Agar niman Ismael on ikoneu
16
Sarai,
isiuau Abram,
xueliya kimpiyaya ikoneuan,
pero kipiyaya sen iesclava yejuan ualeua Egipto yejuan itoka katka Agar.
2 Niman Sarai okijlij Abram:
—Tikita ika toTEKO okichiu para xueli nikimpiya nokoneuan.
Nimitstlajtlanilia para iuan xkochi noesclava Agar.
Manin ijki uelis nikimpayas nokoneuan itechkopa yejua.
Niman Abram okichiu ken Sarai okijlij.
3 Niman Sarai okinots Agar,
on siuatl yejuan ualeua Egipto,
niman okimaktilij Abram para iuan ma kipiya ikoneu.
Ijkuak in onochiu,
Abram kipiyaya majtlaktli xipan ika chantiya ipan on tlajli Canaán.
4 Niman Abram okoch iuan Agar.
Niman ijkuak Agar okimat ika yonokonean,
onoueyimat niman opeu xok kitlakaita Sarai.
5 Kemaj Sarai okijlij Abram:
—Tejua motlajtlakol tla xok nechtlakaita Agar.
Nejua onimitsmaktilij para iuan tikpiyas se konetsintli,
pero ijkuak okimat ika ye kipiya ikoneu,
onoueyimat.
ToTEKO ma kijto akinon kipiya tlajtlakojli,
tla tejua noso nejua.
6 Kemaj Abram okinankilij:
—Xkita Sarai,
moesclava Agar nemi momak.
Xchiuili tlen tiknekis.
Kemaj Sarai opeu kichiualtia Agar tlen xkuajli.
Yejua ika,
Agar ocholojteu.
7 Pero se iángel toTEKO okinextij Agar kampa meya atl ipan on xalpatlajkan.
Nemiya ipan on ojtli yejuan yau para Shur.
8 Niman iángel toTEKO okitlajtoltij:
—Agar,
iesclava Sarai,
¿kanon otiualeu niman kanon tiau?
Niman Agar okinankilij:
—Oniuajkisteu itech noteko Sarai.
9 Kemaj iángel toTEKO okijlij:
—Xmokuepa itech moteko niman xtlakamati ipan nochi tlen mitsnauatis.
10 Niman iángel toTEKO no okijlij:
“Nejua nikinmiyekilis mouejkakoneuan
hasta xakaj uelis kimpouas.
11 Aman tikoneuaj niman tiktlakatilis sen tlakakonetsintli.
Tiktokayotis Ismaela,
pampa toTEKO okak ika timajmanaya.
12 Mokoneu nochiuas sen tlakatl yejuan sanoyej tlauelej.
Nouijsokis iminuan nochimej,
niman nochimej kinekiskej kuijsokiskej.
Niman yejua nemis mojmostla ikan tlauejli iuan nochimej ikniuan.”
13 Pampa toTEKO okinots Agar,
Agar okitokayotij:
“On Dios yejuan nochi kita.”
Ijkon okijtoj pampa kinojliaya:
“Onikitak Dios yejuan no nechita niman xonimik.”
14 Yejua ika,
on amejli okitokayotijkej:
“Iamel Dios yejuan Nemi niman yejuan Nechita.”
In amejli nokaua itsajlan Cades niman Bered.