Jacob oyaj Egipto
46
Israel,
yejuan no itoka katka Jacob,
okajsik iojui iuan nochi on tlen kipiyaya.
Niman ijkuak oajsik Beerseba,
okimakak sen uentli iDios Isaac,
on itataj.
2 Niman on tlayoua Dios okinots Israel ipan sen tlatlachalistli ken temiktli,
niman okinots ikan itoka.
Okijlij:
—¡Jacob!
¡Jacob!
Niman Jacob okinankilij:
—Nikan ninemi.
3 Kemaj Dios okijlij:
—Nejua niDios.
Nejua niiDios motataj.
Maka xmomojtij tias Egipto pampa ompa nikchiuas para mouejkakoneuan sanoyej miyekiyaskej hasta nochiuaskej sen ueyi nación.
4 Nejua nias mouan ne Egipto,
niman sakin* nikinkixtis mouejkakoneuan ompa.
Niman no,
ijkuak timikis,
motelpoch José nemis mouan.
5 Kemaj itelpochuan okitlejkoltijkej Jacob imintataj,
niman inkoneuan niman iminsiuauan ipan on carretas yejuan on rey okintitlan niman oyajkej.
Niman ijki Israel okis de Beerseba.
6 Jacob niman nochi iuejkakoneuan okinuikakej iminyolkauan niman nochi on tlen kipiyayaj yejuan okitlankej ipan on tlajli Canaán,
niman oyajkej Egipto.
7 Oyajkej iuan nochi ikoneuan niman ixuiuan yejuan tlakamej niman siuamej.
Ikoneuan niman ixuiuan Jacob iuan Lea
8-15 In yejua imintoka itelpochuan niman iuejkakoneuan Jacob yejuan oyajkej Egipto.
Nochi in tlakamej katkaj ikoneuan niman ixuiuan Jacob yejuan okimpix iuan Lea yejuan otlakatkej ijkuak nemiyaj ipan on tlajli Padan-aram.
No ijki,
okipixkej se imichpoch yejuan itoka katka Dina.
Nochi kech ikoneuan niman ixuiuan Jacob,
katkaj 33 ijkuak oyajkej Egipto.
In yejuamej katkaj:
Rubén yejuan iyenkuiyou,
ikoneuan katkaj:
Hanok,
Falú,
Hezrón niman Carmi.
Simeón ikoneuan katkaj:
Jemuel,
Jamín,
Ohad,
Jaquín,
Zohar niman Saúl yejuan katka ikoneu sen siuatl cananea.
Leví ikoneuan katkaj Gersón,
Coat niman Merari.
Judá ikoneuan katkaj Sela,
Fares niman Zara.
(Ikoneuan yejuan imintoka Er niman Onán omikkej Canaán.)
Niman ikoneuan Fares katkaj:
Hezrón niman Hamul.
Isacar ikoneuan katkaj:
Tola,
Fúa,
Job niman Simrón.
Zabulón ikoneuan katkaj:
Sered,
Elón niman Jahleel.
Ikoneuan niman ixuiuan Jacob iuan Zilpá
16-18 Nochi in tlakamej ikoneuan katkaj niman ixuiuan Jacob yejuan okimpix iuan Zilpá yejuan oyajkej Egipto inmiuan.
(Zilpá katka on esclava yejuan Labán okimakak Lea on ichpoch.)
Inkoneuan niman inmixuiuan Jacob iuan Zilpá katkaj majtlaktli uan chikuasen.
In yejuamej katkaj:
Gad ikoneuan katkaj:
Zifión,
Hagui,
Ezbón,
Suni,
Eri,
Arodi niman Areli.
Aser ikoneuan katkaj:
Imna,
Isúa,
Isúi,
Bería niman iminikniu yejuan itoka katka Sera.
Ikoneuan Bería katkaj:
Heber niman Malquiel.
Ikoneuan niman ixuiuan Jacob iuan Raquel
19-22 In yejuamej ikoneuan katkaj Raquel niman Jacob.
Yejuamej 14 katkaj.
Ikoneuan Raquel,
yejuan isiuau Jacob,
imintoka katka:
José niman Benjamín.
José ne Egipto okimpix ikoneuan iuan Asenat isiuau.
(Asenat ichpoch katka Potifera,
yejuan katka sen tiopixki ipan on ueyikalpan On.)
Inkoneuan katkaj Manasés niman Efraín.
Benjamín ikoneuan katkaj:
Bela,
Bequer,
Asbel,
Gera,
Naamán,
Ehi,
Ros,
Mupim,
Hupim niman Ard.
Ikoneuan niman ixuiuan Jacob iuan Bilha
23-27 In yejuamej ikoneuan katkaj Jacob iuan Bilha.
Yejua on esclava yejuan Labán okimakak Raquel ichpoch.
Niman sakin*,
Raquel okimakak Jacob para ma nochiua itlakpasiuau.
Ikoneuan niman ixuiuan Jacob iuan Bilha chikomemej katkaj.
In yejuamej katkaj:
Dan,
ikoneu katka Usim.
Neftalí ikoneuan katkaj:
Jahzeel,
Guni,
Jeser niman Silem.
Nochimej on tlakamej yejuan oyajkej Egipto iuan Jacob katkaj:
ikoneuan,
ixuiuan niman ika okpa ixuiuan.
Yejuamej okimpojkej 66,
pero xokimpojkej isiuamouan.
Pero iuan on ome ikoneuan José yejuan otlakatkej Egipto,
nochimej on ifamilia Jacob onochijkej 70 yejuan oajsikej ompa ne Egipto.
Jacob oyaj ne Egipto iuan ifamilia
28 Niman Jacob okititlan Judá ma yakatstiu para ma kitati José niman ma kimachistiti para ma kinamikiki ipan on tlajli Gosén.
Niman ijkuak Jacob niman ifamilia oyejkokej Gosén,
29 José otlanauatij ma kuajuikilikan icarreta yejuan kitilanaj caballos para yas konnamikis itataj.
Niman ijkuak oajsik ixpan itataj,
okinapaloj niman ouejkau choka ipan ikechpan.
30 Niman Israel okijlij José:
—Aman ye uelis nimikis pampa melauak nikitstikaj moxayak ika nixtololojuan niman onimitsnextij sanken* tinemi.
31 José okinmijlij ikniuan niman nochi ifamilia itataj:
—Nias nikontas on rey para nikmachistis ika yonenyejkokej.
Nikijlis ika nokniuan niman ichanejkauan notataj yejuan nemiyaj ipan on tlajli Canaán ye uajlajtokej para nokauaskej nouan.
32 Niman kinuajuikatokej iminborregos,
iminuakaxuan niman nochi on tlen kipiyaj pampa imintekiu katka kintlajpiyaj borregos niman kinmiskaltiaj yolkej.
Ijkon nikijlis.
33 Kemaj ijkuak on rey mechnotsas niman mechtlajtoltis ipan tlinon nentekitij,
34 xkijlikan ika nochipa nenkinmiskaltiaj yolkej sa no ijki ken kichiuayaj nemoachtojtajuan.
Ijkon mechkauilis nemokauaskej ipan in tlajli Gosén pampa on egipcios kintlajyelitaj yejuan kimpiyaj borregos niman xkinekij nemiskej inmiuan.