37
Jacob onochantij ipan on tlajli Canaán kampa ochantik itataj.
2 In yejua on tlen ipan onochiu Jacob.
José niman ikniuan
Ijkuak José,
telpochtli katka niman kipiyaya matlatli uan chikome xipan,
kintlajpiyaya borregos inmiuan ikniuan.
Yejuamej katkaj inkoneuan Bilha niman Zilpá yejuan itlakpasiuauan itataj.
José kijliaya itataj nochi on tlen xkuajli kichiuayaj ikniuan.
3 Israel (yejuan no itoka Jacob) más okitlajsojtlak José xken on oksekimej itelpochuan,
pampa otlakat ijkuak ye ueuentsitsin katka.
Niman yejua ika okichijchiuilij sen itlaken yejuan ueyak,
niman sanoyej kualtetsin katka ikan miyek tlapaltin.
4 Pero ijkuak ikniuan okitakej ika imintataj más kinekiya José xken yejuamej,
opeu kitlauelitaj,
niman nion xok kitlajpalouayaj.
5 Se tonajli José okipix sen temiktli niman okinmijlij ikniuan,
pero ika okinmijtij más okitlauelitakej.
6 Ijkin okinmijlij:
—Xkakikan,
nemechijlis tlinon oniktemik.
7 Oniktemik ika tinochimej tinemiyaj campo.
Tiksasalouayaj imiyauatlakyo on trigo.
Kemaj on yejuan nejua oniksaloj,
onotelkets niman onokau ijkatikaj.
Niman kemaj nemotlasalol okiyeualotoj on nejua notlasalol,
niman ken notlakuantelketsayaj para kitlakaitayaj.
8 Kemaj ikniuan okilijkej:
—¿Tikijtosneki ika timochiuas tirey niman titechmandaros?
Kemaj más okitlauelitakej ipampa itemik niman ken kintlajtlajtouiliaya.
9 Sakin,
José okipix okse temiktli niman no okinmijlij ikniuan.
Ijkin okinmijlij:
—Xkakikan,
onikpix okse temiktli,
niman nikitaya ika on tonaltsintli niman on metstli niman majtlaktli uan se sitlalimej nixpan notlakuantelketsayaj para nechtlakaitayaj.
10 Niman ijkuak José okintlajtlajtouilij on temiktli itataj niman ikniuan,
itataj okajuak niman okijlij:
—¿Tlinon tikijtosneki ika on temiktli yejuan otikpix?
¿Tiknemilia ika monanaj,
mokniuan niman nejua mixpan titotlakuantelketsaskej?
11 Niman ikniuan okinexikolitakej,
pero itataj miyek kinemiliaya ika in tlajtlamach*.
José okinamakakej ikniuan
12 Se tonajli ikniuan José okinuikakej iborregos imintataj,
niman okitejtemojtiajkej sakatl para iminyolkauan.
Oyajkej hasta oajsikej nisiu on ueyikalpan Siquem.
13 Ipan se tonajli Israel okijlij José:
—Xkita,
mokniuan kintlakuajkualtiaj noborregos nisiu Siquem.
Nikneki xuiya xkintati.
Niman José okinankilij:
—¡Kemaj,
niyas!
14 Kemaj itataj okijlij:
—Xkintati kenijkinemij mokniuan niman on borregos.
Niman kemaj xuajla xnechmachistiki.
Ijkon tej,
Israel okititlan José.
Niman José okis ipan on ixtlauatl Hebrón niman oajsik Siquem.
Ijkuak José oajsik Siquem,
15 ompaka kistinemiya ipan on campo.
Kemaj okinamik sen tlakatl niman okitlajtoltij:
—¿Tlinon tiktejtemojtinemi?
16 Niman José okinankilij:
—Nejua nikintejtemojtinemi nokniuan.
¿Uelis tinechijlis kanika kintlakuajkualtiaj iminborregos?
17 Niman on tlakatl okijlij:
—Yonejkuanijkej nikan.
Onikak kijtouaj ika yauij para Dotán.
Kemaj José okintejtemojtiaj niman okinnextito hasta Dotán.
18 Niman ikniuan uejka okontakej,
niman ijkuak yejua xe ajsiya,
okijtokej para kimiktiskej.
19 Ijkin okijtojkej:
—¡Xkitakan,
ne uajlau on temikketl!
20 Xuajlakan,
ma tikmiktikan.
Kemaj tikontlajkaliskej ipan sen tlaltekontli niman tikteijliskej ika sen tepeyolki okikuaj.
Niman tikitaskej tlinon nochiuas ika on tlen yokitemiktinen.
21 Pero ijkuak Rubén ijkon okak,
kinekiya kimanauis José de on ikniuan,
niman okijtoj:
—Maka ma tikmiktikan.
22 Maka xtoyauakan yestli.
Yej,
san ma tikontlajkalikan ipan sen tlaltekontli yejuan onkaj ipan in xalpatlajkan.
Pero maka itlaj ma tichiuilikan.
Rubén ijkon okijtoj pampa kinekiya para sakin* kimanauis José,
niman kuikaskia itech itataj.
23 Yejua ika,
ijkuak José oajsik kampa nemij ikniuan,
yejuamej okixtilijkej on itlaken kualtetsin yejuan miyek tlapaltin kipiyaya.
24 Okajsikej niman okontlajkalkej ipan on tlaltekontli.
25 Sakin,
ijkuak onotlalijkej para tlakuaskej,
okintakej on ismaelitas yejuan uajlayaj de Galaad ika incamellos kuajkiyaj ajuiyalistli,
okotsotl de on bálsamo kojtli* niman mirra.
Yejuamej yayaj para Egipto.
26 Kemaj Judá okinmijlij ikniuan:
—¿Tlinon tiktlaniskej tla tikmiktiskej tokniu niman tikiyanaskej imikilis?
27 Más kuajli ma tikinnamakiltikan on ismaelitas niman maka ma tikmiktikan,
pampa yejua tokniu.
Niman ikniuan okuelkakkej on tlen okijtoj.
28 Kemaj,
sakin* ijkuak on tlanamakakej Madianitas panouayaj ompaka,
ikniuan José okixtijkej ipan on tlaltekontli,
niman okinnamakiltijkej ika sempoajli plata tomin.
Niman on tlanamakakej,
yejuan katkaj iuejkakoneuan Ismael,
okuikakej para Egipto.
29 Sakin,
ijkuak Rubén onokuep itech on tlaltekontli niman xok okinextij José ompa ijtik,
onotlakentetsayantiaj* pampa sanoyej onajman.
30 Kemaj onokuep kampa nemij ikniuan,
niman okinmijlij:
—¡On telpochtli xokak!
¿Tlinon uelis nikchiuas?
31 Kemaj on iknijtin okonkuikej itlaken José niman okuijkuiltijkej iyesyo sen chivito yejuan okimiktijkej.
32 Niman okititlanilijkej imintataj niman okijlijkej:
“Otiknextijkej in tlakentli*.
Kuajli xkita tla itlaken mokoneu José.”
33 Niman ijkuak Jacob okixmat,
okijtoj:
“¡Melauak,
yejua in itlaken nokoneu!
Sen tepeyolki okimiktij niman okikuaj nokoneu.”
34 Kemaj Jacob onotlakentetsayan,
niman onotlakentij ikan ajmankatlakentli*,
niman ochokak miyek tonajli pampa omik ikoneu.
35 Nochimej ikoneuan kinekiyaj kiyoltlaliskej,
pero xouel onoyoltlalij.
Sanoyej chokaya ipampa ikoneu niman kijtouaya:
“Ninajmanas ipampa nokoneu hasta kaman nimikis.”
36 Ne Egipto on madianitas tlakamej okinamakakej José itech sen tlakatl itoka Potifar yejuan sen iueyitlayekankau katka on rey.
Yejua katka sen soldadojtlayekanki de isoldados on rey.