José okinminotitij ikniuan
45
José xok kixikouaya para xchokas imixpan itekitkauan yejuan ompa nemiyaj.
Niman chikauak okijtoj:
“¡Xkisakan nochimej nemejuamej yejuan nennemij nikan!”
Kemaj nochi itlapaleuijkauan okiskej pampa José kinekiya nemis iselti iuan ikniuan para kiminnotitis.
2 Kemaj yejua opeu chikauak choka hasta on egipcios okakkej.
Niman on tlen nochijtikatka omachiyato hasta ipan on ueyi palacio kampa nemi on rey.
3 Niman José okinmijlij ikniuan:
—Nejua niJosé.
¿Sanken nemi notataj?
—Xuajlakan notech.
Niman ijkuak ononisiuijkej itech,
yejua okinmijlij:
—Nejua nemokniu José yejuan onennechnamakakej para onechajuikakej ipan in tlajli Egipto.
5 Maka xmomojtikan,
nion maka xmixkomakatiakan pampa onennechnamakakej.
Dios onechajtitlan achtoj para nitlayekanas nikan para nikinmanauis inemilis miyek tlakatl.
6 Yopanok ome xipan ikan mayantli ipan in tlajli,
pero sanken* poliui okse makuijli xipan ijkuak xonyas nion achijtsin pixkistli niman xok yakaj uelis tlatokas.
7 Dios tej,
onechajtitlan nikan achtoj de nemejuamej para touejkakoneuan uelis nomanauiskej ipan in país.
Nemejuamej nenchantiskej nikan hasta kaman yejkos on sanoyej ueyi temanauilistli.
8 Melauak xnemejuamej onennechajtitlankej nikan.
Yej Dios onechtlalij para nikpaleuiya niman niktlakanonotsa on rey.
Yejua onechtlalij ma nitlamandaro ipan ichan,
niman ma ninochiua gobernador ipan nochi in país Egipto.
9 Aman tej,
xuiyan nimantsin kampa nemi notataj,
niman xkijlikan:
“Ijkin kijtoua mokoneu José:
‘Dios onechtlalij ma nitlamandaro ipan nochi in país Egipto.
Yejua ika,
xuajla niman.
Maka xmouejkaua.
10 Tiuelis tinemis nikan kampa itoka Gosén ipan in tlajli Egipto.
Ijkon tej,
tinemis nisiu notech iuan mokoneuan,
moxuiuan,
nochi moyolkauan niman nochi on tlen tikipiya.
11 Nikan nimitsmakas tlakuajli para nochi mofamilia niman nochi yejuan nemij mouan para maka itlaj mechpolos.
Sanken onyas in mayantli okse makuili xipan.
Tla xtiuajlas iminuan nochimej on yejuan nemij mouan niman nochi on tlen nenkipiyaj,
sanoyej nentlajyouiskej.’”
12 Kemaj José okinmijlij ikniuan:
—Aman nemejuamej nenkitaj niman nokniu Benjamín no kita,
ika nejua melauak niJosé akin nemechnotstika.
13 Melauak xkijlikan notataj tlinon tekiuajyotl nikpiya nikan Egipto,
niman nochi on tlen nenkitaj nikan.
San noneki amanaman xkanatij notataj.
14 José ika nochi iyojlo okinapaloj ikniu Benjamín,
niman ouejkau choka ikechpan.
Niman Benjamín no okinapaloj,
niman ochokak ijkuak kinapalojtikatka José.
15 Kemaj José okintenkuaj sesentemej ikniuan niman ochokak ijkuak okinnajnapaloj.
Niman kemaj ikniuan okinekej okinojnotskej.
16 Niman ipan ipalacio on rey,
okakkej ika oajsikej ikniuan José niman sanoyej opakkej on rey niman nochi itlapaleuijkauan.
17 Niman on rey okijlij José:
—Xkinmijli mokniuan ma kintlamamaltikan iminyolkauan niman ma nokuepakan Canaán,
18 niman xnechajuikilikan nemotataj niman nochi ifamilia.
Nejua nikinmakas on tlajli yejuan más kuajli ipan nochi in tlajli Egipto.
Niman kikuaskej on tlen más kuajli yejuan in tlajli kitemaka.
19 Xkimijli ma kinuikakan carretas de Egipto para ma kinuajuikakan iminsiuauan iuan inkoneuan niman nemotataj.
20 Maka ma komatstiakan on tlen kuajkajteuaj,
pampa nochi on tlen kuajli yejuan onkaj ipan in país Egipto inyaxka yes.
21 Niman ijki okichijkej itelpochuan Israel.
Niman José okinmakak carretas ken on rey otlanauatij,
niman okinmakak tlakuajli para ipan ojtli.
22 No ijki,
okinmakak tlakentli* yenkuik para ma notlapatilikan,
pero Benjamín okimakak 300 tepostomin de plata niman makuijli itlaken para notlapatilis.
23 Niman para itataj José,
okititlanilij majtlaktli polokomej* yejuan otlamamajtiajkej ika on tlen más kuajli tlajtlamach* on tlen onkaj ipan on tlajli Egipto.
Niman no okinmakak okse majtlaktli siuapolokomej* yejuan otlamamajtiajkej ikan trigo,
pan niman tlakuajli para ma tlakua itataj ipan ojtli.
24 Niman kemaj José okinnajnauatij ikniuan,
niman okinmijlij:
—Maka nemokamauijsoktiaskej ipan ojtli.
Niman yejuamej oyajkej.
25 Okiskej Egipto niman oajsikej Canaán kampa nemiya imintataj Jacob.
26 Niman ijkuak okitlajtlajtouilijkej Jacob ika José saken nemi niman yejua tlamandaroua ipan nochi Egipto,
xkimatiya tlinon kijtos,
nion tlinon kichiuas,
pampa xueliya kineltoka.
27 Pero okitlajtlajtouilijkej nochi on tlen José okijtoj,
niman ijkuak okintak on carretas yejuan José okintitlan para kinuikaskej,
sanoyej oyolpak.
28 Niman kemaj okijtoj:
“Tlakaj melauak,
nokoneu José sanken* nemi,
niman nias nikontas chika xe nimiki.”