33
Ijkuak Jacob okitak ika Esaú uajlaya iuan naui ciento tlakamej,
okinxexeloj on kokonej.
Sekimej okinkau itech Lea,
Raquel niman on omemej esclavas.
2 Okintlalij tlayakapan on esclavas inuan inkoneuan,
tlakuitlapan okitlalij Lea iuan ikoneuan,
niman más tlakuitlapan okintlalij Raquel niman José.
3 Kemaj Jacob oyakatstiaj,
niman onotlakuantelkets niman onopachoj hasta ipan tlajli chikomepa.
Ijkon okichiu chika kinisiuijtiaya ikniu hasta oajsik itech.
4 Pero Esaú onotlaloj okinamikito.
Okikechnapaloj,
niman okitenkuaj,
niman on omemej ochokakej.
5 Kemaj Esaú okintak on siuamej niman inkoneuan yejuan ye uajlayaj,
niman okitlajtoltij:
—¿Akinomej in yejuan ualauij mouan?
Niman Jacob okinankilij:
—In nejua nokoneuan yejuan Dios ikan itetlajsotlalis onechinmakak.
6 Kemaj on esclavas iuan inkoneuan ononisiuijkej,
niman onotlakuantelketskej.
7 Kemaj ononisiuijkej Lea niman ikoneuan niman san sekan onotlakuantelketskej.
Niman kemaj oajsik José niman Raquel niman no onotlakuantelketskej.
8 Niman Esaú okijlij Jacob:
—¿Tlinon tiknemilia tikchiuas ika on miyekej yolkej yejuan onikinnamik ipan noojui?
Niman Jacob okijlij:
—Nejua niknekiya nimitsmakas para nimitsyoltlalis nokniu.
9 Niman Esaú okijtoj:
—Ka nokniu.
Nejua ye nikpiya miyek.
Maka xnechmaka on tejua moyaxka.
10 Pero Jacob oksejpa okijlij:
—¡Ka!
Tla kuajli tinechselia,
por favor xkinseli.
Nejua nimitsita ken nikitaskia ixayakatsin Dios pampa kuajli otitechselij.
11 Nimitstlajtlanilia,
xseli in tetlayokolijli* yejuan nimitsmaka pampa Dios sanoyej yonechricojtilij,
niman nochi on tlen tikita nejua noyaxka.
—Tla ijkon,
tiauij de nikan.
Nejua nakatstias.
13 Pero Jacob okijlij:
—Nokniu,
tejua tikmati ika in kokonej xe kojtikej,
nion xkojtikej on kalpanyolkej.
Tla tikintlalochtiskej sanoyej,
san ipan se tonajli,
siauiskej niman nochimej ueliskej mikiskej.
14 Más kuajli para tejua takatstias,
niman nejua nias ika yolik ken nejnemij in yolkej niman in kokonej,
niman titosentlaliskej hasta ipan on tlajli Seir.
15 Niman Esaú okijtoj:
—¡Kuajli!
Xnechkauili ma nimitsinkauilijteua keskimej tlakamej yejuan ualauij nouan.
Pero Jacob okijlij:
—¡Ka!
Maka xmotenmati.
San nikneki xnechseli ikan pakilistli.
16 Niman on tonajli Esaú oksejpa oyaj Seir.
17 Pero Jacob oyaj ipan on ueyikalpan Sucota.
Niman ompa okichijchiu sen kajli,
niman okinchijchiuilij iyolkauan kalmatsitsimej.
Yejua ika,
okitokayotij ompa ne,
Sucot.
18 Ijkuak Jacob okis ne Padan-aram,
oajsik kuajli ipan on tlajli Canaán niman okintlalij ikaluan nisiu on ueyikalpan Siquem.
19 Sakin,
ika se ciento plata tomin,
okou sen tlajli yejuan de ikoneuan on tlakatl Hamor yejuan itataj Siquem niman ompa onochatijkej.
20 Niman ompa okichijchiu sen tlaixpan* niman okitokayotij El-Elohe-Israelb.