Icopa José
44
Sakin,
José okichtakaijlij itekitlayekankau:
—Xkintemilti imincostal in tlakamej ikan trigo nochi kech uelis kiktiskej,
niman xkintlalili intomin cada se ipan itempan imincostal.
2 No ijki,
xtlali nocopa de plata ipan icostal inmikniu yejuan piten iuan itomin yejuan ika okitlaxtlau on trigo.
Niman on tekitlayekanketl okichiu ken José okinauatij.
3 Ijkuak otlanes,
José okinkauilij ikniuan ma uiyan iuan iminpolokouan.
4 Pero xe uejka yayaj de on ueyikalpan ijkuak José okijlij itekitlayekankau:
—Xuiya xkintoka on tlakamej,
niman ijkuak tikominnajsis xkinmijli:
“¿Tline nenkikuepaj on tlen kuajli ika on tlen xkuajli?
¿Tline onenkichtekej on copa de plata
5 yejuan noteko kitekitiltia para ika atli niman para ika tetlatejtemouilia?
¡Nenkichiua on tlen sanoyej xkuajli!”
6 Ijkuak on tekitlayekanketl okinmajsito,
okinmijlij nochi in tlajtlamach*.
7 Niman on iknijtin okilijkej:
—¿Tlinon para titechijlia ijkin?
¡Tejuamej xkaman ijkon tikchiuaj!
8 Tla oksejpa otiualajkej desde Canaán,
otiuajlakej para otikuepakoj on tomin yejuan otiknextikej ijtik tocostaluan ¿Tline tikichtekiskej oro noso plata de ichan moteko?
9 ¡Ma miki san akinon de tejuamej motekitkauan yejuan tiknextilis on copa,
niman tejuamej titochiuaskej moesclavos!
10 Kemaj on tekitlayekanketl okijtoj:
—Kuajli yes tlen nenkijtouaj,
pero san on yejuan kipiya on copa esclavo yes.
On sekimej xkipiyaskej tlajtlakojli.
11 Niman cada se de yejuamej amanaman okitemoltij icostal niman okitlapoj.
12 Niman on tekitlayekanketl okitejtemoj ipan cada costal.
Opeu ika on yejuan yenkuiyotl niman otlan iuan on yejuan piten.
Niman on tekitlayekanketl okinextij on copa ipan icostal Benjamín.
13 Kemaj on iknijtin okitsayankej intlaken ika sanoyej onajmankej.
Niman kemaj okintlamamaltijkej iminpolokouan niman onokuepkej ipan on ueyikalpan.
14 Ijkuak Judá niman ikniuan oajsikej ichan José,
yejua sanken* ompa nemiya.
Niman on iknijtin onotlakuantelketskej ixpan,
niman onopachokej hasta ipan tlajli,
15 niman José okinmijlij:
—¿Tline ijkon nenkichiuaj?
¿Tlen xnenkimatij ika sen tlakatl ken nejua kimati ikan tlatejtemoualistli on tlen kichtakachiuaj sekimej?
16 Kemaj Judá okijtoj:
—¿Ken ijki uelis timitsnankiliskej?
¿Ken ijki uelis tikijtoskej ika xotikchijkej?
Dios techitstikaj ika otitlajtlakojtokej.
Yejua ika,
nikan tinemij,
niman timoesclavos yeskej iuan on yejuan kipiya on copa.
17 Pero José okijtoj:
—Ka,
xijki.
Yej san yejua on yejuan kipiya on copa noesclavo yes.
Niman nemejuamej uelis nenmokuepaskej ika kuajlotikaa hasta ichan nemotataj.
Judá okinek ma kitsakuakan ipampa Benjamín
18 Kemaj Judá okinisiuij José niman okijlij:
—Nejua nimitsyemankatlajtlanilia noteko para xnechkauili nimitsijlis itlaj.
Xnechikneli,
maka tikualanis noka maski tinemi ken on rey.
19 Achtoj tejua otitechtlajtoltij tla tikpiyayaj totataj niman de okse tokniu.
20 Niman otimitsijlijkej ika tikpiyaj totataj yejuan ueuentsin,
niman tikpiyaj sen tokniu yejuan san telpokatsin yejuan otlakat ijkuak totataj ye ueuentsitsin katka.
Niman otimitsijlijkej ika totataj sanoyej kitlajsojtla* ika sa yejua nokaua de on isiuau yejuan ome okipiyalij ikoneu,
pampa on okse ikniu omik.
21 Kemaj otitechtlajtlanij ma tikuajuikakan pampa tiknekiya tikitas.
22 Niman otimitsijlijkej ika on telpokatsin xuelis kuajkajteuaskia itataj,
pampa tla kajteuaskia,
itataj mikiskia.
23 Pero tejua otitechijlij tla yejua xuajlaskia touan,
xok titechseliskia.
24 ’Kemaj ijkuak otitokuepkej itech totataj,
otiktlajtlajtouilijkej nochi on tlen otitechijlij.
25 Kemaj,
sakin* totataj otechijlij ma tiuajlakan ma tikouakij achijtsin trigo.
26 Pero tejuamej otikijlijkej:
‘Xuelis tiuajlaskej tla tokniu yejuan piten xuajlau touan.
Tla xtouan yas,
xuelis tikontaskej on tlakatl,
pero tla touan yas,
kemaj tiaskej.’
27 Kemaj totataj otechijlij:
‘Nenkimatij ika nosiuau onechmakak ome nokoneu.
28 Niman se opoliu,
niman niknemilia ika sen tepeyolki tekuani okimiktij niman okikuaj pampa hasta aman xnikita.
29 Tla nenkuikaskej uejka in okse nokoneu,
niman tla itlaj xkuajli ipan onochiu,
nenkichiuaskej para in ueuentzin ma miki ikan ajmantli.’
30 ’Yejua ika,
tla tokniu xnokuepas touan,
31 totataj ika ueuentsin amanaman mikis ika ajmantli ijkuak xok kitas.
Niman tikpiyaskej tlajtlakojli ipampa imikilis.
32 Nejua onikijlij notataj para ma kaua ipan noma niman nicuidaros.
No ijki,
onikijlij para tla xnikuepilia,
kemaj nikpiyas tlajtlakojli ixpan para nochipa.
33 Yejua ika,
nimitsyemankatlajtlanilia,
xnechkauili yej nejua ma ninokaua,
nejua ken yejua yeskia,
niman yejua ma uiya.
Nimitsyemankatlajtlanilia xkauili yejua ma uiya iuan ikniuan.
34 ¿Ken ijki uelis ninokuepas niman nikitas notataj,
tla nokniu xyau nouan?
¡Xnikxikos nikitas kenijkitlajyouis notataj!”