Jacob kineki cholojteuas itech Labán
31
Pero Jacob okimat ika ikoneuan Labán ijkin kijtojtinemiyaj:
“Jacob okikuik nochi on tlen iyaxka* totataj Labán,
niman ika yoricojtiak.”
2 Jacob no kitaya ika Labán xok ijki kinekiya ken achtoj.
3 Kemaj toTEKO okijlij Jacob:
“Xmokuepa inchan motauan kampa nemi mofamilia,
niman nejua nias mouan.”
4 Kemaj Jacob otlatitlan ma kinnotsatij Raquel niman Lea para ma uajlakan ne kampa yejua nemiya iuan iborregos.
5 Niman Jacob okinmijlij:
—Nikita ika nemotataj xok nechneki ken achtoj.
Pero Dios yejuan notataj kitekipanoua nochipa nouan nemi.
6 Kuajli nenkimatij ika yoniktekipanoj nemotataj hasta kampa oniuel,
7 niman yejua uej yonechkajkayau,
niman yonechpatilij notlaxtlauil majtlaktlipa.
Pero maski ijkon,
Dios xokauilij ma nechchiuili tlen xkuajli.
8 Ijkuak Labán okijtoj nechtlaxtlauilis ikan yolkej yejuan manchajyojkej,
nochi tlakatiyaj manchajyojkej.
Niman ijkuak okijtoj nechtlaxtlauilis ika on yejuan kuikuiltikej,
nochi tlakatiyaj kuikuiltikej.
9 Ijkon Dios okinkuilij iyolkauan para onechinmakak.
10 Se tonajli ijkuak on yolkej nonepanouayaj,
onikpix sen temiktli.
Niman ipan on temiktli onikitak ika nochi chivos yejuan tenepanouayaj katkaj kuikuiltikej,
tetlajtlaltikej niman tesisitlaltikej.
11 Ipan on temiktli iángel Dios onechnots ikan notoka,
niman nejua oniknankilij:
“Nikan ninemi.”
12 Kemaj yejua onechijli:
“Xkita kuajli ika nochi on okichtin yejuan kinkoneuajtiaj on borregas nentiuij kuikuiltikej,
tetlajtlaltikej niman tesisitlaltikej.
Ijkon onikchiu pampa nikitstikaj nochi on tlen xkuajli mitschiuilijtikaj Labán.
13 Nejua nimoDios yejuan oninopantlannextij ne Betel kampa tejua otiktelkets on tetl ken sen neskayotl para xtikelkauas,
niman otinechtlajtolmakak on tlen tikchiuaskia.
¡Xisiui,
niman xkisa de nikan,
niman xmokuepa ipan on tlajli kampa otitlakat!”
14 Kemaj Raquel niman Lea okinankilijkej:
—Tejuamej aman xokuitlaj herencia tikpiyaj ipan ichan totataj,
15 yej techchiuilia ken xtiikoneuan yeskiaj.
Otechnamakak,
niman nochi on tlen okiselij por tejuamej okipoloj.
16 Melauak nochi on tlen kipiyaya yejuan Dios okixtilij totataj,
toyaxka niman inyaxka tokoneuan.
Yejua ika,
xchiua nochi on tlen Dios mitsnauatijtikaj.
Jacob okis Padán-aram
17-21 Kemaj Jacob onotlatlajtlalilij para nokuepas Canaán kampa nemiya Isaac itataj.
Pero Jacob okajkayau Labán,
on arameo,
pampa xokijlij tla ye yau.
Ipan on tonaltin Labán oyaj uejka para okinximato iborregos.
Niman sakin* ijkuak Labán okis,
Raquel okichtekilij iídolos para okinmiktik.
Niman Jacob okinmijlij ikoneuan niman isiuauan ma tlejkokan ipan on camellos.
Okikuik nochi on tlen iyaxka.
No ijki,
okinuikak nochi on yolkej yejuan okinselij ika otekit ipan on tlajli Aram.
Ijkon okis para nokuepas Canaán kampa nemiya Isaac,
itataj.
San okisteu ichtaka,
okiktik nochi tlen iyaxka,
niman okipanok on río Éufrates niman oyaj kampaka onokej on tepemej ipan on tlajli Galaad.
Labán okajsito Jacob
22 Yeyi tonajli sakin*,
okijlijkej Labán ika Jacob yocholojteu.
23 Kemaj Labán iuan ifamilia oyajkej okintejtemotoj,
niman kampa ika chikome tonajli okinmajsitoj ipan on tepemej ipan on tlajli Galaad.
24 Pero on tlayoua Dios okinotitij Labán,
on arameo,
ipan sen temiktli,
niman okijlij:
“Xkita ken tiknotsas Jacob.
Maka tiknotsas ikan tlauejli.”
25 Niman Labán okinextito Jacob ipan on tepemej ipan on tlajli Galaad kampa Jacob okitlalij ikajkal.
Niman Labán iuan ifamilia no ompa okitlalijkej inkajkaluan.
26 Niman Labán okitlajtoltij Jacob:
—¿Tlinon otikchiu?
¿Tline otinechkajkayau?
¡Otikinuajuikak nochpochuan ken siuamej yejuan kinmajsij ipan guerra!
27 ¿Tline otinechkajkayau,
niman otiuajkisteu ichtaka,
niman xitlaj* otinechijlij?
Tla nikmatiskia,
nejua nimitsmakauaskia ikan pakilistli,
niman ikan tlapitsaltin,
niman teponastin niman arpa.
28 Nion xotinechkauilij ma nikintenkua nochpochuan niman noxuiuan.
¡Otikchiu sen tontojyotl!
29 Nejua niueliskia nemechchiuiliskia tlen xkuajli,
pero in tlayoua onechnots Dios yejuan motataj kitekipanoua,
niman onechijli ma ninonemili,
para maka nimitsnotsas ikan tlauejli.
30 Tla melauak tikisa san pampa tikneki timokuepas ichan motataj,
¿tline otinechinmichtekilij nodioses?
31 Kemaj Jacob okinankilij Labán:
—Melauak oninomojtij.
Oniknemilij tinechinkuilis mochpochuan.
32 Pero tla yakaj yejuan nikan nemi kipiya modioses,
¡ma miki!
Nofamila niman mofamilia nikan nemij ken testigos.
Yejua ika tej,
xtejtemo tla tikuajkij itlaj yejuan moyaxka,
niman tla tiknextia xkikti.
Pero Jacob xkimatiya ika Raquel okimichtek on ídolos.
33 Kemaj Labán okalak ipan ikajkal Jacob niman ipan iminkajkal on ome esclavas.
Kemaj okalak ipan ikajkal Lea,
pero xokiminnextij on ídolos.
Sakin,
okis ipan ikajkal Lea,
niman okalak ipan ikajkal Raquel.
34 Pero Raquel okominkuik on ídolos,
niman okintlalij ijtik ipejpech camello yejuan kipiya ikuetlaxbolsas,
niman ipan onotlalij.
Niman Labán otlatejtemoj ipan nochi on kalijtik niman xitlaj* okinnextij.
35 Kemaj Raquel okijlij:
—Notataj,
maka tikualanis tla xninotelketsa mixpan,
pampa aman nikpiya nokokolis yejuan tikpiyaj tejuamej tisiuamej.
Niman Labán okintejmoj iídolos nochiuiyan,
pero xokiminnextij.
36 Niman Jacob okualan niman okajuak Labán ika in tlajtojlij:
—¿Tlinon xkuajli onikchiu?
¿Tlinon tlajtlakojli onikchiu para ika miyek tlauejli titechtejtemoua?
37 Yotikitak nochi on tlen noyaxka* niman,
¿tlinon otiknextij yejuan moyaxka?
¡Xtlali nikan ixpan mofamilia niman ixpan nofamilia para ma kijtokan akinon de tejuamej tiomemej tikijtouaj on tlen melauak!
38 De on sempoajli xipan yejuan onitekit mouan,
xkaman opiluetskej moborregos nion mochivos,
niman xkaman onikuaj nion se.
39 Xkaman onimitsajuikilij nion se moyolkau yejuan kimiktiaya on yolkej tekuanimej.
Nejua niktlaxtlauaya on yejuan ompoliuiya.
Tla tlajokaj noso tlayoua sekimej nechtlachtekiliayaj,
tejua tinechijliaya ma niktlaxtlaua.
40 Ipan tonajli nitonalmikiya,
niman tlayoua nisekumikiya,
niman ninokochpajsolouaya.
41 Ijkon ninemiya sempoajli xipan ijkuak ninemiya mouan.
Para cada se mochpoch onimitstekipanoj chikome xipan,
niman para moyolkauan onitekit chikuasen xipan.
Niman majtlaktlipa otinechpatilij notlaxtlauil.
42 Tla xnemiskia nouan iDios naueloj Abraham,
on Dios yejuan notataj Isaac kimauistiliaya,
kas tinechtitlaniskia san nimapijpilkatiaskia.
Pero Dios okitak kenijkionitekit hasta sanoyej nisiauiya.
Okitak ika sanoyej ninajmanaya niman yejua ika tlayoua omitsajuak.
Jacob niman Labán okichijkej sen pacto* de yolseuilistli
43 Kemaj Labán okinankilij Jacob:
—In siuamej nejua nochpochuan,
niman inkoneuan nejua noxuiuan.
In yolkej nejua noyolkauan.
Nochi yejuan nikan tikita noyaxka.
Pero xitlaj* tlen xkuajli nikinchiuilis nochpochuan iuan inkoneuan.
44 Aman tej,
tejua niman nejua ma tikchiuakan sen pacto* yejuan yes ken sen testigo yejuan techtlalnamiktis para ma tikchiuakan nochi on tlen tikijtouaj.
45 Kemaj Jacob okontilan sen tetl niman okitelkets ken sen neskayotl para maka kelkauaskej on pacto*,
46 niman okinmijlij ifamilias:
—¡Xsentlalikan temej!
Niman nochimej okisentlalijkej temej,
niman okintepayolojkej,
niman ompa otlakuajkej.
47 Niman Labán okitokayotij ompa ne “Jegar Sahaduta” ipan yejua itlajtol.
Niman Jacob okitokayotij “Galaad” a ipan yejua itlajtol.
48 Kemaj Labán okijlij:
—In teolochojli nokaua ken testigo para maka tikelkauaskej on pacto*.
—ToTEKO yejuan ueli kitla,
ma techita tiomemej ijkuak xok uelis titotaskej.
50 Tla tikintlajyouiltis nochpochuan noso tikimpiyas oksekimej siuamej,
maski xnemis sen testigo yejuan topan tlachas,
xmati ika toDios kemaj kitas.
51 Niman Labán más okijlij Jacob:
—Xkita,
nikan niktlalia in teolochojli niman nikan niktelketsa in tetl uekapan ken sen neskayotl para maka tikelkauaskej on pacto* yejuan onyaskej toka tejuamej.
52 In teolochojli niman in tetl yejuan uekapan nochiuaskej testigos para nion tejua,
nion nejua,
xkaman tikpanoskej in raya para titoyakapanauiskej.
53 IDios moauelo Abraham,
niman nauelo Nacor,
ma kijto akinon de tejuamej kichiua on tlen xkuajli.
Kemaj Jacob okitestigojtlalij Dios yejuan Isaac on itataj kimauistiliaya ika kichiuas on tlen onotlajtolmakak.
54 Sakin,
ompa ipan on tepetl okimakak uentli Dios,
niman okinots ifamilia para ma tlakuakij.
Niman nochimej otlakuajkej,
niman onokajkej on tlayoua ipan on tepetl.
55 Uajmostla kualkan,
Labán onokuiteu,
niman okintenkuaj ixuiuan niman ichpochuan,
niman okintiochiu.
Kemaj onokuep para ichan.