IShitushizya 9

¹ Woope uhavhizya uwa vhusaano ahahoma isaji lyakwe, nkalola uluzota lwe lwáfumile ku mwanya, luguuye pa nsi, lwope luhapeelwa ishigulilo isha ilivha ilya ku vhuzimu. ² Luhalyigula ilivha ilya ku vhuzimu, ilyosi lihasuuha kufuma mwi livha muula inza ilyosi ilya itanuli ipiti. Pe izuvha na ku mwanya kuhavha ahiisi kuzya ilyosi liila ilya mwi livha.

³ Avhamakanta vhahafuma mwi lyosi muula, vhahafuma panzi nu kusaata mu nsi yonti, vhahapeelwa amaha inza maha aga nkoonya. ⁴ Havhili, vhahapeelwa indajizyo kuuti vhatahananganye amasole aga pa nsi, amatundu, poosye ikwi lyonti, nkandi avhantu vhaala vhe vhatali ni shilemezanyo isha Mulungu pa vweni vwavho. ⁵ Havhili, avhamakanta ivho vhahapeelwa indajizyo kuuti vhatahavhagoje avhantu ivho, nkandi vhavhayimvwe ku havhaliilizyo aha meezi gasaano. Uvhuvhaavi vhwavho vhwámile inza uvhuvhaavi vhwa nkoonya, lwe yikumuluma umuntu. ⁶ Amanda igo avhantu vhalilondola uVhufwe, ileelo te vhahavhulole naalumo. Vhalinyonywa kufwa, ileelo uVhufwe vhulivhashimbila.

⁷ Amavhili aga vhamakanta ivho gáali ngati mfwalaasi zye ziyisengiinye ku vhulugu, pa matwe gaavho páali ngati vipambwi ivwa kukonzya ivwa sahaabu. Havhili pa minso gaavho vháamile fwe vhantu. ⁸ Vháamile ni nsisi ngati nsisi zya vhantanda, amiino gaavho gáamile ngati miino ga nsama. ⁹ Ku vifuvha vwavho vházwaye impinjiho izya vijela. Ivwapa vwavho vihivwihaga ngati mazwi aga makokoteeni aga mfwalaasi zye zikushimbiilila ku vhulugu. ¹⁰ Vháamile ni nsinda ngati zya nkoonya na mimvwa, mu nsinda izyo mwámile amaha aga kuvhavwalazya avhantu ku havhaliilizyo aha meezi gasaano. ¹¹ Vháamile nu mwene, we wu havhizya uwa kwi livha ilyaku vhuzimu, izina lyakwe ku Shihebuuli wu Abadoni na ku Shiyunaani wu Apoliyoni, kwe kuuti We Akulovwa.

¹² Imfwa intanzi yatuuha, zyasyala imfwa izyamwavho zivhili zye kuuti zyinze.

¹³ Pe uhavhizya uwa sita ahahoma isaji lyakwe, nkiivwa izwi lyoka lye lyáfumile mu vipembe viila vine ivwa shifinjilo isha sahaabu she shili pilongolela ilya Mulungu. ¹⁴ Izwi ilyo lihamuvhuuzya uhavhizya uwa sita we áali ni saji kuuti, “Uvhigulile avhahavhizya vhane vhe vhakunziilwe kwi jenje ipiti uEfulati.” ¹⁵ Uhavhizya ula ahavhasatula avhahavhizya vhaala vhane. Vhápezile vhayisengiinye ku saala liniili na kwi siku liniili na ku mwezi wunuuwu na ku mwaha wunuuwu kuuti vhagoje iseluusi iya vhantu. ¹⁶ Nkiivwa uvhwinji uvhwa mpuga izya vhasikaali vhe vhakulimbila imfwalaasi, zyámile miliyoni miya mbiili.

¹⁷ Ishi vwe návhwenyi mu njozi zyane izya pa minso amazelu, ku mfwalaasi izyo na vhe vhakuzilimbila: Ku vifuvha vwavho vháali ni mpinjiho, impinjiho izyo zyáli inchemamu, ni mbuluulu ni ntolomvu. Havhili amatwe aga mfwalaasi izyo gáamile ngati matwe aga nsama, mu malomu gaavho muhafumaga umwoto, ilyosi ni saalufa. ¹⁸ Umwoto ni lyosi ni saalufa zye mfwa zitatu zye zihafumaga mu malomu aga mfwalaasi, zyágozile iseluusi iya vhantu. ¹⁹ Amaha aga mfwalaasi izyo gáamile mu malomu gaavho na mu nsinda zyavho, mwe insinda zyavho zyáli ngati njoha, havhili zyáli na matwe, zyope zye zihavhavwalazyaga avhantu.

²⁰ Avhantu vhe vhásyaye, vhe vhatáfuuye ku mfwa izyo, vhahahaana kupinduha kuzya mbiivhi zyavho. Vhatahapinduha kuzya kuvhasugamilila avhaseetano ni viholanyo ivwa sahaabu ni vwa mpiiya ni vwa shaaba ni vwa mavhwe ni vwa makwi. Iviholanyo ivwo vwe vitangaalola poosye kwivwa poosye kujenda. ²¹ Havhili vhatápindusile kuzya vhugozi vhwavho, poosye kuzya vhulozi vhwavho, poosye kuzya vhulugusu vhwavho, poosye kuzya vhwivha vhwavho.