Isaac okintiochiu Jacob niman Esaú
27
Isaac ye ueuentsin katka niman xok tlachaya.
Se tonajli okinots Esaú,
ikoneu yejuan yenkuiyotl niman okijlij:
—¡Nokoneu!
Niman Esaú okinankilij:
—Xnechijli tlinon tikneki notataj.
2 Niman Isaac okijlij:
—Ye tikita ika sanoyej niueuentsin niman sa kamanyan niuajmikis.
3 Yejua ika,
nikneki xuiya campo ikan moarco niman motlaminal para xkajsiti sen tepeyolki.
4 Kemaj xchijchiua sen tlakuajli uelik ken nejua nikuelita,
niman xnechajkuili para nikuas.
Niman kemaj nimitsmakas notlatiochiualis ixpan toTEKO chika xe nimiki.
5 Pero Rebeca kaktikatka on tlen Isaac kijliaya Esaú.
Niman sakin*,
ijkuak Esaú oyaj campo para kajsis sen tepeyolki,
6 Rebeca okinots Jacob on ikoneu yejuan más piten,
niman okijlij:
—Onikak ijkuak motataj okinots mokniu Esaú.
Niman ijkin okijlij:
7 “Xuiya,
xkajsiti sen tepeyolki niman xchijchiua on tlakuajli yejuan uelik para nikuas.
Kemaj nimitstiochiuas ixpan toTEKO chika xe nimiki.”
8 Yejua ika tej,
kuajli xnechkaki nokoneu tlen nimitsijlis,
niman xnechtlakamati:
9 Xuiya kampa nemij tochivos,
niman xnechajuikili ome chivito yejuan más tojtomajkej.
Kemaj nikchijchiuilis motataj sen tlakuajli uelik ken yejua kuelita.
10 Niman kemaj tikiktilis para ma kikua,
niman ijkon tejua mitstiochiuas ixpan toTEKO chika xe miki.
11 Pero Jacob okijlij inanaj:
—Nokniu kipiya miyek itsojmiyo ipan nochi itlalnakayo,
niman nejua ka.
12 Tla notataj nechmatokas,
kimatis ika xniEsaú.
niman kimatis ika san nikajkayaua.
Kemaj nechtlauelis niman xnechtiochiuas.
13 Pero inanaj okinankilij:
—Nokoneu,
nejua nopan ma uetsi on tlauelijli.
Tejua xchiua yejuan nimitsijlia niman xnechinuajuikili on chivos.
14 Kemaj Jacob okinmanato on chivitos niman okinuikilij inanaj.
Niman inanaj okichijchiu sen tlakuajli uelik ken Isaac kuelitaya.
15 Niman Rebeca okixtij on tlakentli* más kuajli yejuan iaxka Esaú,
iyenkuiyokoneu yejuan kejtikatka ipan ichan.
Niman on tlakentli* okitlaliltij Jacob ikoneu yejuan más piten.
16 Kemaj no okitlapachoj ika on ikuetlaxyo* chivito ipan imauan Jacob niman ikechtlan kampa xkipiya itsojmiyo.
17 Niman kemaj okimakak on uelik tlakuajli niman on pan yejuan okichijchiu.
18 Kemaj Jacob okalak kampa nemi itataj,
niman okijlij:
—¡Notataj!
Niman Isaac okinankilij:
—Nikan ninemi.
¿Akin tejua,
nokoneu?
19 Niman Jacob okijlij:
—Nejua niEsaú,
moyenkuiyou.
Yonikchiu on tlen otinechijlij.
Aman xmotlalij niman xkua in tlakuajli de on yolki yejuan onikajsito,
niman xnechmaka motlatiochiualis.
20 Kemaj Isaac okitlajtoltij:
—Nokoneu,
¿ken ijki ouel otiknextij semi nimantsin sen yolki?
Niman Jacob okinankilij:
—On moTEKO,
yejuan moDios,
onechpaleuij para oniknextij.
21 Pero Isaac okijlij:
—Xnechajnisiui niman xnechkauili ma nimitsmatoka tla melak tejua tinokoneu Esaú.
22 Niman Jacob okinisiuij para ma kimatoka itataj.
Niman Isaac okijtoj:
p —Nikaki itlajtol Jacob,
pero imauan de Esaú.
23 Niman Isaac xokimat tla Jacob katka pampa ima kipiyaya miyek itsojmiyo ken ikniu Esaú.
Ijkuak ye kimakaskia itlatiochiual ixpan toTEKO,
24 oksejpa okitlajtoltij:
—¿Melauak,
tejua tinokoneu Esaú?
Niman Jacob okinankijlij:
—Kemaj,
nejua niEsaú.
25 Kemaj itataj okijlij:
—Nokoneu,
xnechtlamaka para ma nikua on tlen otikmiktij,
niman kemaj nimitsmakas notlatiochiual.
Kemaj Jacob okitlamakak para ma tlakua itataj,
niman no okuajkuilij vino para ma koni.
Niman Isaac otlakuaj,
26 niman kemaj okijlij:
—Xnechajnisiui nokoneu,
niman xnechtenkua*.
27 Niman ijkuak Jacob okinisiuij para kitenkuas,
Isaac okijneku itlaken niman okinemilij ika melauak yejua iyenkuiyou.
Kemaj okitiochiu ika in tlajtojli:
“Melauak,
ajuiyak on tlen nikijnekui de nokoneu.
Ijnekuisti ken campo yejuan toTEKO kitiochiua.
28 Dios ma mitsmaka kiautli de on cielo*,
para tikpiyas pixkilistli yejuan más kuajli ipan motlal.
Ma mitsmaka miyek trigo,
niman miyek uvas.
29 Miyekej tlakamej ma mitstekichiuilikan.
Ma notlakuantelketsakan mixpan on tlakamej de miyek naciones.
¡Niman ma notlakuantelketsakan mixpan nochi on yejuan monanaj okintlakatilij!
Xkinmandaro mokniuan.
Ma kiselikan tlauejlijli,
yejuan mitstlaueliskej.
Niman ma kiselikan tlatiochiualistli yejuan mitstiochiuaskej.”
30 Ijkuak Isaac otlan kitiochiua Jacob,
niman ijkuak Jacob san kemach okis ne kampa nemiya itataj,
Esaú oyejkok de neka kampa otlatemoto.
31 Niman Esaú no okichijchiu sen tlakuajli uelik,
niman okiktilij itataj.
Niman okijlij:
—Xmoketsteua notataj.
Xmokualti in tlen onikajsito,
niman xnechmaka motlatiochiualis ixpan toTEKO.
32 Kemaj Isaac okitlajtoltij:
—¿Akin tejua?
Niman yejua okinankilij
—Nejua niEsaú,
nimoyenkuiyou.
33 Isaac xkimatiya tlinon kijtos niman opeu kuekuetlaka.
Kemaj ijkin okijtoj:
—Tla ijkon,
¿akinon onechajkuilij on tlakuajli de on yolki yejuan okanato ipan campo?
Nejua onikuaj ijkuak tejua xe tejkoya,
niman onikmakak on tlatiochiualistli.
Aman tej,
on tlatiochiualistli xok uelis nikuilis.
34 Ijkuak Esaú okak on tlen itataj okijtoj,
otsajtsik sanoyej chikauak ika miyek ajmantli,
niman kemaj okijtoj:
—¡Xnechtiochiua!
¡No xnechtiochiua notataj!
35 Pero Isaac okinankilij:
—Youalaj mokniu niman onechkajkayau.
Yokiktik on tlatiochiualistli yejuan para tejua katka.
36 Niman Esaú okijtoj:
—¡Yejua ika,
okitokayotijkej Jacoba pampa tlakajkayaua!
¡Ika in ye okpa nechkajkayaua!
Achtoj onechkuilij noherencia yejuan nechtocarouaya pampa niyenkuiyotl.
Niman aman onechkuilij notlatiochiualis.
¿Xtikpiya okse tlatiochiualistli para nejua?
37 Kemaj Isaac okinankilij:
—Xkita,
nejua yonikmakak Jacob tlanauatijli para mitsmandaros.
Onikijtoj para nochi mofamilia nochiuaskej itekitlkauan.
Yonikijlij ika kipiyas miyek trigo niman miyek uvas.
¿Tlinon más uelis nikchiuas mopampa nokoneu?
38 Niman Esaú oksejpa okijlij:
—Notataj,
¿tlen xtikpia okse tlatiochiualistli para nejua?
¡Nejua no xnechtiochiua!.
Niman Esaú oksejpa opeu chikauak tlauelchoka.
39 Kemaj Isaac okijlij:
“Tichantis uejka ipan tlajli yejuan xuelis tlatlakitis,
niman kampa xuajxinis ajuichtli.
40 Niman nonekis timomanauis ikan espada.
Timochiuas itekitkau mokniu,
pero ijkuak tiyolchikauis,
tikmokixtilis
niman xok mitschiualtis tlen kinekis.”
Jacob ocholoj pampa kimakasiya Esaú
41 Kemaj Esaú sanoyej okitlauelitak Jacob pampa okichtekilij itlatiochiual.
Niman Esaú opeu ijkin kinemilia:
“Ye nisiu mikis notataj.
Pero ijkuak yopanok noajmanalis,
nimiktis nokniu Jacob.”
42 Niman Rebeca okimat on tlen Esaú kinemiliaya kichiuas.
Kemaj Rebeca otlatitlan ma kinotsatij Jacob.
Niman ijkuak oyejkok,
Rebeca okijlij:
—Xkita,
Esaú aman kineki mitsmiktis ipampa on tlen otikchiuilij.
43 Yejua ika,
nokoneu,
xnechkaki niman xnechtlakamati.
Xuiya nimantsin hasta ipan on tlajli Harán ichan nokniu Labán.
44 Xmokaua ompa hasta ijkuak xok kualanis mokniu.
45 Niman ijkuak yokelkau on tlen otikchiuilij,
nitlatitlanis ma mitsijlitij para oksejpa xuajla.
¡Xnikneki nikimpolos omemej nokoneuan san ipan se tonajli!
46 Kemaj Rebeca okijlij Isaac:
—In siuamej hititas yejuan Esaú okinnonamiktij,
yonechyolajxitijkej.
Tla Jacob no kinonamiktis sen siuatl hitita yejuan kisa nikan Canaán,
más kuajli yej ma nimiki.