30
Ijkuak Raquel okitak ika xueliya kimaka ikoneuan Jacob,
opeu kinexikolita ikniu Lea,
niman okijlij iueuentsin:
—¡Xnechmaka nokoneuan tlamo nimikis!
2 Pero Jacob okualan iuan,
niman okijlij:
—¿Tlen nejua niDios?
Yejua xmitskauilia titlaskaltis.
3 Kemaj Raquel okijlij iueuentsin:
—Tla ijkon,
xtlaskalti iuan noesclava Bilhá.
Niman ijkuak yejua kimpiyas ikoneuan,
yes ken nejua nokoneuan.
4 Ijkon Raquel okimakak Jacob Bilhá,
on iesclava,
para ma kipiya ikoneuan iuan.
Niman Jacob otlaskaltij iuan Bilhá,
5 niman yejua okimakak Jacob sen itlakakoneu.
6 Kemaj Raquel okijtoj:
“Dios okitak ika xnikpiya tlajtlakojli,
niman okak on tlen oniktlajtlanij,
niman onechmakak sen nokoneu.
Yejua ika,
in nokoneu itoka yes Dana.”
7 Sakin,
Bilha,
iesclava Raquel,
okipiyalij Jacob okse ikoneu.
8 Kemaj Raquel okijtoj:
“Oninotlatlan iuan nokniu niman yoniktlan.
Yejua ika,
in nokoneu itoka yes Neftalíb.”
9 Ijkuak Lea okitak ika xok ueliya nokoneana,
okimakak Jacob Zilpá,
iesclava,
para itlakpasiuau yes.
10 Niman ijkuak Zilpá okipiyalij se ikoneu Jacob,
11 Lea okijtoj:
“¡Nikpiya tlatiochiualistli!
Yejua ika,
in nokoneu itoka yes Gad.” c
12 Sakin,
Zilpá okipiyalij Jacob okse ikoneu,
13 niman Lea okijtoj:
“¡Pakilistli!
Aman siuamej kijtoskej ika nipaki.
Yejua ika,
in nokoneu itoka yes Aserd.”
14 Se tonajli Rubén oyaj campo ijkuak onkatka trigo ipan pixkilistli,
niman ompa okinextij sen xojpajtli itoka mandrágora,
niman okiktilij Lea on inanaj.
(On xojtli mandrágoras nochimej kijtouayaj ika on kipaleuiya sen siuatl para ma nokoneana.)
Niman ijkuak Raquel okitak on kuajli xojpajtli,
okijlij Lea:
—Xnechikneli,
xnechmaka san kechkich on xojpajtli yejuan mokoneu okuajkik.
15 Pero Lea okijlij:
—¿Tiknemilia ika xitlaj* kijtosneki ika otinechkuilij noueuentsin,
niman aman no tikneki tinechkuilis in xojpajtli yejuan nokoneu onechajkuilij?
Niman Raquel okijtoj:
—Tla tinechmakas achijtsin ixojpajyo yejuan okuajkik mokoneu,
nikauilis Jacob ma noteka mouan in tlayoua.
16 Ijkuak ye tiotlak,
Lea okinamikito Jacob ijkuak uajlaya de campo niman okijlij:
—Aman timotekas nouan ipan in tlayoua pampa onimitspatlak ika sen kuajli xojpajtli yejuan nokoneu onechajkuilij.
Kemaj on tlayoua Jacob iuan onotekak Lea.
17 Niman Lea onokonean.
Kemaj okipiyalij Jacob ikoneu yejuan ika makuijli pampa Dios okak on tlen Lea okitlajtlanilij.
18 Kemaj Lea okijtoj:
“In nokoneu itoka yes Isacare.
Ijkon niktokayotis pampa toTEKO Dios onechmakak notlaxtlauil pampa onikmakak noueuentsin notekitkau.”
19 Sakin,
Lea onokonean.
Kemaj okipiyalij Jacob ikoneu yejuan ika chikuasen,
20 niman okijtoj:
“Dios onechmakak sen kuajli tlayokolijli.
Aman noueuentsin más nechtlakaitas pampa yonikpiyalij chikuasen tlakakokonej.
Yejua ika,
in nokoneu itoka yes Zabulónf.”
21 Sakin,
Lea okipix sen siuakonetl yejuan okitokayotij Dina.
22 Pero Dios no okelnamik Raquel.
Yejua ika,
okauilij ma nokoneana pampa okak on tlen okitlajtlanilij.
23 Ijkuak Raquel onokonean okitlakatilij sen tlakakonetl,
niman okijtoj:
“Dios onechkixtilij on pinaualistli ika xniueliya nikonepiyaya.
24 Dios ma nechkauili ma nikpiya okse.”
Yejua ika,
okitokayotij Joség.
Omiyekiyakej iyolkauan Jacob
25 Sakin,
ijkuak Raquel yokitlakatilijka José,
Jacob okijlij Labán:
—Xnechkauili ma ninokuepa notlalpan kampa nochan,
26 inmiuan nokoneuan niman nosiuauan,
pampa onimitstekipanoj impampa yejuamej.
Yejua ika,
aman xnechkauili ma niuiya.
Kuajli tikmati ken onimitstekipanoj.
27 Pero Labán okinankilij:
—Tla tinechtlajsojkaita,
xmokaua nouan,
pampa ikan tetlatejtemoualistli onikitak ika toTEKO nechtiochiua motechkopa.
28 San xnechijli kech tikneki tiktlanis niman nimitstlaxtlauilis.
29 Kemaj Jacob okijlij:
—Kuajli tikmati kenijkionimitstekichiuilij niman kenijkimiyekiyayaj moyolkauan.
30 Sanoyej achijtsin tikpiyaya ijkuak xe niuajlaya niman aman tikpiya sanoyej miyek.
ToTEKO opeu mitstiochiua desde ijkuak onejkok onichantiko mouan.
Pero ¿Hasta kamanon nipeuas nitekitis para nofamilia?
31 Niman Labán okijlij:
—¿Kech tikneki ma nimitstlaxtlauili?
Niman Jacob okinankilij:
—Xitlaj tinechtlaxtlauilis.
Tla tiknekis on tlen nimitsijlis,
sanken* nikintlajpiyas moborregos.
32 Xnechkauili ma niuiya aman kampa nemij moyolkauan.
Ompa nikinkixtis para nejua,
nochimej on borreguitos tlilijkej niman nochimej on chivitos tetlajtlaltikej niman tesisitlaltikej.
On yejua notlaxtlauil yes.
33 Ijkon mostla noso uiptla,
uelis tikualitas yejuan yoniktlan.
Nimantsin tikmatis tla nikchiua tlen kuajli mouan noso ka.
Tla ipan noyolkauan nemiskej chivos yejuan xtetlajtlaltikej noso xtesisitlaltikej,
noso borregos yejuan xtlilijkej,
kitosneki ika onimitsichtekilij.
34 Niman Labán okijtoj:
—Kuajli yes.
Ijki ma nochiua.
Labán okajkayau Jacob
35 Pero sano ipan on tonajli,
Labán okinxeloj nochi on chivos yejuan kuikuiltikejh niman tesisitlaltikeji.
Niman no okinxelo on chivas yejuan tetlajtlaltikej niman yejuan tesisitlaltikej niman yejuan pintajtikej (yejuan kipiyaj san se parte istak ipan intsojmiyo).
No ijki,
okinxeloj nochi borreguitos yejuan tlijtlilijkej.
Kemaj,
okinmakak ikoneuan para ma kintlajpiyakan.
36 Sakin,
ikoneuan Labán okinuikakej uejka ken kanaj yeyi tonajli ika tinejnemis de kampa chantiya Jacob.
Ijkon onochiu chika Jacob uej okintlajpix on oksekimej iborregos Labán.
Jacob okajkayau Labán
37 Kemaj Jacob okitsotsontek imaselika on kojtli* álamo,
almendro niman castaño.
Niman ijkuak okinxixin,
okixtilijtiaj seki ikakauayo para ma nesiki on istak de on kojtli* niman ijkon nesiyaj kuikuiltikej.
38 Kemaj on tlakotsitsimej yejuan okinxixin,
okintlalij kampa atlij on yolkej pampa ompa nonepanouayaj.
39 Ijkon okichiu para inkoneuan ma tlakatikan kuikuiltikej,
tetlajtlaltikej niman tesisitlaltikej.
Jacob okajkayau Labán ika okpa
40 Kemaj Jacob kinxelojtiaya on borreguitos niman kinkauaya imixpan on yejuan kuikuiltikej niman tlilijkej yejuan iyaxkauan* Labán.
Ijkon tej,
Jacob san sekan kinsentlalijtiaya on yejuan iyaxkauan,
niman oksekan kinkauaya on yejuan iyaxkauan* Labán.
Jacob okajkayau Labán ika yexpa
41 No ijki,
ijkuak on yolkej yejuan tojtomajkej niman kojtikej nonepanouayaj,
Jacob kintlaliliaya on tlakotsitsimej yejuan okinxixin kampa atlij para ma kitakan ijkuak nonepanouaj.
42 Pero ijkuak uajlayaj on yolkej yejuan kokoxkitikej,
xkintlaliliaya on tlakotl.
Yejua ika,
on yolkej yejuan más teuakej onokajkej para Labán niman on yejuan más tojtomajkej para Jacob.
43 Ijkon Jacob sanoyej oricojtiak niman okimpix sanoyej miyekej borregos,
camellos,
polokomej*,
esclavos niman esclavas.