José okijtoj tlinon kijtosneki on ome temiktli
40
Opanok miyek tonaltin,
niman on tlakatl yejuan itekiu katka para kimakaya vino on rey de Egipto,
niman on intlayekankau on panchijkej itech on rey,
okichijkej tlen xkuajli itech on rey.
2 Yejua ika,
on rey okualan inmiuan on omemej tlayekankej,
3 niman otlanauatij ma kintsakuakan ipan carcel kampa chanti intlayekankau on tlakamej yejuan cuidarouaj on carcel.
Ijkon tej,
on omemej nemiyaj san seknek kampa José tsakutikatka.
4 On carcejtlajpixki okinauatij José ma kincuidaro in omemej itekitkauan on rey.
Niman yejuamej ouejkakej nemij ipan on carcel.
5 Ipan sen tlayoua on yejuan kimachiliaya ivino on rey,
niman on yejuan kichijchiuaya pan cada se okipix,
sen temiktli.
Niman cada temiktli kipiyaya tlinon kijtosnekiya.
6 Ipan on kualkan ijkuak José okintato,
okimintak ika nion ximinyolika nemiyaj,
7 niman okinmijlij:
—¿Tline sanoyej nenmajmanaj?
8 Niman yejuamej okilijkej:
—Tejuamej cada se otikpixkej sen temiktli,
niman xnemi akinon techijlis tlinon kijtosneki.
Niman José okinmijlij:
—Dios yejua temachistia tlinon kijtosneki sen temiktli.
Aman tej,
xnechijlikan tlinon onenkitemikej.
9 Kemaj on tlakatl yejuan itekiu katka para kimachilis itlailis on rey okijlij:
—Ipan notemik nikitaya sen uvajmekatl
10 yejuan okipix yeyi imakojyo.
Niman on uvajmekatl oitsmolin,
niman oxochipon,
niman okipix itlakyo yejuan iksik.
11 Nejua nikpixtikatka icopa on rey ipan noma.
Kemaj nikpatskaya on uvas ipan on copa niman on copa niktlaliaya ipan ima on rey.
12 Niman José okijlij:
—On motemik ijkin kijtosneki.
On yeyi imakojyo on ovajmekatl kijtosneki yeyi tonajli.
13 Ipan yeyi tonajli on rey mitskixtis nikan,
niman mitstlalis oksejpa ipan motekiu.
Niman oksejpa tikmakas icopa ken achtoj tikchiuaya.
14 Ijkuak ijkon nochiuas,
xnechelnamiki niman xnechikneli.
Xtlajtlajtouili on rey de nejua para ma nechkixti ipan in carcel.
15 Nejua onechichtekej ipan on tlajli kampa nemij hebreos*.
Xnechnamiki ninemis nikan pampa xitlaj* onikchiu tlen xkuajli.
16 Ijkuak on tlayekanki de on panchijkej okak ika kualtsin on tlen José okijtoj,
yejua no okijlij itemik.
Ijkin okijlij:
—Nejua no onikpix sen temiktli kampa nikitaya ika nikuapanuiyaya yeyi chikiutli ikan pan.
17 On chikiutli yejuan tlakpak kipiyaya nochi sesentlamatik pan para on rey.
Pero on totomej uajlayaj niman kikuayaj on tlen onkatka ipan nochikiu yejuan nikuapanuijtiaya.
18 Kemaj José okijlij:
—Yejua in kijtosneki motemik:
On yeyi chikiutli ika pan,
kitosneki yeyi tonajli.
19 Yejua ika tej,
ipan yeyi tonajli on rey mitskixtis de nikan niman mitskechtsontekis.
Kemaj kichiuas ma mitsajkopilokan ipan sen kojtli* niman on totomej kuaskej monakayo.
20 Uajuiptla,
iluiu katka on rey,
niman okichiu sen ueyi iluitl para nochimej on iuejueyitekitkauan.
Niman imixpan nochimej itenotskauan,
on rey otlatitlan ma kinkixtikan ipan carcel on yejuan kimachiliaya ivino niman no on tlayekanki panchijketl.
21 Niman on yejuan kimachiliaya ivino,
oksejpa okitlalij ipan itekiu,
niman oksejpa opeu kimaka icopa ken achtoj.
22 Pero otlanauatij para on panchijketl ma kechpilokan ipan sen kojtli.
Ijki onochiu ken José okitoj.
23 Pero maski ijkon onochiu,
on yejuan kimachiliaya ivino on rey xokelnamik José.