On neskayotl de on pacto* itoka circuncisión*
17
Ijkuak Abram kipiyaya 99 xipan,
toTEKO okinotitij niman okijlij:
—Nejua niDios yejuan nochi ueli nikchiua.
Xnechtlakamati niman nochipa xchiua on tlen kuajli.
2 Niman nejua nikchiuas sen pacto* mouan.
Nikchiuas para tikimpiyas sanoyej miyekej mouejkakoneuan.
3 Kemaj Abram ikan tetlakaitalistli onotlakuantelkets niman onopachoj hasta ipan tlajli ijkuak toTEKO Dios kinojnotstikatka.
Niman Dios no okijlij:
4 —In yejua pacto* yejuan nikchiua mouan:
Tejua timochiuas tajtli ikan naciones sanoyej miyekej.
5 Aman xok motoka yes Abrama,
yej motoka yes Abrahamb.
Ijkon motoka yes pampa nimitstlalis titajtli inka sanoyej miyekej tlakamej ipan miyekej naciones.
6 Melauak,
nikchiuas para mouejkakoneuan sanoyej ma miyekiyakan,
niman motech kisaskej reyes niman naciones.
7 Nejua nikchiuas on pacto* para tejua niman mouejkakoneuan para nochipa niman xkaman tlamis.
Ijkon ninochiuas nochipa nimoDios niman niiminDios yes mouejkakoneuan.
8 Nochi in tlajli yejuan itoka Canaán kampa aman tinemi,
nimitsmakas tejua niman mouejkakoneuan.
Niman inyaxka yes para nochipa,
niman nejua ninochiuas niiminDios.
9 Niman toTEKO Dios oksejpa okijlij Abraham:
—Tejua niman nochimej mouejkakoneuan ika onkaj ijkin nenkichiuaskej.
Xtlakamatikan nochi on tlen kijtoua in pacto* yejuan nikchiua nemouan.
10 In yejua pacto* yejuan nikchiua nemouan,
pacto* yejuan ika onkaj no kichiuaskej nochimej mouejkakoneuan:
Nochimej on tlakakokonej niman on tlakamej ika onkaj kintlaliliskej on nescayotl itoka circuncisión*
11 Kitekiliskej niman kixtilskej on ikuetlaxyo* yejuan kitlapachoua ikuapan on kampa tlapiasoua sen tlakatl.
Xchiuakan on neskayotl pampa on yejua kiteititia ika nikpiya sen pacto* nemouan.
12 Aman niman para nochipa,
xkintlalilikan on nescayotl,
ipan imintlalnakayo nochimej nemouejkakoneuan ijkuak kipiyaskej chikueyi tonajli ika otlakatkej.
No xkintlalilikan on neskayotl impan nochimej on esclavos yejuan tlakatiskej nemochan niman on yejuan tlakoualtin.
13 Nochimej ika onkaj kintlaliliskej on neskayotl ipan imintlalnakayo.
Niman ijkon nestias ipan nemotlalnakayo ika nopacto* nemouan nokauas para nochipa.
14 Pero on yejuan xnotlalilis on neskayotl ipan itlalnakayo,
ika onkaj nenkixtiskej para xokaman nemis iminuan mochanejkauan*.
Ijkin xchiuili pampa xkitlakamati on pacto* yejuan onikchiu nemouan.
15 No ijki,
Dios okijlij Abraham:
—Aman mosiuau xok itoka yes Sarai,
yej itoka yes Sarac.
16 Sara niktiochiuas,
niman mitspiyalis sen mokoneu.
Niman yejua yes nantli intech miyekej naciones,
niman sekimej iuejkakoneuan nochiuaskej reyes.
17 Kemaj Abraham onotlakuantelkets niman onopachoj hasta ipan tlajli para okimauistilij Dios,
pero ipan iyojlo uetskaya,
niman ijkin kinemiliaya:
“¿Ken ijki uelis nikpiyas sen nokoneu ijkuak ye nikpiya 100 xipan?
Niman,
¿ken ijki uelis Sara kipiyas ikonetsin ijkuak ye kipiya 90 xipan?”
18 Kemaj Abraham okijlij Dios:
—Niknekiskia notelpoch Ismael yejua xmaka motlatiochiualis.
19 Niman Dios okinankilij:
—¡Ka!
Nejua onikijtoj ika mosiuau Sara kipiyas sen ikoneu yejuan tiktokayotis Isaac.
Niman iuan yejua niman iminuan iuejkakoneuan niktlalis nopacto* para nochipa.
20 Yonikak on tlen otinechtlajtlanij para Ismael,
niman nejua niktiochiuas.
Nikchiuas para ma kimpiya miyekej ikoneuan niman iuejkakoneuan.
Niman yejua yes imintataj majtlaktli uan ome uejueyitlayekankej.
Itech yejua nikixtis sen ueyi nación.
21 Pero nopacto* nikchiuas iuan Isaac,
on mokoneu yejuan Sara kitlakatilis ipan se xipan kanaj ken amanin.
22 Niman ijkuak Dios otlan tlajtoua iuan Abraham,
onejkuanij.
23 Niman ipan on tonajli Abraham okitlalilij Ismael on neskayotl itoka circuncisión*.
Niman no okintlalilij neskayotl nochimej on iesclavos yejuan otlakatkaj ipan ichan niman nochimej on yejuan okinkojka.
Nochi on tlakamej yejuan nemiyaj ipan ichan niman yejuan kipaleuiyayaj,
okintlalilij on circuncisión* ken Dios otlanauatij.
24-25 Abraham kipiyaya 99 xipan,
niman Ismael ikoneu kipiyaya 13 xipan.
Ipan on tonajli,
Abraham okitlalilijkej on neskayotl ipan itlalnakayo.
Niman Abraham no okitlalilij Ismael on neskayotl ipan itlalnakayo.
26 Sa no ipan on tonajli Abraham niman Ismael on ikoneu okintlalilijkej on neskayotl ipan imintlalnakayo.
27 Niman no okintlalilijkej on neskayotl nochimej on esclavos yejuan otlakatkej ipan ichan niman on yejuan okinkojka ipan oksekimej países.