José iuan Potifar
39
On ismaelitas tlanamakakej okuikakej José hasta Egipto.
Ompa okikou sen tlakatl itoka Potifar.
Yejua tlayekanki intech isoldados on rey yejuan kitlajpiyaj on palacio.
2 Pero toTEKO nemiya iuan José niman okichiu para nochi ma kisa kuajli yejuan José kichiuaya ichan iteko.
3 Niman iteko okitak ika toTEKO nemiya iuan José,
niman kitiochiuaya,
niman nochi on tlen kichiuaya kisaya kuajli.
4 José okipaktij iteko.
Yejua ika,
okitlalij tlajtlajmatki itech,
niman no okalaktij ken itekitlayekankau intech nochimej on tekitkej,
niman no okimaktilij nochi tlen kipiyaya.
5 Niman de on tonajli ijkuak Potifar okimaktilij José ichan niman nochi on tlen kipiyaya,
toTEKO opeu más kitiochiua Potifar,
niman ifamilia,
niman nochi on tlen kipiya ipan ichan niman ipan campo.
6 Ijkuak José onokau tlayekanki ipan nochi on tlen kipiyaya Potifar,
yejua xok nokuaxotlaltiaya itlaj ika,
yej san ika on tlakuajli yejuan kikuaya.
Nochi onkatka imak José niman nochi kisaya kuajli.
José niman isiuau Potifar
José kualtsin tlajtlachaya niman nochimej kipakaitayaj ken nouikaya,
7 yejua ika san xuejkajtika,
isiuau Potifar opeu keleuiya.
Niman se tonajli okijlij:
—Xmoteka nouan.
8 Pero José xokinek,
niman okinankilij:
—Xkita,
moueuentsin okau ipan noma nochi on tlen iyaxka* para ma nicuidarouli,
niman xkipiya tlinon ika nokuaxotlaltis pampa yejua kimati ika nikan ninemi.
9 Ipan in kajli xakaj más tlayekana,
yej san nejua.
Noteko nechkauilia nochi ma nikitski.
San tejua xniuelis nimitsmayauis pampa tiisiuau.
Tla ijkon tej,
¿tline nikchiuas mouan on tlen sanoyej xkuajli mouan,
niman ijkon nitlajtlakos itech Dios?
10 Niman maski yejua mojmostla kijliaya José,
ma noteka iuan,
José xokichiu,
nion xokinisiuij kampa nemiya.
11 Pero se tonajli José okalak ichan iteko,
para kichiuaskia itekiu.
Niman pampa xakaj okse tekitketl ompa nemiya,
12 on siuatl okajsik ipan itlakenpani niman okijlij:
—Xmoteka nouan.
Pero José okistikis niman okajteu itlakenpani ipan imauan on siuatl.
13 Niman ijkuak on siuatl okitak ika José yoontlaktsak niman okajteu itlakenpani ipan imauan,
14 otsajtsik chikauak niman okinnots itekitkauan,
niman okinmijlij:
—Xkitakan,
in hebreo* yejuan noueuentsin otechajuikilij,
san ouajlaj para techpijpinajtis.
Okalak nikan niman nechchiualtisnekiya iuan ma ninoteka,
pero nejua onitsajtsik chikauak.
15 Niman ijkuak onechkak ika sanoyej chikauak onitsajtsik,
okistikis hasta nikan okajteu itlakenpani.
16 Kemaj on siuatl okeu itlakenpani José chika yejkoya iueuentsin.
17 Niman okijlij ken okinmijlij on tekitkej,
niman okijlij:
—On esclavo hebreo* yejuan otitechajuikilij,
okalak nokalijtik kampa ninemiya,
niman kinekiya iuan ma ninoteka.
18 Pero ijkuak onitsajtsik chikauak,
okistikis niman nikan okajteu itlakenpani.
19 Ijkon onechchiuilij moesclavo.
Niman iteko José sanoyej okualan ijkuak okak on tlen isiuau kijlijtikatka.
20 Kemaj okajsik José,
niman otlanauatij ma kalaktikan ipan cárcel kampa nemij nochimej on tlakamej yejuan kintsakua on rey.
21 Pero toTEKO xokikau José.
Yej okititij iueyitetlajsojtlalis*,
niman okichiu para on carcejtlajpixki ma kipakaita.
22 Niman on carcejtlajpixki okinmaktilij José nochimej on oksekimej yejuan tsakutikatkaj.
Niman José tlayekanaya ipan nochi on tlen ompa nochiuaya.
23 Niman on carcejtlajpixki xok itlaj ika nokuaxotlaltiaya de on tlen onkatka imak José pampa toTEKO nemiya iuan niman kichiuaya para nochi ma kisa kuajli.