Dios okijlij Abraham ika kipiyas sen ikoneu
18
ToTEKO okinotitij Abraham ijkuak nemiya kampa onokej uejueyi auakojtin yejuan iyaxka* Mamre,
chika Abraham noseuijtikatka ikiauatempan ijkuak kanaj tlakualispan katka.
2 Abraham sa ompa okintak yeyimej tlakamej ijkatikatkaj ixpan ikajkal.
Niman ijkuak okintak,
onokuitejtikis niman onotlaloj para okinnamikito niman ikan tetlakaitalistli onotlakuantelkets niman onopachoj hasta ipan tlajli,
3 niman okijtoj:
—NoTEKO,
nimitstlajtlanilia,
maka san xpano nikan nochan pampa nejua nimotekitkau.
4 Niman tla tikita kuajli,
nitlajtlanis achijtsin atl para nenmokxipajpakaskej,
niman nemotlaliskej achijtsin itsintlan itlaseuajlo in kojtli.
5 No ijki,
nemechajkuilis achijtsin tlakuajli para xkajsikan chikaualistli,
niman sakin*,
oksejpa uelis nenyaskej ipan nemojui.
Para nejua,
sen pakilistli ika onenuajlajkej,
niman nikneki nemechtlakualtis tla nenkinekij.
Niman yejuamej okinankilijkej:
—Kuajli yes.
6 Abraham amanaman okalakito ikalijtik,
niman okijlij Sara:
—Amanaman xkuektlali kanaj sempoajli kilos harina yejuan más kuajli,
niman xchijchiua pan.
7 Kemaj Abraham onotlaloj kampa nemij iyolkauan,
niman okitlapejpenij sen uakaxkonetl yejuan tomauak niman más kuajli.
Niman okimakak se itekichiuilijkau,
yejuan amanaman okichijchiu sen tlakuajli.
8 No ijki,
Abraham okinuajkuilij mantequilla,
leche,
niman on uakax nakatl tliuaki,
niman okinmakak ma kikuakan.
Niman Abraham ijkatikatka nisiu de yejuamej tlatsintlan de on kojtli* chika yejuamej tlakuayaj.
9 Niman ijkuak otlankej tlakuaj,
itenotskauan Abraham okitlajtoltijkej:
—¿Kanon nemi mosiuau Sara?
Niman Abraham okinankilij:
—Nemi nepa kalijtik.
10 Kemaj semej de on tlakamej okijtoj:
—Nejua ipan kanaj se xipan oksejpa niuajlas,
niman mosiuau Sara kipiyas ikoneu.
Niman Sara ijkatikatka ikiauatempan,
kaktikatka on tlen kijtouayaj iuan Abraham.
11 Abraham niman Sara ye ueuentsitsimej katkaj,
niman Sara yopanoka on tiempo para ueliskia kipiyaskia ikoneu.
12 Yejua ika,
xouel okixikoj,
yej ouetzkak niman okinojlij:
“¿Kenijki uelis nikpiyas on pakilistli aman,
ijkuak noueuentsin niman nejua ye tiueuentsitsimej?”
13 Pero toTEKO okijlij Abraham:
—¿Tline ouetskak Sara?
Tline okijtoj:
¿Kenijki uelis nikpiyas in pakilistli aman ijkuak noueuentsin niman nejua ye tiueuentsitsimej?
14 ¿Tlen onkaj itlaj yejuan nemoTEKO,
xuelis kichiuas?
Nejua ipan se xipan oksejpa niuajlas niman Sara kipiyas ikoneu.
15 Niman ijkuak toTEKO ijkon okijtoj,
Sara onomojtij,
niman xkinekiya kinokuitis ika ouetskak.
Yej okijtoj:
—Nejua xoniuetskak.
Pero toTEKO okinankilij:
—Nejua nikmati ika otiuetskak.
Abraham kitlajtlani itech Dios ipampa Sodoma
16 Kemaj on itenotskauan onotelketskej niman opeu nejnemij ipan ojtli hasta kampa ouel okitakej on ueyikalpan Sodoma ne tlatsintlan.
Niman Abraham iminuan oyaj para más tlayakapan iminuan ononauatij.
17 Kemaj toTEKO ijkin okinojlij:
“Noneki nikijlis Abraham tlinon nikchiuas,
18 pampa iuejkakoneuan miyekiyaskej ipan in tlaltikpaktli niman kipiyaskej miyek poder.
Niman itechkopa yejua nikintiochiuas nochimej on países ipan in tlaltikpaktli.
19 Nejua oniktlapejpenij para kinnauatis ikoneuan niman iuejkakoneuan ma kitlakamatikan notlamachtil,
niman ma kichiuakan nochi on tlen kuajli niman tlen melajki.
Niman tla ijkon kichiuaskej,
nejua nikinchiuilis nochi yejuan yonikijtoj.”
20 Kemaj toTEKO okijlij Abraham:
—Nechijliaj ika on tlakamej ipan on uejueyikalpanmej Sodoma niman Gomorra nouikaj sanoyej xkuajli.
Sanoyej xkuajli iminnemilis niman kipiyaj sanoyej miyek imintlajtlakol.
21 Aman nias nepa para nikitas tla melauak imintlajtlakol sanoyej ueyi ken nechijliaj.
Niman ijkon nikmatis.
22 Omemej de on itenotskauan okiskej para Sodoma,
pero Abraham onokau ompa ixpan toTEKO.
23 Kemaj Abraham achi okinisiuij niman okitlajtoltij:
—¿Tikimpolos on tlakamej yejuan nemij yolmelajkej iminuan on yejuan tlajtlakolejkej?
24 Tla nemi 50 tlakamej yejuan kuajkualtin ipan on ueyikalpan,
¿tikxoxotonis on ueyikalpan?
¿Xtiktlapojpoluis on ueyikalpan impampa on 50 tlakamej?
25 Xkuajli tla tikinmiktis on kuajkualtin iminuan on yejuan tlajtlakolejkej,
pampa ijkon nesis ken nochimej tlajtlakolejkej.
¡Maka xchiua ijkon!
Tejua tijuez yejuan más tiueyixtikaj ipan nochi in tlaltikpaktli,
niman nikmati ika tejua tikchiuas on tlen melajki.
26 Niman toTEKO okinankilij:
—Tla niknextis 50 tlakamej yejuan nemij yolmelajkej ipan on ueyikalpan,
kemaj nikintlapojpoluis nochimej impampa on 50 tlakamej yejuan nemij yolmelajkej.
27 Pero Abraham oksejpa okijlij:
—Xnechtlapojpolui noTEKO tla oksejpa nimitstlajtlanilia,
pampa tejua tiDios niman nejua san nitlakatl.
28 Pero tla poliui makuiltin tlakamej para ajsis 50 yejuan nemij yolmelajkej,
¿tikxoxotonis nochi on ueyikalpan san pampa poliui on makuilij?
Niman toTEKO okinankilij:
—Tla niknextis 45 tlakamej yejuan yolmelajkej,
xnikxoxotonis on ueyikalpan.
29 Niman Abraham oksejpa okijlij:
—Pero ¿tlinon nochiuas tla tiknextis san 40 tlakamej yejuan yolmelajkej?
Niman toTEKO okijtoj:
—Tla nemi 40 yejuan yolmelajkej,
xnikxoxotonis on ueyikalpan.
30 Pero Abraham oksejpa okijlij:
—Nimitstlajtlanilia maka tikualanis nouan pampa nimitsiknotlajtlanilia miyekpa.
Pero ¿tlinon nochiuas tla tiknextis san 30 tlakamej yejuan yolmelajkej?
Niman toTEKO oksejpa okijlij:
—Tla nemij 30 tlakamej yejuan yolmelajkej,
xnikxoxotonis on ueyikalpan.
31 Niman Abraham más okitlajtoltij:
—NoTEKO,
nikmati ika nimitskuaxotlaltia pampa nimitsnotsa ijkin,
pero ¿tlinon nochiuas tla tiknextis san sempoajli tlakamej yejuan yolmelajkej?
Niman toTEKO okijlij:
—Tla nemi sempoajli tlakamej yejuan yolmelajkej,
xnikixoxotonis on ueyikalpan.
32 Niman Abraham oksejpa okitlajtoltij:
—NoTEKO,
maka tikualanis nouan,
pero nimitstlajtoltis sa sejpa más:
¿Tlinon tikchiuas tla tiknextis san majtlaktli tlakatl yejuan nemi yolmelajki?
Niman toTEKO okijlij:
—Tla nemi majtlaktli tlakatl yejuan yolmelajki,
xnikxoxotonis on ueyikalpan.
33 Ijkuak toTEKO otlan tlajtoua iuan Abraham,
onejkuanij niman oyaj.
Niman Abraham oyaj ichan.