Dios okintlatij on uejueyikalpanmej Sodoma niman Gomorra
19
Ijkuak ye tlayouatitiaya,
on omemej iángeles toTEKO oajsikej ne ueyikalpan Sodoma.
Niman Lot noseuijtikatka nisiu ikalakiyan on ueyikalpan kampa on tlayekankej nochipa nosentlaliaj.
Niman ijkuak Lot okintak,
amanaman onotelkets para okinnamikito,
niman kuajli okinselij.
Kemaj onotlakuantelkets niman onopachoj hasta ipan tlajli,
2 niman okinmijlij:
—Notekouan,
nemechtlajtlanilia sen favor,
xmokauakan in tlayoua ipan nochan pampa nejua ninemotekitkau.
Ompa nenmokxipajpakaskej niman nemokauaskej.
Niman mostla kualkan uelis oksejpa nenyaskej ipan nemoojui.
Pero yejuamej okijlijkej:
—¡Ka!
Xtikalakiskej ipan mochan,
pero tiktlajsojkamatij.
Tejuamej san tikochiskej nikan kiauak ipan ojtli.
3 Pero Lot okiminyemankatlajtlanilij para ma kochikan ichan hasta kaman okijlijkej ika kemaj nokauaskej,
niman oyajkej ichan.
Niman ijkuak oajsikej,
Lot okinnauatij itekitkauan ma kinchijchiuilikan sen uelik tlakuajli ikan pan yejuan xkipiya tlaxokolilistli*.
Niman on itenotskauan otlakuajkej.
4 Niman ijkuak xe notekayaj para kochiskej,
ouajlajkej nochimej on tlakamej de Sodoma niman okiyeualokoj ichan Lot.
Ouajlajkej desde on yejuan telpokamej hasta on yejuan más ueuentsitsimej,
5 niman ijkin opejkej kitsajtsiliaj Lot:
—¿Kanon nemij on tlakamej yejuan ouajlajkej mochan ipan in tlayoua?
¡Xkinuajkixti para inka ma titajauiltikan!
6 Kemaj Lot okisako para okinnots,
niman kuajli okitsaku on itsakuijlou.
7 Kemaj Lot okinmijlij on xkuajkualtin tlakamej:
—Notlajsojkaikniuan,
nemechchikajkatlajtlanilia para maka xchiuakan itlaj yejuan xkuajli.
8 Xkakikan,
nejua nikpiya ome nochpoch yejuan xe kaman notekaj iuan yakaj tlakatl.
Nikinkixtis niman nemechinmakas para xchiuakan iminuan tlinon nenkinekiskej.
Pero maka itlaj xkinchiuilikan in tlakamej pampa in notenotskauana.
9 Pero yejuamej okinankilijkej:
—¡Xmejkuani,
tejua xtichanej!
¿Tlen tejua titojuez,
para titechijlis tlinon tikchiuaskej?
¡Aman timitschiuiliskej más xkuajli xken yejuamej on tlakamej nenkichiuiliskiaj!
Kemaj,
nimantsin opejkej kimajmapeuaj Lot,
niman ononisiuijkej kampa onkatka itsakuijlou para kitlajkaliskej.
10 Pero itenotskauan okitlapojkej on tsakuijlotl niman okontilankej Lot,
niman okalaktijkej kalijtik.
Niman kemaj nimantsin oksejpa okitsakukej itsakuijlou.
11 Kemaj itenotskauan Lot,
okichijkej ma ixpajpayatikan on tlakamej yejuan nemiyaj kiauatenko.
Niman nochimej desde on yejuan más konetl hasta on yejuan más ueuentsin,
oixpajpayatkej.
Kemaj sa nomajmapeuayaj kitejtemouayaj on tsakuijlotl.
12 Niman on itenotskauan Lot okilijkej:
—Tla tikimpiya más mochanejkauan* nikan ipan in ueyikalpan,
motelpochuan,
mochpochuan,
momonuan noso oksekimej mofamilias,
xkinkixti niman uejka xkinuika.
13 Ijki xchiua pampa tikxoxotoniskej in ueyikalpan.
ToTEKO yokak on tlen sanoyej xkuajli kichiuaj in tlakamej ipan in ueyikalpan.
Yejua ika,
otechajtitlan para ma tikxoxotonikan.
14 Kemaj Lot oyaj okintato on yejuan imonuan yeskiaj pampa yokintlajtlankaj ichpochuan.
Niman okinmijlij:
—¡Xijsiuikan,
xkisakan niman uejka xuiyan pampa toTEKO kipopolos in ueyikalpan!
Pero on yejuan imonuan yeskiaj,
xokineltokakej.
Okinemilijkej yej san kamanaloua.
15 Niman ijkuak ye uajtlanestiaya,
iángeles toTEKO okitlajsiuitijkej Lot,
niman ijkin okilijkej:
—Amanaman,
xkisakan niman xkinuika uejka mosiuau niman on omemej mochpochuan para maka nenmikiskej ijkuak tikcastigaraskej in ueyikalpan.
16 Pampa Lot xnotlajsiuitiayaj para kisaskej,
iángeles toTEKO okimatilankej Lot,
isiuau niman ichpochuan.
Okinkixtijkej ipan on ueyikalpan para xomikkej,
pampa toTEKO okimiknelij.
17 Niman ijkuak nochi ifamilia Lot okiskej ipan on ueyikalpan,
se de yejuamej on ángeles okinmijlij:
—¡Xmotlajtlalokan para maka nenmikiskej!
Maka nenuajtlachaskej nemokuitlapan,
nion maka xmoteltikan ipan on ixtlauatl.
Tla nenkinekij nemomanauiskej niman xnenmikiskej,
xmotlajtlalokan hasta kampa tepeyoj.
18 Pero Lot okinmijlij:
—¡Ka,
notekouan!
¡Sanoyej nemechyemankatlajtlanilia!
19 Melauak yonennechpiyalijkej miyek teiknelilistli* niman onennechmanauijkej,
pero nejua xniuelis najsis hasta kampa tepeyoj pampa uejka.
On castigo uelis nechajsis ipan ojtli,
niman ijkuakon,
kemaj,
nimikis.
20 Nikan nisiu onkaj sen pitentsin kalpan kampa uelis ninomanauis.
¡Xnechkauilikan ompa ma niuiya para ninomanauis.
Melauak on kalpan pitentsin!
21 Ijkuakon se de yejuamej okinankilij:
—Kuajli yes,
nikchiuas on tlen tiktlajtlani.
Xnikxoxotonis on kalpan yejuan tikijtoua.
22 Pero nimantsin xuiyan hasta ompa,
pampa xitlaj* uelis nikchiuas hasta tla nemejuamej yonemajsikej nepa.
Pampa Lot okijtoj ika on kalpan pitentsin,
okitokayotijkej Zoarb.
23 Niman ye tlanestiaya kuajli,
ijkuak Lot ye ajsitikatka ipan on kalpan Zoar.
24 Kemaj toTEKO okichiu para ma tlikiaui ipan on uejueyimej kalpanmej Sodoma niman Gomorra ikan temej de azufre yejuan uajtlikuitiu.
25 Niman no okinxoxotontikej nochimej on kalpanmej ipan on ixtlauatl iuan nochimej yejuan ompa chantiyaj,
niman nochi xojtli yejuan ompa noskaltiaya otlatlak.
26 Pero isiuau Lot yejuan kuajtokatiaya,
oontlachix ikuitlapan.
Niman itlalnakayo onokuep teistatl.
27 Niman uajmostla saniman kualkan,
Abraham oyaj kampa otlajtlajtojka iuan toTEKO.
28 Niman de ompa ontlachix ne tlatsintlan ipan on uejueyimej kalpanmej Sodoma,
Gomorra niman ipan nochi on pipitikej kalpanmej yejuan onkatkaj ipan on ixtlauatl.
Niman okitak ika sanoyej tlejkouaya poktli ken ipokyo sen horno.
29 Ijkon toTEKO Dios okimpopoloj on uejueyimej kalpanmej kampa Lot chantiya.
Pero toTEKO Dios okelnamik on tlin okitlajtlanilij Abraham,
yejua ika okimanauij Lot ipan on castigo.
On moabitas niman on amonitas okiskej intech ichpochuan Lot
30 Sakin,
Lot onomojtij nokauas ipan on kalpan Zoar,
niman oyaj ipan on región kampa tepeyoj iuan ichpochuan,
kampa nochimej yeyimej ochantikej ijtik sen teostokajli.
31 Se tonajli on ichpoch yejuan tepij okijlij on yejuan más piten:
—Totataj ye ueuentsin,
niman xnemi nion se tlakatl nanika ipan in tetlalpan yejuan uelis iuan titonamiktiskej.
32 Ma tiktlauantikan totataj niman iuan ma titotekakan para iuan ma tikimpiyakan tokoneuan niman ijkon xpoliuis itoka.
33 Niman ipan on tlayoua okimakakej vino imintataj,
niman on yejuan tepij onotekak iuan itataj.
Pero itataj xokimat tlinon onochiu,
nion ijkuak ichpoch onotekak iuan,
nion ijkuak onokuiteu.
34 Niman uajmostla on yejuan tepij,
okijlij on más piten:
—Xkita,
yaloua tlayoua oninotekak iuan totataj.
Aman in tlayoua,
no ijki tiktlauantiskej para tejua timotekas iuan.
Niman ijkon tiomemej tikpiyaskej ikoneuan.
35 Kemaj ipan on tlayoua oksejpa okimakakej vino imintataj,
niman on piten onotekak iuan.
Pero Lot xokimat on tlen onochiu,
nion ijkuak ichpoch onotekak iuan,
nion ijkuak onokuiteu.
36 Ijkon on omemej ichpochuan onokoneankej de imintataj.
37 Niman on yejuan tepij okipix sen ikoneu yejuan okitokayotij Moab.
Ijkuak onoskaltij Moab,
onochiu iminuejkataj nochi on tlakamej yejuan aman imintoka moabitas.
38 Niman on yejuan más piten okipix ikoneu yejuan okitokayotij Ben-amí.
Ijkuak onoskaltij Ben-amí,
yejua onochiu iminuejkataj nochi on tlakamej yejuan aman imintoka amonitas.