28
Kemaj Isaac okinots Jacob,
niman okitiochiu ikan in tlajtoltin:
“Maka xmosiuati iuan sen siuatl de in tlajli Canaán.
2 Xuiya ipan on tlajli Aram kampa ichan moauelo Betuel niman xmosiuati iuan se ichpoch motioj Labán.
3 Dios,
yejuan kipiya nochi poder,
ma mitstiochiua,
niman ma mitsmaka miyekej mokoneuan para motech ma kisakan sanoyej miyekej tlakamej yejuan nochiuaskej miyekej naciones.
4 Dios ma mitsmaka tejua niman mouejkakoneuan on tlatiochiualistli yejuan okijlij kimakas Abraham.
Ma mechyaxkati in tlajli kampa tichantij aman ken xchanejkej yejuan okijlij Abraham para kimakas.”
5 Kemaj Isaac okititlan Jacob ipan on tlajli Aram.
Niman Jacob oajsik ichan Labán yejuan ikoneu Betuel yejuan ualeua Aram.
Niman Labán katka ikniu Rebeca yejuan inanaj katka Jacob niman Esaú.
Esaú ononamiktij iuan okse siuatl
6 Esaú kimatstikatka ika Isaac okimakak itlatiochiualis Jacob niman ika okititlan Aram para nepa ma nosiuatiti,
niman kimatstikatka ika okinauatij maka nosiuatis iuan sen siuatl yejuan kisa Canaán.
7 No ijki,
kimatiya ika Jacob oyaj para Aram ken itataj niman inanaj okijlijkej.
8 Ijkon tej,
Esaú okimat ika itataj xkipaktiayaj on siuamej yejuan kisaj Canaán kampa yejuamej chantij.
9 Yejua ika,
oyaj okitato Ismael on itioj,
yejuan no ikoneu Abraham.
Ompa okinosiuatij ichpoch yejuan itoka katka Mahalat niman yejuan ikniu katka Nevaiot.
Kemaj Mahalat iuan ononamiktij Esaú aparte de on sekimej siuamej cananeas.
Dios okinotitij Jacob nepa Betel
10 Jacob okis ipan on ueyikalpan Beerseba niman oyaj on ueyikalpan Harán.
11 Niman kampa oajsik ompa onokau on tlayoua pampa ye tiotlak katka.
Niman okikuik sen tetl para onokuatetontij.
Kemaj onotekak niman okoch.
12 Ompa okipix sen temiktli,
niman okitak sen escalera yejuan ijkaya ipan tlajli niman ajsitoya hasta ipan iluikak.
Niman iángeles Dios ipan temouayaj niman tlejkouayaj.
13 No ijki,
kitaya ika toTEKO nemiya tlakpak,
niman kijliaya:
“Nejua niinTEKO niman niiDios moauelo Abraham niman motataj Isaac.
Tejua niman mouejkakoneuan nikinmakas in tlajli kampa amantsin tinemi.
14 Mouejkakoneuan miyekiyaskej ken miyek tlalteutli yejuan xakaj uelis kipouas.
Niman nochajchayauaskej nochiuiyan.
Yaskej kampaka sur niman kampaka norte,
kampaka ikisayan tonaltsintli niman kampaka ikalakiyan tonaltsintli.
Niman nikintiochiuas nochimej on tlakamej ipan tlaltikpaktli motechkopa niman intechkopa mouejkakoneuan.
15 Ninemi mouan.
Nimitscuidaros nochiuiyan kampa tias niman nimitsuijuikas para timokuepas oksejpa ipan in tlajli.
Xnimitstlauelkauas.
Nikchiuas nochi on tlen yonikijtoj nikchiuas motechkopa.”
16 Niman kemaj Jacob otlachix,
niman okinojlij:
“Melauak,
toTEKO nemi nikan,
niman xnikmatiya.”
17 Niman Jacob sanoyej onomojtij,
niman okinojlij:
“¡Nikan sanoyej tlayekkan!
¡Nikan onkaj ichan Dios!
¡In ikalakiyan iluikak!”
18 Niman uajmostla Jacob onokuiteu saniman kualkan niman okonkuik on tetl yejuan okinokuejtontijka,
niman okitelkets para maka kelkauas ika ompa toTEKO okinots.
Niman on tetl okitekilij aceite para ijki onokau tlatiochijtli itech toTEKO.
19 Niman nisiu ompa onkatka sen ueyikalpan yejuan itoka Luz,
pero Jacob okipatilij itoka niman okitlalilij Betela.
20 Niman ompa Jacob onotlajtolmakak itech toTEKO Dios,
niman ijkin okijlij:
“Dios,
tla tejua nochipa nouan tinemis,
niman tinechcuidaros ipan in noojui kampaka niyau,
niman tla tinechmakas tlen nikuas niman tlen niknokentis,
21 niman tla ninokuepas ika kuajli ipan ichan notataj,
kemaj san tejua,
tinoDios yes.
22 Niman nikan kampa niktlalia in tetl ken neskayotl,
yes mochan noDios.
Niman de nochi on tlen tinechmakas,
nimitsmakas nodiezmo*.”