José okijtoj tlinon kijtosneki itemik on rey
41
Ijkuak yopanoka ome xipan,
se tonajli on rey okipix sen temiktli.
Okitemik ika yejua ijkaya itenko on río Nilo,
2 niman chikome uakaxtin yejuan kualtsitsimej niman tomajkej uajkisayaj ijtik on río niman ompaka tlakuajkuajtinemiyaj ipan sakayoj.
3 Kemaj no okisakoj okse chikome uakaxtin yejuan xkualtsitsimej niman tejteuakej.
Niman onotelketskej itempan on río,
intechika on oksekimej.
4 Kemaj on uakaxtin yejuan xkualtsitsimej niman tejteuakej,
okinkuajkej on chikome uakaxtin kualtsitsimej niman tojtomajkej.
Niman kemaj on rey otlachix.
5 Sakin,
oksejpa okoch niman okipix okse temiktli.
Kitaya sen ikojyo trigo kipiyaya chikome imiyauayo.
Niman cada miyauatl sanoyej tejtentikatka ikan itlakyo.
6 Kemaj onoskaltij okse chikome imiyauayo on trigo yejuan uakej niman pitsajkej pampa okintlatij on ajakatl yejuan oualeu kampaka ikisayan tonaltsintli.
7 Niman on chikome imiyauayo trigo yejuan uakej okinkuajkej on chikome imiyauayo yejuan sanoyej tejtentikatkaj ikan itlakyo.
Kemaj on rey otlachix niman okimat ika san temikiya.
8 Pero uajmostla kualkan nion xiyolika nemiya,
niman otlanauatij ma uajlakan nochimej on yejuan tetlatejtemouiliaj niman nochimej on tlamatkej* tlakamej ipan on tlajli Egipto.
Niman on rey okinmijlij itemik,
pero nion se de yejuamej xouel okijlij tlinon kijtosneki.
9 Kemaj on tlakatl yejuan tekitiya itekiu para kimaka ivino on rey,
okelnamik José niman okijlij on rey:
—Aman nikelnamiki on tlen xkuajli nikchijtikaj.
10 Ijkuak otikualanka notechika,
niman no itechika on tlayekanki panchijketl otitechtitlanka tiomemej ipan cárcej kampa chanti intlayekankau on tlakamej yejuan cuidarouaj on cárcel.
11 Ipan se tlayoua on tlayekanki panchijketl niman nejua otikpixkej sesekneka temiktli.
12 Niman ompa ipan on cárcel onen touan sen hebreo* telpochtli yejuan iesclavo katka on tlayekanki de on carcejtlajpixkej.
Ijkuak on hebreo* otiktlajtlajtouilijkej totemik,
yejua otechijlij tlinon kijtosneki.
13 Niman nochi onochiu ken otechijlij.
Nejua oninokuep oksejpa ipan notekiu niman on okse okechpilojkej.
14 Kemaj on rey otlatitlan ma kinotsatij José,
niman amanaman okixtijkej ipan on cárcel.
José onaltij,
onotentsonxin,
okipatlak itlaken,
niman oyaj ixpan on rey.
15 Niman on rey okijlij:
—Onikpix sen temiktli niman xakaj ueli nechijlia tlinon kijtosneki.
Pero onechijlijkej ika ijkuak tejua tikaki sen temiktli,
tiueli tikmati tlinon kijtosneki.
16 Niman José okinankilij:
—On xnejua notech onkaj;
pero Dios yejua mitspanextilis tlinon kijtosneki motemik.
17 Niman on rey okijlij José:
—Ipan notemik nikitaya ika nijkatikatka itenko on río Nilo.
18 Niman ipan on río okiskej chikomemej uakaxtij tojtomajkej niman kualtsitsimej yejuan tlakuajkuajtinemiyaj ompaka.
19 Kemaj no okisakoj okse chikome uakaxtin yejuan xkualtsitsimej niman tejteuakej.
¡Xkaman nikintaya uakaxtin sanoyej techijchikiltikej ipan nochi in tlajli Egipto!
20 Niman in uakaxtin tejteuakej niman xkualtsitsimej okinkuajkej on uakaxtin yejuan tojtomajkej.
21 Pero maski okinkuajkej xotomajkej.
Sanken tejteuakej katkaj.
Niman kemaj onitlachix.
22 Sakin,
onikpix okse temiktli kampa nikitaya ika chikome miyauatl de trigo,
sanoyej tlaktikatkaj niman kualtsitsimej.
In miyauamej noskaltiayaj san ipan se ikojyo trigo.
23 Kemaj okse chikome miyauamej no noskaltiayaj pero uej pilinkej,
uakkej,
niman pitsajkej pampa okintlatij on ajakatl yejuan oualeu kampaka ikisayan tonaltsintli.
24 Yejuan in chikome miyauamej yejuan pitsajkej,
okinkuajkej on chikome miyauamej yejuan sanoyej tlaktikatkaj.
Nejua onikintlajtlajtouilij notemik on tlakamej yejuan tetlatejtemouiliaj,
pero nion se xouel onechijlij tlinon kijtosneki.
25 Kemaj José okijlij on rey:
—On ome temiktli yejuan otikpix,
sano yejua kijtosneki,
niman Dios mitsmachistijtikaj on tlen yejua kichiuas.
26 On chikome uakaxtin yejuan kualtsitsimej kijtosneki chikome xipan,
niman on chikome imiyauayo trigo yejuan kualtsitsimej no kijtosneki chikome xipan.
27 Niman on chikome xkualtsitsimej uakaxtin tejteuakej yejuan okinuajtokakej on sekimej,
kijtosneki chicome xipan.
Niman on chikome imiyauayo trigo yejuan pitsajkej,
yejuan ouakkej ika on ajakatl yejuan oualeu kampaka ikisayan tonaltsintli,
no kijtosneki chikome xipan ijkuak onyas mayantli.
28 In yejua nochiuas ijkon ken nimitsijlijtikaj pampa Dios mitsmachistijtikaj on tlen yejua kichiuas.
29 Uajlas chikome xipan ijkuak sanoyej tlatlakis ipan nochi in país Egipto.
30 Pero sakin*,
uajlas chikome xipan ijkuak onyas mayantli.
Niman on mayantli ajsis nochiuiyan ipan nochi in país Egipto hasta xakaj kelnamikis ken achtoj otlatlakka Egipto,
pampa tlatlajtlamis ipan in país.
31 Onyas sanoyej ueyi mayantli,
hasta on tlakamej kelkauaskej ken sanoyej tlatlakkiya.
32 Tejua otikpix ome temiktli yejuan sano yejua kitosneki,
pampa Dios yokijtoj ika melauak kichiuas,
niman xok uejkatika ika kichiuas.
33 ’Yejua ika tej,
aman kuajli para nimitsijlis:
“Xtejtemo sen tlakatl yejuan tlamachilisyej niman tlamatki* para kipiyas ueyi tekiuajyotl ipan in país Egipto.
34 Ijkin xchiua tejua rey:
xtlanauati ma kintlalikan gobernadores nochiuiyan ipan nochi in país para keuaskej se costal de cada makuijli costal yejuan kipixkaskej ipan in país Egipto.
Ijkin xchiuakan ipan nochi on chikome xipan ijkuak sanoyej tlatlakis.
35 Ikan motlanauatil ma kisentlalikan niman ma kejeuakan on trigo ipan nochi on uejueyikalpanmej ipan on chikome xipan ijkuak tlatlakis,
para tlakuaskej on chanejkej.
36 Ijkon nejeuas on trigo para on tlakamej ipan in país maka apismikiskej ipan on chikome xipan ijkuak onyas mayantli.”
José okalak gobernador ipan on país Egipto
—¿Kanon uelis tiknextiskej okse tlakatl ken yejua in yejuan kipiya iespíritu Dios?
39 Niman kemaj on rey okijlij José:
—Pampa san tejua omitsmachistij Dios nochi in tlajtlamach*,
xnemi yejuan más tlamachilisyej,
niman yejuan más kimati xken tejua.
40 Ijkon tej,
momak nokauas nochi on tlen noyaxka* nikan ipan nopalacio.
Niman nochi tlakatl ipan nopaís kitlakamatis nochi tlen tiknauatis.
San nejua más niueyixtias xken tejua pampa nejua nirey.
41 Xkita,
nejua nimitstlalia gobernador ipan nochi in país Egipto.
42 Ijkuak on rey ijkon okijtoj,
okinokixtilij ianillo ipan imajpil yejuan kipiyaya on sello,
niman okitlaliltij José ipan imajpil.
Kemaj otlanauatij ma kitlakentikan ika tlakentli* lino yejuan más kuajli niman ma kitlalilikan ikechtlan sen koskatl de oro.
43 Kemaj okijlij ma tlejko ipan on carreta yejuan kitilanaj on caballos yejuan nochipa kitokatiu on rey.
Niman otlanauatij ma kiyekantiakan niman chikauak ma kiteijlitiakan:
“¡Xmotlakuantelketsakan!
¡Nikan uajlau José yejuan tlamandaroua nochiuiyan ipan in país Egipto!
¡Xkauilikan ma pano!”
Ijkon tej,
on rey okalaktij José,
gobernador ipan nochi on tlajli de Egipto.
44 Kemaj on rey okijlij:
—Nejua nirey,
niman nejua nikijtoua ika xakaj uelis itlaj kichiuas ipan nochi in Egipto tla tejua xtikauilia.
45 On rey okitokayotij José,
Zafnat-panea,
niman okinamiktij iuan Asenat,
ichpoch Potifera on tiopixki ipan on ueyikalpan itoka On.
Niman nochiuiyan ipan Egipto nochimej okixmatkej José.
46 José kipiyaya 30 xipan ijkuak opeu kitekipanoua on rey de Egipto.
Kemaj José ononauatij iuan on rey,
niman opeu yau nochiuiyan ipan nochi on país Egipto.
47 On tlajli sanoyej kuajli otlatlakitij ipan on chikome xipan.
48 Niman José okejeu nochi on trigo yejuan otlak imanian Egipto ipan on chikome xipan.
Okejtiajkej ipan cada ueyikalpan on trigo yejuan okisentlalijkej ompaka nijnisiu itech cada kalpan.
49 Niman José okisentlalij sanoyej miyek trigo,
ijkon ken onkaj miyek xajli itenko mar.
Sanoyej miyek katka on trigo hasta xok ouel okijkuiloj pampa xok ouel okitemachiu.
50 Ijkuak xe peuaya on xipan de mayantli,
José okipix ome ikoneu iuan Asenat,
isiuau.
51 On achtoj okitokayotij Manasésa.
Ijkon okitokayotij pampa okijtoj:
“Dios okichiu ma nikelkaua nofamilia niman nochi on tlen onikijyouij.”
52 On ika ome ikoneu okitokayotij Efraínb.
Ijkon okitokayotij pampa okijtoj:
“Dios okichiu ma nikimpiya nokoneuan ipan in tlajli kampa yonitlajyouij.”
53 Otlan on chikome xipan ijkuak sanoyej otlatlak ipan on país Egipto,
54 niman kemaj opeu on chikome xipan ijkuak xok otlatlak.
Ijki onochiu ken José okijtojka.
Niman onkatka mayantli ipan nochi países de ompaka nijnisiu,
pero ipan nochi on país Egipto onkatka tlakuajli.
55 Ijkuak on egipcios opeu mayanaj,
oyajkej okitlajtlanilitoj trigo on rey,
niman on rey okinmijlij nochimej on egipcios:
“Xuiyan xkitatij José niman xchiuakan on tlen yejua mechijlis.”
56 Ijkuak on mayantli oajsik nochiuiyan ipan nochi on país,
José okintlapoj nochi on uejueyi kaltin kampa yejtikatka trigo para okinnamakiltij on egipcios pampa on mayantli sanoyej chikauak katka.
57 No ijki,
on tlakamej de nochiuiyan on países ajsiyaj Egipto para konkouayaj trigo itech José,
pampa ipan nochi on países,
xonkatka tlinon kikuaskej.