Abraham okajkayau on rey Abimelec
20
Sakin,
Abraham okis de Mamre niman oyaj ipan on xalpatlajkan Néguev.
Niman ompa onokau ipan on ueyikalpan Gerar yejuan nokaua itsajlan Cades niman Shur.
2 Chika ompa nemiyaj,
kijtouaya ika Sara ikniu.
Kemaj Abimelec,
on rey de Gerar,
okintitlan itekitkauan para ma kanatij Sara para kinosiuatiskia.
3 Pero ipan on tlayoua Dios okinots Abimelec ipan temiktli,
niman okijlij:
“Abimelec,
timikis pampa on siuatl yejuan tikneki tikmoyaxkatis kipiya iuejuetsin.”
4 Pero pampa Abimelec xe iuan notekaya on siuatl,
ijkin okinankilij:
“NoTEKO,
¿tiknemilia tinechmiktis maski xitlaj* nikchiua tlen xkuajli?
5 Yejua Abraham onechijlij ika on siuatl ikniu,
niman Sara no okijtoj ika Abraham ikniu.
Melauak nochi onikchiu ikan kuajli noyojlo,
niman nejua xitlaj* onikchiu yejuan xkuajli.”
6 Niman Dios okinankilij ipan temiktli:
“Nejua kuajli nikmati ika otikchiu ikan kuajli moyojlo,
niman yejua ika xonimitskauilij iuan xmoteka para maka titlajtlakos nixpan.
7 Aman xkuepili isiuau on tlakatl pampa yejua sen tiotlajtojketl,
niman yejua noueyikatsajtsilis mopampa para xtimikis.
Pero tla xtikuepilis,
tejua niman nochimej yejuan nemij mouan nenmikiskej.”
8 Kemaj uajmostla,
Abimelec onokuiteu saniman kualkan niman okinnots itekitkauan,
niman okinmijlij nochi on tlen okitemik.
Niman ijkuak okakkej,
sanoyej onomojtijkej.
9 Kemaj Abimelec okinots Abraham niman okijlij:
—¿Tline* inkin otitechchiuilij?
¿Tlinon xkuajli onimitschiuilij ika otitechajkuilij nejua niman nochanejkauan in sanoyej ueyi tlajtlakojli?
On tlen otitechchiuilij sanoyej xkuajli.
10 ¿Tlinon tiknekiya tiktlanis ika on?
11 Niman Abraham okinankilij:
—Nejua oniknemilij ika nikan xakaj kitlakaita Dios,
niman ueliskia nechmiktiskiaj ipampa nosiuau.
12 Niman melauak maski yejua nosiuau,
no nokniu pampa yejua ichpoch notataj,
pero xikoneu nonanaj.
Yejua ika,
oniuel oninonamiktij iuan.
13 Niman ijkuak Dios onechnauatij ma nikisa ichan notataj para san kanon kampa tiaskej,
Sara oniktlajtlanilij in favor,
para ma kijto nouiyan kampa tasiskej ika nejua niikniu.
14 Kemaj on rey Abimelec okikuepilij Abraham Sara isiuau.
No ijki,
okinsentlalij borregos,
uakaxtin,
esclavos,
niman esclavas,
niman okinmakak Abraham.
15 Kemaj okijlij:
—Xkita nochi notlal,
niman xtlapejpeni kampa más tikuelitas para tichantis.
16 Niman on rey Abimelec okijlij Sara:
—Nikmaka,
on yejuan tikteneuaya ‘mokniu’,
se mil plata tomin.
Niman ijkon kuajli nimitstlaxtlauiliya pampa onimitspinajtij imixpan nochimej on yejuan nemij nemouan.
Niman aman,
xakaj uelis kijtos tlen xkuajli de tejua ipampa on tlen onochiu.
17-18 Niman toTEKO okichiu para nion sen siuatl yejuan nemiya ichan on rey Abimelec ma ueli konepiya chika Sara ompa nemiya.
Kemaj Abraham okitlajtlanilij Dios para ma kipajti Abimelec niman isiuau,
niman on sekimej siuamej yejuan itekichiuilijkauan para oksejpa ouelkej okonepixkej.