On tlen ipan onochiu Dina
34
Se tonajli Dina,
on ichpochtli yejuan Lea okipix iuan Jacob,
okinnotsato on ichpokamej yejuan ompa chanejkej katkaj ipan on ueyikalpan.
2 Pero ompa nemiya sen telpochtli yejuan itoka katka Siquem.
Yejua katka ikoneu Hamor,
sen heveo tlakatl yejuan kinyekanaya on heveos ompa.
Niman Siquem okichiualtij Dina ma noteka iuan niman okipijpinajtij.
3 Pero maski ijkon okichiuilij,
on telpochtli okimat ika melauak sanoyej kinekiya.
Yejua ika,
okinots Dina ika nochi iyojlo para no ijki ma kineki.
4 Kemaj Siquem okinots Hamor on itataj,
niman okijlij:
—Xuiya xtlajtlaniti on ichpochtli.
Nikneki ninonamiktis iuan.
5 Jacob okimat ika Siquem okipijpinajtij ichpoch,
pero pampa itelpochuan sanken* nemiyaj ipan on campo ika iminyolkauan,
yejua xitlaj* okijtoj hasta oyejkokej.
6 Ipan on tonajli,
Hamor itataj Siquem,
okinotsato Jacob itechkopa Dina.
7 Ijkuak itelpochuan Jacob oyejkokej de campo niman okimatkej on tlen onochiu,
sanoyej okualankej pampa on sanoyej tepinajtij para nochi ifamilia Jacob,
pampa Siquen okichiualtij iuan onotekak ichpoch.
¡On kenon xkaman kitocarouaya kichiuas!
8 Pero Hamor oualaj okinnotsako Jacob niman itelpochuan,
niman okinmijlij:
—Nokoneu Siquem melauak kineki nemokniu Dina.
Nemechiknotlajtlanilia,
xkauilikan iuan ma nonamikti.
9 Ijkin touan xmonelokan,
niman ijki uelis titonamiktiskej iuan nemochpochuan,
niman nemejuamej iuan tochpochuan.
10 Xmokauakan ipan totlal.
Xtlapejpenikan on tlajli yejuan más nenkuelitaskej niman ompa xchantikan.
Nikan uelis nentlanamakaskej,
nentlakouaskej niman nemoyaxkatiskej tlaltin.
11 Niman on telpochtli Siquem no okijlij Jacob niman ikniuan Dina:
—Nemechtlajtlanilia ma titouikakan kuajli.
Nejua nemechmakas san tlinon nennechtlajtlaniskej.
12 Xnechijlikan kech tomin niman tlajtlamach* nenkinekiskej para on ichpochtli niman nemechmakas.
Para nejua,
xtlaj tlinon tla nentechtlajtlaniliskej itlaj yejuan patioj.
San nikneki xkauilikan on ichpochtli ma nonamikti nouan.
13 Pampa Siquem okipijpinajtij Dina,
itelpochuan Jacob okinankijlijkej Siquem niman itataj ikan tlakajkayaualistli.
14 Yejua ika,
ijkin okinmijlijkej:
—Xuelis tikmakaskej tokniu sen tlakatl yejuan xnotlalilia ipan itlalnakayo on nescayotl itoka circuncisión* pampa on tepinajtij para tejuamej.
15 San uelis tikseliskej sen tlakatl tla nochiuas ken tejuamej.
Yejua ika,
achtoj nochimej on tlakamej yejuan nemij nemotsajlan noneki ma notekilikan iminkuetlaxyo* para kipiyaskej on neskayotl itoka circuncisión.
16 Niman ijkuakon,
kemaj,
uelis nenmosiuatiskej iuan tochpochuan niman tejuamej iuan nemochpochuan.
Niman tinemiskej nemouan nemejuamej,
niman titochiuaskej san se chanejkej.
17 Pero tla xnenkiseliaj on tlen temechnauatiaj niman xnemotlaliliaj on neskayotl,
tla ijkon,
tiaskej de nikan niman tikuikaskej tokniu Dina.
18 Hamor niman itelpoch okuelkakej on tlajtojlij.
19 Kemaj on telpochtli yejuan más kitlakaitayaj xken oksekimej itech ifamilia,
nimantsin oyaj niman okinotekilij icuerito ikuatipan on kampa tlapiasoua pampa sanoyej kinekiya ichpoch Jacob.
20 Yejua ika,
yejua niman Hamor itataj,
oyajkej ikalakiyan on ueyikalpan kampa nochimej nosentlaliaj,
niman okinmijlijkej on yejuan ompa nemiyaj:
21 —In tlakamej kinekij nochiuaskej toamigos.
Ma nokauakan nikan touan,
niman ma tlakouakan niman ma tlanamakakan pampa onkaj miyek tlajli para yejuamej.
Niman uelis titosiuatiskej iuan imichpochuan,
niman yejuamej iuan tochpochuan.
22 Pero yejuamej kijtouaj kitl xnoneloskej touan para titochiuaskej san seknek tichanejkej tla tinochimej yejuan titlakamej xtitotlaliliaj ipan totlalnakayo on nescayotl yejuan yejuamej kitokayotiaj circuncisión,
ijkon ken yejuamej nomatij kichiuaj.
23 Tla ijkon tikchiuaskej,
sakin* nochi on tlajtlamach* yejuan kipiyaj niman nochi iminyolkauan uelis no toyaxka yes.
San ma tikijtokan ika kemaj,
niman yejuamej chantiskej touan.
24 Niman nochimej on tlakamej ipan on ueyikalpan yejuan yokajxitijkaj xiutli para ueliskej soldados yeskej,
okuelkakej on tlen okinmijlijkej,
niman okintlalilikej ipan imintlalnakayo on nescayotl itoka circuncisión.
25 Pero ipan yeyi tonajli ijkuak on tlakamej sanken* nokokojtikatkaj pampa okintlalilikej ipan imintlalnakayo on nescayotl itoka circuncisión,
Simeón niman Leví,
on omemej itelpochuan Jacob yejuan ikniuan Dina,
oyajkej ipan on ueyikalpan niman ika iminespada okinmiktijkej nochimej on tlakamej pampa xouelkej oteixnamikej.
26 Okimiktijkej Hamor iuan Siquem ikoneu,
niman okixtijtejkej Dina ipan ichan Siquem niman oyajkej.
27 Kemaj ijkuak no oajsikej on oksekimej itelpochuan Jacob ne ipan on ueyikalpan,
impan opajpanokej on mikatsitsimej niman okinmichtekilijkej nochi on tlen kipiyayaj pampa okipijpinajtijkej inmikniu.
28 Okinuikakej borregos,
uakaxtin,
polokomej* niman nochi on tlen onkatka ipan on kalpan niman ipan campo.
29 Okichtekkej nochi on tlen pajtioj,
on tlen onkatka ipan kaltin,
niman okinuikakej nochi on kokonej niman siuamej.
30 Ijkuak Jacob okimat,
okinmijlij Simeón niman Leví:
—Yonennechkalaktijkej ipan tlauejli.
Aman on cananeos niman on ferezeos yejuan nemij ipan in tlajli nechtlauelitaskej.
Tla nosentlaliskej niman techuijsokiskej,
nechmiktiskej nejua niman nochi nofamilia pampa xtimiyekej.
31 Pero itelpochuan Jacob okinankilijkej:
—¿Tlen kuajli pampa ika onajauiltijkej tokniu ken sen siuaauilnenketl yeskia niman xitlaj* tikchiuaskej?