Dios yejua intemakixtijkau on israelitas
124
¿Tlinon topan nochiuaskia tla toTEKO xtechpaleuiskia?Ma kijtokan aman on israelitas:
2 "Tla toTEKO xtechpaleuiskia
ijkuak on totlauelikniuan otechuijsokej,
3 techmijmiktiskiaj tinochimej
ijkuak yejuamej sanoyej kualantikatkaj touan.
4 Tla ijkon tej, ken tatokoskiaj,
¡ken techxopejtikisaskia sen sanoyej ueyi atl!
5 ¡ken techantikisaskia on atl yejuan sanoyej kojtik notlaloua!"
6 ¡Ma tikyekteneuakan toTEKO,
pampa xotechtekauilij ma techmiktikan totlauelikniuan!
7 Pampa ouel otikiskej kampa yotechtlatlalilijkaj.
Otikiskej ken sen tototl ueli kisa kampa kitlatlaliliaj.
On tlatlalijli otsayan, niman tejuamej otontlatlaksakej.
8 ToTEKO, san yejua ueli techpaleuiya,
yejua, yejuan okichijchiu on cielo niman in tlaltikpaktli.