Dios okichiu se pacto* iuan Abram
15
Sakin,
toTEKO okinots Abram ipan sen tlatlachalistli yejuan ken temiktli,
niman okijlij:
—Maka xmomojti Abram,
pampa nejua nimitsmanauisa.
Nimitstiochiuas sanoyej.
2-3 Pero Abram okinankilij:
—NoTEKO niman noDios,
¿Tlinon para on tlajtlamach* yejuan ika tinechtiochiuas?
Nejua xnikpiya sen nokoneu para nikauilijteuas.
Nejua xtinechmaka nion se nokoneu.
On notlakeual Eliezer yejuan ualeua ne ueyikalpan Damasco,
yejua kiselis nochi on tlen nikpiya ijkuak nimikis.
4 Niman toTEKO okinankilij:
—On motlakeual xejua kiselis on tlen tikajteuas.
Nemis se mokoneu niman san yejua kiselis on tlen tikpiya ken herencia.
5 Kemaj toTEKO okuikak Abram neka kiauak niman okijlij:
—Xkonta on cielo niman xkimpoua on sitlalimej tla tiueli tikimpoua.
Ijkon miyekej yeskej mouejkakoneuan.
Nemiskej sanoyej miyekej hasta xakaj uelis kimpouas.
6 Niman Abram okineltokak on tlen toTEKO okijtoj.
Yejua ika,
toTEKO okikiselij Abram ken sen tlakatl yolmelajki ixpan.
7 Niman toTEKO okijlij:
—Nejua nimoTEKO.
Nejua onimitskixtij ne ipan on ueyikalpan Ur kampa nemij on caldeos,
para nimitsmakas in tlajli niman moyaxka* yes.
8 Pero Abram okijlij:
—NoTEKO niman noDios,
¿ken ijki uelis nikmatis tla melauak nikselis in tlajli?
9 Niman Dios okinankilij:
—Xnechajuikili sen becerra,
sen chiva niman sen carnero yejuan kipiyaj yeyi xipan.
No ijki,
xnechajuikili se pichontsin niman se kokotetsin.
10 Kemaj Abram okinuajuikilij Dios nochi on yolkej.
Okinmiktij niman okintlatlajkotek,
niman okintlatlalij se tlajkotipan ixpan okse.
Okintlajtlalij ueuejkatsitsimej para se uelis panos tlajkotian.
Pero on totomej xokintlatlajkotek.
11 Niman on tsojmamej temouayaj ipan on yolkej yejuan miktoyaj,
pero Abram kinmojtiaya.
12 Niman ijkuak ye tlayouatitiaya,
Abram sanoyej okochmik niman okimat ika oualaj ipan yejua,
sen tlayouajlotl yejuan sanoyej temojtij.
13 ToTEKO okijlij:
—Kuajli xmatstia ika mouejkakoneuan nemiskej ipan okse tlajli ken esclavos.
Niman on yejuan ompa chanejkej,
sanoyej inka najauiltiskej,
niman kintaskej ken xchanejkej.
Niman mouejkakoneuan tlajyouiskej 400 xipan.
14 Pero sakin*,
nejua nicastigaros on nación niman on chanejkej yejuan kintlajyouitiskej mouejkakoneuan ken esclavos.
Niman mouejkakoneuan kisaskej ikan miyek riquezas.
15 Pero tejua timikis moyolika ijkuak ye tiueuentsin.
Niman mitstlalpachoskej ijkuak ajsis on tonajli.
16 Ijkuak yopanok on naui generaciones de mouejkakoneuan,
yejuamej oksejpa uajlaskej nikan.
Pero amantsin xe ajsi on tonajli ijkuak nikincastigaros on amorreos pampa noneki achtoj kichiuaskej tlajtlamach* yejuan sanoyej más xkuali.
17 Ijkuak ye tlayouakatka niman sanoyej tlayouatok katka,
itlaj ones ken sen tlikontli yejuan popokaya,
niman sen tlauijli itoka okopijli* yejuan kipiyaya tlimilinajli.
On tlikontli iuan on tlimilinajli panouayaj intlajkotian on yolkej yejuan Abram okintlatlajkotek.
18 Ipan on tonajli,
toTEKO okichiu pacto* iuan Abram niman okijlij:
—Nochi in tlajli nikinmakas mouejkakoneuan.
Kiseliskej nochi in tlajli kampa peua on río ipan on tlajli ne Egipto hasta on ueyi río yejuan itoka Éufrates.
19 In kijtosneki ika nochi in tlajli nochiuas inyaxka kampa aman nemij on tlakamej ceneos,
cenezeos,
cadmoneos,
20 heteos,
ferezeos,
refaitas,
21 amorreos,
cananeos,
gergeseos niman jebuseos.