amayimba igo gáfumiliiye nu kulumbiilila Izwi ilya Mulungu nu kufumwa uvhusimishizi uvhwa Yeesu Chilisiti. 10 UMupepo uMufinjile ánishiiye pi siku ilya Mwene, nkiivwa izwi ipiti ngati lyi saji mwisinda lyane. 11 Izwi ilyo lihambuuzya lihati, “Izi zyonti zye ukuzilola, uzisimbe mwi kalaata. Lwe wazisimba, ulitwale ikalaata mu vivhanza saba ivwa mu nkaaya izya mu Hefeeso na mu Simina na mu Pegamo na mu Tiyatiila na mu Sadi na mu Filadelufiya ni ya mu Laodikiya.”
12 Pe nkashevhela inga imulole we akuyanga niine. Lwe nashevhela nkalola ivisajishilo ivwa sahaabu ivwa nyaale saba. 13 Pahati ya visajishilo nkamulola wumo we áali ngati Mwana wa Aadamu,c ázwaye inkanzu intali nu kuyipinya ilamba ilya sahaabu pa shifuvha. 14 Kwi itwe áali ni nsisi inzelu ngati masepe amazelu, havhili ngati nganda inzelu mpee na minso gaakwe gahamehaga ngati mwoto. 15 Ivinama vwakwe vihamehaga ngati shaaba ye vhayizelufiizye mwi syanilo, havhili izwi lyakwe lyáli ngati minzi aminji ge gakwishila ku nsaato. 16 Woope mu nyoovhe yaakwe iya ku ndiilo áamile ni nzota saba ni panga ihozu kwonti lihafumaga mwi lomu lyakwe. Ku minso kuhalamaga ngati lizuvha ihali nkaani.
17 Lwe namulola nkagwila pa vinama vwakwe ngati muntu we afuuye. Ileelo ahandema ni nyoovhe yaakwe iya ku ndiilo ahati, “Utogopaje! Ine ne Vhwandilo havhili ne Vhusililishilo, 18 uweene we Mulanzi. Ine náfuuye, ishi yeenya, ne mupuuma shiima. Ine indi ni vwigulilo ivwa vhufwe ni vwa ku vhuzimu.f