On tlen Dios okiprometerouilij David
132
NoTEKO, xkelnamiki David,niman xkelnamiki nochi tlen okijyouij.
2 Xkelnamiki on tlen omitstlajtolmakak,
tejua akin tiiDios Jacob,
yejuan nochi ueli tikchiua,
3 ijkuak ijkin okijtoj:
"Nejua xnikalakis nokalijtik,
nion ninotekas para ninoseuis,
4 nion xnikintsakuas nixtololojuan,
nion nikochis maski achijtsin,
5 hasta kaman niknextia kampa chantis toTEKO,
yejuan iDios Jacob, yejuan nochi ueli kichiua."
6 Ijkuak tinemiyaj ipan on ueyi kalpan Efrata,
otikakej kiteneuaj on yekcaja de ipacto toTEKO,
niman otiknextitoj ipan on tlajli Jaar.
7 ¡Ma tiuiyan ipan iyektiopan toTEKO!
¡Ma titotlakuantelketsatij ixpan!
8 Xmokuiteua tej, toTEKO,
niman xuajla ipan moyektiopan kampa timoseuis,
tejua iuan moyekcaja yejuan kiteititia moueyipoder.
9 On motiopixkauan ma notlakentikan ikan chipauak tlakentli
yejuan kiteititis ika kipiyaj yolmelajkilistli,
niman on yejuan yolchipajkej motech ma tsajtsikan ikan paktli.
10 Xseli yejua on rey yejuan yotiktlapejpenij,
pampa tejua otikmakak David motekitkau,
sen melauak tlajtolmakalistli.
11 ToTEKO okimakak David sen melauak tlajtolmakalistli
yejuan xuelis nonenekis kichiuas.
12 Ijkin okijlij:
"Tla motlakakoneuan kitlakamatij nopacto
niman kintlakamatij notlanauatiluan yejuan aman nikinmaka,
tla ijkon, intlakakoneuan yejuamej tlamandaroskej para nochipa."
13 ToTEKO yokitlapejpenij on tepetl Sión
para ompa chantis.
14 Ijkin okijtoj:
"In yejua tepetl kampa nejua ninoseuis para nochipa;
nikan nichantis pampa nejua ijki nikneki.
15 Nejua nitlatiochiuas ipan in ueyikalpan
para sanoyej ma onya tlakuajli,
niman on mayankej nochipa kipiyaskej tlen kikuaskej.
16 On tiopixkej nikintlakentis ikan tlakentli de tetlanilistli,
niman on yejuan yolchipajkej notech,
tsajtsiskej ikan miyek paktli.
17 Nikchiuas para ompa itlakamekayo David
oksejpa ma kipiya poder.
On rey yejuan yoniktlapejpenij nemis
ken sen tlauijli yejuan tlauilos para nochipa.
18 Nikchiuas ma nopinajtikan on itlauelikniuan,
pero yejua nochipa ueyixtias ken rey."