Ikniuan José onokuepkej Egipto iuan Benjamín
43
On mayantli más sanoyej otlanau ipan on país.
2 Jacob niman ifamilia okitlamijkej nochi on trigo yejuan okuitoj Egipto.
Kemaj Jacob okinmijlij itelpochuan:
—Xuiyan oksejpa xkouatij trigo.
3 Pero Judá okijlij:
—On tlakatl otechchikajkaijlij ika xuelis tikitaskej tla xtikuikaj tokniu piten.
4 Tla tikauilis ma uiya touan Benjamín,
tiaskej tikonkouaskej trigo.
5 Pero tla xtikauilis ma uiya,
xtiaskej pampa san nenkaj.
On tlakatl otechijlij tla xtikuikaj tokniu piten,
xuelis tikitaskej.
6 Kemaj Israel okijtoj:
—¿Tline nennechchiuiliaj tlen sanoyej xkuajli?
¿Tline onenkijlijkej on tlakatl ika nenkipiyaj okse nemokniu?
7 Niman yejuamej okinankilijkej:
—Otikijlijkej pampa yejua techtlajtoltiaya miyek de tejuamej niman tofamilia.
Otechtlajtoltij tla saken nemi totataj,
niman tla tikpiyaj okse tokniu.
Niman san tiknankiliayaj on tlen techtlajtoltiaya.
¿Ken ijki tikmatiskiaj ika techijliskia ma tikuikilikan tokniu?
8 Niman Judá okijlij Israel,
on itataj:
—Tla tiknekij tinemiskej,
xkauili ma uiya Benjamín.
Nejua nicuidaros niman tiaskej nimantsin.
Ijkon xtimikiskej,
nion tejua,
nion tejuamej,
nion tokoneuan.
9 Niman tla itlaj ipan nochiua,
nejua notlajtlakol yes.
Tla xnimitskuepilia,
tla ijkon,
nikpiyas tlajtlakojli mixpan para nochipa.
10 Tla xtitouejkauaskiaj,
yej tiaskiaj niman,
maniskia yotiuajtokuepatoj ika okpa.
11 Kemaj itataj okijtoj:
—Pampa xokuitlaj tlen uelis tikchiuaskej,
xchiuakan yejua in:
Xkintemakan nemocostaluan ika on tlajtlamach* yejuan más kuajli tlaki nikan ipan totlal para xtlayokolikan on tlakatl.
Xkiktilikan achijtsin bálsamo de okotsotl,
nekutli,
ajuialistli,
mirra,
nueces niman almendras.
12 No xkiktikan okse ichkich on tomin yejuan omechkuepilijkej ipan nemocostaluan.
Kas san onopopolojkej.
13 Niman xkuikakan nemokniu Benjamín niman oksejpa xkitatij on tlakatl.
14 Dios yejuan kipiya nochi poder ma mechikneli.
Ma mechpaleui ixpan on tlakatl para ma kimakaua on okse nemokniu niman Benjamín para ma nokuepakan nemouan.
Niman nejua,
tla noneki nikimpolos nokoneuan,
maski ijki ma nochiua.
15 Kemaj itelpochuan Jacob okuikakej Benjamín inmikniu.
Okiktikej on tetlayokoliltin para José niman okse ichkich tomin.
Oyajkej oisiutiajkej hasta Egipto.
Ompa oasijkej hasta ixpan José.
16 Ijkuak José okitak Benjamín iminuan uajlaya,
okijlij itekitlayekankau yejuan más ueyixtikaj ipan ichan:
—Xkinuika in tlakamej nochan.
Xmikti sen uakax niman xkuektlali pampa tlakuaskej nouan aman tlakualispan.
17 On tekitlayekanketl okichiu ken José okinauatij,
niman okinuikak ichan.
18 Pero ikniuan José sanoyej onomojtijkej pampa kinuikayaj ichan José.
Ijkin okinojlijkej:
—Otechajuikakej nikan ipampa on tomin yejuan otechkuepilijkej ijkuak achtoj otiualajkaj.
Aman techtechtis otikichtekilijkej,
niman uelis techtekitiltiskej ken esclavos,
niman no techinkuiliskej toyolkauan.
19 Kemaj ijkuak oajsikej kampa kalakij ipan ichan José,
ononisiuijkej itech on tekitlayekanketl,
20 niman okilijkej:
—¡Xtechkaki toteko!
Tejuamej kamanonon melauak yotiualajkaj otikouakoyaj trigo.
21 Kemaj otiakej niman otajsikej kampa tikochiskiaj ipan ojtli.
Ijkuak otiktlapojkej tocostaluan otiknextikej totomin ipan itempan cada costal.
Kuajli ajsitikatka totomin yejuan ika otiktlaxtlajkaj on trigo.
Niman aman otiualajkej para tikuepaskej.
22 Niman no otikuajkikej más tomin para tikouaskej okseki trigo.
Pero xtikmatij akinon okitlalij on toachtojtomin ipan tocostaluan.
23 Niman on tekitlayekanketl okinmijlij:
—Xmoyoltlalikan.
Maka sa xkomatstiakan.
Kas nemoDios niman iDios nemotataj okitlalij on tomin ipan nemocostaluan pampa nejua onikselij on tomin yejuan onenechmakakej.
Kemaj on tekitlayekanketl okixtij Simeón niman okuikak kampa nemij on iknijtin.
24 Kemaj okinuikak nochimej san sekan ikalijtik José.
Niman okinmakak atl para ma nokxipajpakakan niman no okintlamakak impolokouan.
25 Niman yejuamej okuektlalijkej on tlen kimakaskiaj José,
niman okichixtijkej para ma ajsi tlakualispan pampa okakkej ika tlakuaskiaj iuan.
26 Ijkuak José oajsik ichan,
yejuamej onotlakuantelketskej niman onopachojkej hasta ipan tlajli para okitlakaitakej.
Kemaj okuajkikej on tetlayokoliltin niman okimakakej.
27 Niman José okintlajtoltij ikniuan ken nemij niman no okintlajtoltij:
—¿Ken nemi nemotataj,
on ueuentsin yejuan onennechijlijkej?
¿Sanken nemi?
28 Niman yejuamej okilijkej:
—Totataj,
motekitkau,
sanken* nemi niman kuajli nemi.
Kemaj onotlakuantelketskej niman onopachojkej hasta ipan tlajli para okitlakaitakej.
29 Niman José okixtemoj Benjamín niman okinextij.
Yejua kuajli ikniu katka yejuan okitlakatilij Raquel inanaj.
Niman José okijtoj:
—¿In yejua nemokniu piten yejuan onennechijlijkej?
Niman José okijlij Benjamín:
—¡Ma Dios mitstiochiua nokoneu!
30 Ijkuak José ijkin okijtoj,
sanoyej oyolpak ika okitak ikniu.
Yejua ika,
sanoyej chokasnekiya,
kemaj nimantsin okalakito ikalijtik niman ompa sanoyej ochokak.
31 Sakin,
ijkuak yonoyoltlalij,
onixamij niman onokuep intech ikniuan.
Kemaj okinmijlij itekitkauan:
“¡Xtechtlamakakan!”
32 José okitlamakakej iselti ipan sen mesa,
ikniuan ipan okse,
niman ipan okse mesa okintlamakakej on egipcios yejuan iuan tlakuanij José.
Ijkon okichiu pampa on Egipcios xtlakuayaj iminuan on hebreos* pampa kintlajyelitayaj.
33 José okinmijlijtiaj ikniuan cada se kanon notlalis.
Okintlatlalijtiaj ken onentiajkej,
ika opeu yejuan yenkuiyotl hasta otlamito ika on yejuan piten.
Yejuamej on iknijtin sanoyej okintlatlachaltij niman sa nootayaj.
34 Kemaj okinmakakej on tlakuajli yejuan okuikej ipan imesa José.
Pero Benjamín okimakakej makuilpa ichkich más miyek xken on oksekimej.
José niman ikniuan san seknek otlaonikej* niman otlakuajkej ikan miyek pakilistli.